Казанда Кәрим Тинчуринны искә алу чарасы уздырылды (ФОТО)

Әлеге зиратта 1929-1942 елларда атып үтерелгән сәяси репрессия корбаннары исемнәре уелган мемориал стела куелган. Анда Кәрим Тинчурин исеме дә бар. 

 

 

Чарада ТР мәдәният министрының беренче урынбасары Эльвира Камалова, К.Тинчурин исемендәге Татар дәүләт драма һәм комедия театры директоры Фәнис Мөсәгыйтов, ТР Язучылар берлеге рәисе урынбасары Рәмис Аймәт, күпсанлы театр җәмәгатьчелеге вәкилләре, әдәбият әһелләре, журналистлар катнашты. Иң элек алар, Казанның Мәрҗани мәчете имамы Ансар хәзрәт Мифтахов белән берлектә, Кәрим Тинчурин рухына багышлап дога кылды.

 

 

 

“Без бүген дә театрларга барып,  Кәрим Тинчурин иҗат иткән үлемсез пьесалар буенча куелган спектакльләрне карыйбыз һәм таң калабыз. Алар безнең өчен саф һавага тиң, әлеге әсәрләр бүген дә кызыклы һәм актуаль, фаҗигале һәм көлкеле, аларда – камил татар теле, бөек драматургия”,  –  диде Эльвира Камалова. Ул билгеләп үткәнчә, Кәрим Тинчурин – татар мәдәнияте, татар зыялылары өчен таяну нокталарының берсе.  

 

 

К.Тинчурин исемендәге Татар дәүләт драма һәм комедия театры директоры Фәнис Мөсәгыйтов драматургны яртылаш укылган китап белән чагыштырды. “Кәрим Тинчуринны әле өйрәнәсе дә өйрәнәсе, әсәрләрен куясы да куясы”, – дип билгелә үтте ул бу уңайдан. Фәнис Мөсәгыйтов бүген кич Тинчурин театры сәхнәсендә татар театры тарихында беренче тапкыр драматургның “Соңгы әсәр”е куелачагын да әйтеп узды. 

Хәтер чарасы Кәрим Тинчурин исеме теркәлгән мемориал стелага чәчәкләр китерү тантанасы белән төгәлләнде.