|
|
Бүген кемнәр туган
|
|
Архив
|
01.03.2017 Шоу-бизнес
Альбина Кармышева хатын-кызларны 8 март белән төрле телдә оригиналь котлаган (ВИДЕО)Җырчы, тамада Альбина Кармышева Хатын-кызлар бәйрәме уңаеннан тамашачыларына бүләк ясарга булган. Ул бу турыда күптән хыялланган. Һәм, ниһаять, “8 нче Март белән сезне!” исемле җырына клип төшергән. Бүген "Матбугат.ру"да әлеге клипның премьерасы. – Альбина, бик оригиналь клип төшергәнсез.
– Дөньяда яшәүче бар хатын-кызларыбызны 8 Март бәйрәме белән котларга теләп, клип төшердем. Төрле телләрдә башкардым. Клипны күргәч, үзегез дә аңлап алгансыздыр. Монда чит ил кешеләре дә катнашты. Африка, Франция, Пакыстан, Кытай кебек илләрдән Казанга яшәргә килгән якын дусларым белән төштек. Шул рәвешле клипта халыклар дуслыгы барлыгын күрсәтергә теләдем.
– Сезне Миңгол абый Галиев укучысы дип беләбез. Үзегез белән якынрак таныштырып китсәгез иде.
– Мордовиядән Казанга күченеп килгән бердәнбер татар җырчысы мин. Әнием Галина рус милләтеннән булса, әтием Асым –татар. Ике телдә дә иркен сөйләшә алам. Мордовиядә 50 меңгә якын татар яши. Шунысы кызганыч: күбесе туган телләрендә сөйләшми. Минемчә, татар теленә мәхәббәтне татар җырлары аша аңлатырга мөмкин. Әйе, мин Казанда музыка факультетында Миңгол абый Галиев классында укыдым. Татарча сөйләшә алуым белән бик горурланам. 8 ел диярлек туган ягым – Мордовиядә татар концертлары оештырып киләм.
– Ул концертларны оештыруда дәүләт яисә Мордовиядәге татар җәмгыяте ярдәм итәме соң?
– Юк. Туган ягымдагы татар җәмгыяте миңа коммерция максатларында эшлисез, диләр. Аннан кергән акча артистның төркеменә һәм арендага китә. Миңа калмый диярлек. Чөнки төп максатым – Мордовия татарлары үзләренең татар булуларын белеп, татар җырларын ишетеп, телләрен онытмауларын телим. Тиздән 5 мартта Саранск шәһәренә Данир Сабиров концерт белән киләчәк. Якташларым үзен көтәләр инде.
– Вокал һәм гитара буенча балаларга дәресләр дә бирәсез икән. Гаиләгә вакыт каламы соң?
– Балаларны бик яратам. Алар белән Казандагы иҗат клубларының берсендә шөгыльләнәм. Моңа өстәп, туйлар, төрле бәйрәмнәр алып барам. Үземә рәхәтлек алу өчен генә җырлыйм. Әгәр ирем Айзат каршы килсә, сәхнәдән бөтенләй дә китә алам. Чөнки гаиләм һәрвакыт беренче урында булды. Бүген ике бала үстерәбез. Кызыбыз Әминәгә – 6, улыбыз Әскәргә 3 яшь тулды.
--- |
Иң күп укылган
|