Казанда Милли Шура рәисенең беренче урынбасары билгеләнде

Казанда Бөтендөнья татар конгрессының VI корылтаеның пленар утырышында Милли Шура рәисенең беренче урынбасары булып Ринат Закиров билгеләнде. Аны Татарстан Республикасы премьер-министры урынбасары, Милли Шура рәисе Васил Шәйхразиев тәкъдим итте.

“Татар-информ” хәбәр итүенчә, Бөтендөнья татар конгессы иҗтимагый берләшмәләренең халыкара берлегенең яңа Уставы нигезендә, Милли Шура рәисенең 5 урынбасары булырга тиеш. Ринат Закировтан тыш, Милли Шура рәисе урынбасарлары булып Россия Федерациясе Дәүләт Думасы депутаты, Татар федераль милли автономия рәисе Илдар Гыйльметдинов, Казахстан татарлары конгрессы җитәкчесе Тәүфикъ Кәримов, Саратов өлкәсе төбәк милли мәдәни автономиясе рәисе Камил Әбләзов, Татарстан фәннәр академиясе вице-президенты Дания Заһидуллина сайланды.

Ринат Зиннур улы Закиров Чистай районы Нарат-Елга авылында 1948 елның 1 августында туган.

“Югары молекуляр кушылмалар химиясе һәм технологиясе” белгечлеге буенча Казан химия-технология институтын тәмамлаган.
Тарих фәннәре докторы, педагогия фәннәре кандидаты.

Хезмәт юлын Казан химия-технология институты инженеры буларак 1972 елда башлаган.

1972-1980 – Татарстанның комсомол өлкә комитетында пропаганда бүлеге инструкторы, бүлек мөдире урынбасары, пропаганда бүлеге мөдире булып эшләгән.

1980-1988 – Татарстанның партия өлкә комитетында мәдәният бүлеге инструкторы, пропаганда һәм агитация бүлеге мөдиренең урынбасары вазифасын башкарган.

1988-1991 – В.И.Ленин Үзәк музееның Казан филиалы башлыгы.
1991 -  “Казан” милли мәдәният үзәгенең директоры булган.

1996 – Казан шәһәренең мәдәният идарәсе җитәкчесе урынбасары.
2002 елдан Бөтендөнья татар конгрессы Башкарма комитеты рәисе.

2004-2009 — өченче чакырылыш Татарстан Республикасы Дәүләт Советы депутаты.

2009-2014 — дүртенче чакырылыш Татарстан Республикасы Дәүләт Советы депутаты.
2014 елдан бишенче чакырылыш Татарстан Республикасы Дәүләт Советы депутаты.

Татарстан Республикасы Дәүләт Советының Мәдәният, фән, мәгариф һәм милли мәсьәләләр комитеты әгъзасы.

Татарстан Республикасы һәм Россия Федерациясенең атказанган мәдәният хезмәткәре.

“Фидакарь хезмәт өчен” Татарстан Республикасы медале, “Россия халыклары мирасына керткән хезмәте өчен” медале белән бүләкләнгән.

“Санкт-Петербургның 300 еллыгы истәлегенә” медале, “Казанның 1000 еллыгы истәлегенә” медале, “Фидакарь хезмәт өчен” медале белән бүләкләнгән.