19.04.2017 Мәдәният
XIII "Нәүрүз" театр фестиваленең ПРОГРАММАСЫ билгеле булды
5-9 июнь көннәрендә Казанда Төрки халыкларның XIII "Нәүрүз" Халыкара театр фестивале уза. Фестиваль программасында Россия, Казахстан һәм Эстониядән килгән 18 театр урын ала. XIII "Нәүрүз" афишасына Алтай, Башкорстан, Кабардино-Балкария, Казахстан, Татарстан, Тыва, Хакасия һәм Якутиянең иң яхшы 22 спектакле керде.
Фестивальнең махсус кунагы - Эстониянең "R.A.А.A.M" театры. Фестивальнең репертуары үзенең төрлелеге белән аерылып тора: монда чит ил классикасы да, этник кыйссалар да, заманча драматургия дә урын алган. Катнашучы спектакльләрнең режиссерлары арасында таныш исемнәр дә бар: Сергей Потапов, Фәрит Бикчәнтәев һәм башкалар. Фестиваль 400дән артык катнашучы җыячак.
"Алдагы "Нәүрүз" фестивале Казахстанга багышланган булса, быел ул Якутия театр сәнгате эгидасы астында уза. Барлыгы фестивальдә Саха (Якутия) Республикасыннан 4 театр катнаша: Дәүләт яшь тамашачылар театры, Олонхо театры, Дәүләт эстрада театры һәм П.А.Ойунский исемендәге Саха Академия театры", - дип билгеләп үтте фестивальнең программа директоры Нияз Игъламов.
XIII "Нәүрүз"нең спектакльләре 5 театраль мәйданда күрсәтелә: Камал театрының Зур һәм Кече сәхнәсе, Тинчурин театры, Яшь тамашачылар театры һәм "Әкият" курчак театры. Спектакльләргә билетлар Казан театрлары кассаларында, Интернет челтәрендә, шулай ук билет сату буенча операторларда сатыла.
***
"Нәүрүз"нең төп максаты - Россия Федерациясе һәм аннан тыш яшәүче төрки халыкларының мәдәни һәм рухи бәйләнешләрен ныгыту. Беренче тапкыр "Нәүрүз" фестивале 1989 елда СССРның Театр эшлеклеләре берлеге карары буенча Алма-Атада уза. СССР таркалганнан соң, ел саен уздырыла торган фестиваль 5 ел үткәрелми. "Нәүрүз" фестивале 1998 елда Татарстан Республикасы инициативасы буенча янәдән тергезелә. Хәзерге вакытта фестиваль Татарстанның башкаласы Казанда ике елга бер тапкыр уздырыла. 2010 елдан Фестиваль эгидасы астында "Нәүрүз" Халыкара театраль-белем бирү форумы эшли. Әлеге форум кысаларында актерлык һәм режиссерлык осталыгы, театр сәнгате белгечлеге һәм театр сәнгате өлкәсендә менеджмент буенча мастер-класслар һәм семинарлар үткәрелә.
Фестивальне оештыручылар: Россия Федерациясенең мәдәният министрлыгы ярдәме белән Татарстан Республикасының мәдәният министрлыгы, Россия Федерациясенең Театр эшлеклеләре берлеге ярдәме белән Татарстан Республикасының Театр эшлеклеләре берлеге, Г.Камал исемендәге Татар дәүләт Академия театры.