Камал театры Наил Дунаевның юбилей кичәсенә чакыра

4 май, 19.00 сәгатьтә, Г.Камал исемендәге Татар дәүләт Академия театрының Зур сәхнәсендә Россиянең атказанган, Татарстанның халык артисты, Татарстанның Г.Тукай исемендәге Дәүләт премиясе лауреаты Наил Дунаевның 80-яшьлегенә багышланган юбилей кичәсе уза.

Юбилей кичәсе 2 өлешкә бүленгән. Беренче бүлектә тамашачылар өчен юбиляр катнашында Камал театры репертуарының иң яхшы:  “Гөргөри кияүләре”, “Гөлҗамал”, “Өч аршын җир”, “Канкай углы Бәхтияр” спектакльләреннән өзекләр күрсәтелә. Артистны юбилее белән Татарстанның халык артисты Георгий Ибушев, музыка белгече-фольклорист Геннадий Макаров, Татарстанның керәшен иҗтимагый идарәсе рәисе Иван Егоров һәм “Бәрмәнчек”  керәшен Дәүләт фольклор ансамбле котлаячак.

Тантаналы кичәнең икенче өлешендә М.Гафури исемендәге Башкорт академия драма театры, К.В. Иванов исемендәге дәүләт академия драма театры, Татарстан театрлары вәкилләре, җырчылар Алинә Кәримова, Лариса Байсарова, Татарстанның Зәй районы җитәкчеләре һәм коллективлары, Казан мәдәният һәм сәнгать институты, Камал театрының яшь актерлары Раил Шәмсуаров һәм Ришат Әхмәдуллин чыгыш ясаячаклар.

Билет алырга. Касса телефоны: (843) 293-03-74

Аккредитация: kamal.press@tatar.ru, 293-83-18, 89274464542 (Илшат Латыйпов).

Актер турында:

Николай Иванович Дунаев

1937 елның 3 маенда Татарстанның Зәй районы Әхмәт авылында туа. 1961 елда Мәскәүдә Щепкин исемендәге Югары театр училищесын (татар студиясе) тәмамлый һәм Г.Камал исемендәге Татар дәүләт Академия театрында эшли башлый.

Театрда эшләү дәверендә ул үзен талантлы, киң иҗади диапозонга ия артист буларак күрсәтә. Ул тудырган образлар төрле, бер-берсеннән аерылып тора. Алар арасында лирик-драматик персонажлар:   Нияз –  «Соңгы хат»,  Марат – «Туй алдыннан» Х.Вахит, Зөфәр – «Зөбәйдә - адәм баласы», Сәйяр – «Әни килде» Ш.Хөсәенов, Йосыф –  «Югалган көн» А.Гыйләҗев, Чотбаев – «Ахырзаман» Ч.Айтматов; көчле, кыю шәхесләр: Шамил Усманов – «Шамил Усманов» А.Гыйләҗев, А.Яхин, Бәхтияр  – «Канкай углы Бәхтыяр» Т.Миңнуллин, Мирвәли – «Өч аршын җир» А.Гыйләҗев, Акъегет – «Ай тотылган төндә» М.Кәрим, Василий – «Бер төн» Б.Горбатов; комедияләрдәге рольләре: Лисео — «Җүләр кыз» Лопе де Вега, Качкинский – «Һиҗрәт» Н.Исәнбәт, Камали – «Банкрот» Г.Камал, Җиһанша – «Зәңгәр шәл» К.Тинчурин, Ишми – «Конокрад» Т.Миннуллина, Сәймән – «Китмәгез, тургайлар » А.Гыйләҗев, Бригелла – «Болан-Патша» К.Гоцци һ.б. актер тудырган театрның алтын фондын тәшкил итәрдәй образлар.

Н.И.Дунаевның тамашачы күңелендә сакланган рольләренең берсе – Ә.Фәйзинең “Габдулла Тукай” әсәрендәге татар халкының бөек шагыйре Тукай образы. Актер тирән кешелекле, үз халкының язмышы өчен кайгыручы шагыйрь-гражданин образын иҗат итә.

Н.Дунаев иҗатының зур өлешен рус классикасы алып тора. Төрле вакытта ул А.Островскийның “Агай-эне ак мыек” спектаклендә Подхалюзин, “Бирнәсез кыз”да - Паратов, “Җимерелгән бәхет”тә- Залешин, Л.Леоновның “Нашествие”сында -Колесников, Б. Горбатовның "Бер төн"ендә - Василий рольләрен башкара. 1973 елда бөек драматург А.Н.Островскийның тууына 150 ел тулуга багышланган Бөтенсоюз спектакльләр смотрында Подхалюзин роле өчен Н.И. Дунаев I дәрәҗәле диплом белән бүләкләнә.

Актер тирән психологик кичерешләрне дә, җиңел юморны да, нечкә тойгыларны да, тискәре һәм уңай образларны да тормышчан, ышандырырлык итеп тамашачыга җиткерә белә. Н.Дунаевның актерлык осталыгын чагылдырган рольләре арасында: Күрше -"Бичура" М. Гыйләҗев, Якуб Акчурин - "Без китәбез, сез каласыз", Нурислам - " Хушыгыз!", Алексей "Илгизәр+Вера" Т.Миңнуллин һ.б.

1998 елда Т. Миңнуллинның "Хушыгыз!" драмасындагы Нурислам роле өчен  Н. Дунаев Татарстанның Г.Тукай исемендәге Дәүләт премиясенә ия була. 

Актерның соңгы елларда иҗат иткән образлары арасында тамашачы мәхәббәтен казанган рольләре:  Гөргөри -"Гөргөри кияүләре" Т.Миңнуллин, Зимин -"Телсез күке" З.Хәким, Карт - "Зәңгәр шәл" К. Тинчурин, Ногман - " Мәхәббәт турында сөйләшик" И.Зәйниев, Василий Дмитриевич -"Банкрот" Г.Камал һ.б.

Шулар арасыннан Гөргөри образы иң матуры һәм иң яктысыдыр. Аның Гөргөрие акыллы фикерле, җор телле, шаян табигатьле, хәйләкәр холыклы, гомумән бар яктан да килгән чын керәшен карты.

Н.И.Дунаев актерлык хезмәте белән беррәттән рус һәм чит ил драматурглары пьесаларын тәрҗемә итүче буларак та танылды.

Н.И.Дунаев - Казан Дәүләт мәдәният институты профессоры. Бүген аның шәкертләре - Казан, Яр Чаллы, Түбән Кама, Әлмәт, Оренбург һәм башка театрларның танлыган актерлары.