Камал театры Тываны яуларга бара (АФИША)

18 һәм 19 августта Кызыл шәһәрендә Виктор Кок-оола исемендәге Тыва музыкаль-драма театры сәхнәсендә Г.Камал исемендәге Татар дәүләт Академия театрының тәүге гастрольләре уза. Әлеге чара алмаш гастрольләр буларак оештырыла – 10 һәм 11 июньдә Тыва театры Казанда “Ханума” һәм “Кан-Кыс” спектакльләрен күрсәтә.

18 август, 19.00 тамашачыларга Туфан Миңнуллинның “Җанкисәккәем” спектакле тәкъдим ителә. Нечкә лирик комедияне тамашачылар бик җылы кабул итәләр, ул үзенең актуальлеген югалтмыйча инде 20 елдан артык сәхнәдән төшми. Спектакльнең режиссеры – Фәрит Бикчәнтәев.
19 август, 18.00 Галиәсгар Камал пьесасы буенча “Банкрот” сатирик комедиясе. Тапкыр Сираҗетдин ролендә – Татарстанның халык артисы Радик Бариев. Спектакль “Алтын Битлек” милли театр премиясенең экспертлар берлеге фикере буенча, Россиянең 2014 елда куелган иң яхшы спектакльләр лонг-битенә керде. Спектакльнең режиссеры – Фәрит Бикчәнтәев.

***
1906 елның 22 декабрендә Казанда татар телендә беренче спектакль уйнала. Бу көн татар театрының туган көне булып исәпләнә. 1907 елда беренче профессиналь татар труппасы оеша. 1926 елда театрга “Академия”, ә 1939 елда татар драматургиясе классигы Галиәсгар Камал исеме бирелә.

Бүгенге көндә Камал театр репертуарында татар, рус, чит ил классикасы, заман драматургиясе буенча 25тән артык спектакль бар.
Камаллылар еш кына Россия һәм чит илләргә гастрольләргә йөри. Казахстан, Кыргызстан, Әзербәйҗан, Литва, Латвия, Эстония, Германия, Финләндия, Төркия, Бөекбритания, Колумбия, Испания, Кытай, Венгрия һ.б илләрдә тамашачылар театрны яратып кабул итәләр.
1998 елдан башлап театр Төрки халыкларының “Нәүрүз” халыкара театр фестивален, 2003 елдан “Яңа татар пьесасы” конкурсын, 2009 елдан “Һөнәр” яшь татар режиссурасы фестивален, 2010 елдан “Нәүрүз” халыкара театраль-белем бирү форумын үткәреп килә.