17.12.2016 Мәдәният

Илтөзәр, Сәгыйтова, Гүзәл Шәмәрдәнова, Эльмир Низамов - Дамир Сираҗиев премиясе лауреатлары

Бүген 17 декабрьдә Камал театрында Дамир Сираҗиев премиясе лауреатларын бүләкләү тантанасы узды. Аны Татарстанның халык артисты Луара Шакирҗанова ачып җибәрде. Сәламләү сүзләрен мәдәният министрының беренче урынбасары Эльвира Камалова җиткерде һәм премия лауреатларын атады:

Илтөзәр Мөхәммәтгалиев - Классик драматургия образларын иҗат итүдәге осталыгы, “Тәрҗемәләр һәм сәхнә өчен әсәрләр” китабы өчен, Татарстан Республикасының атказанган артисты.

Гүзәл Шәмәрдәнова - Театр сәнгатендәге казанышлары һәм Т. Миңнуллин исемендәге Татар дәүләт драма театры үсешенә зур өлеш керткәне өчен.

Эльмир Низамов - Татарстан Республикасы театрларында куелган спектакльләргә оригиналь музыка язганы өчен М. Җәлил исемендәге премия лауреаты, композитор.

Гүзәл Сәгыйтова - Татар театр сәнгатен пропагандалауга зур өлеш керткәне өчен, тележурналист, “Калеб” иҗат берләшмәсенең җитәкчесе.

1999 елдан бирле Татарстан Республикасы мәдәният министрлыгы һәм “Җыен” татар телен, сәнгатен саклау һәм үстерү фонды тарафыннан театр сәнгате өлкәсендә Дамир Сираҗиев премиясе тапшырылып килә. Шушы вакыт эчендә Татарстан, Россия һәм чит төбәкләрдән дистәләгән данлыклы театр эшлеклеләре әлеге премиягә ия булдылар. Алар арасында театр өлкәсендә эшләүче төрле профессия вәкилләре: режиссер, актер, драматург, сценографлар, театр тәнкыйтьчеләре, җәмәгать эшлеклеләре, директорлар. Әлеге премиягә лаек булган берничә исемне генә атап үтү дә җитәдер: М.Сәлимҗанов, Ф.Бикчәнтәев, Т.Еникеев, З.Хәким, Т.Миңнуллин, А.Степанова, А.Славутский, Р.Таҗетдинов, М.Айтуганова, Р.Исрафилов һәм башкалар. Дамир Сираҗиев премиясе лауреатлары арасында бер генә очраклы кеше дә юк. Алар барысы да театр дөньясында танылган, үз исемнәрен булдырган шәхесләр.

---
Камал театры
№ --- | 17.12.2016