11.12.2016 Мәдәният
“Тылсым” төркеме: Аз булганда тәмлерәк (ИНТЕРВЬЮ)
“Тылсым” төркеменә быел 10 ел. Бер дистә ел иҗат нәтиҗәсендә алар тыйнак, камил, зәвыклы төркем буларак тамашачы күңеленә кереп урнашты. Дөрес, концерт саен зур сәхнәләрне тотмасалар да, Олеся, Алсу һәм Эльвираның профессиональ тавышлы башкаруын күп кенә бәйрәмнәрдә, Сабантуйларда, җыелма тамашаларда ишетергә мөмкин. Бәлки, аларның кадере дә шундадыр. Аз булганда тәмлерәк була диләрме әле…
— Кызлар, сез ничек берләшергә булдыгыз?
— Безнең төркем 2006 елда барлыкка килде. Татарстанның һәм Россиянең халык артисты Венера Ганеева тарафыннан оештырылган концертта чыгыш ясарга төркем кирәк иде. Венера Ахатовна безне сайлап алды да. Башында без бишәү идек, аннары өч кызга калдык. Исемне исә укытучыбыз, Камал театры артисткасы Фәридә Сафина уйлап тапты. Без Казан мәдәният һәм сәнгать университетында укучы кызлар идек ул вакытта.
— 10 ел буе иҗат итү дәверендә йомгаклар нәтиҗәләрегез бармы?
— Без күп кенә бөтенроссия һәм халыкара җыр конкурс-фестивальләре лауреатлары булып торабыз. 10 ел буена тамашачы яратып өлгергән җырларыбыз да, клипларыбыз да бар.
— Юбилей уңаеннан шаулатып концерт уздырырга теләк бармы?
— Әлбәттә, андый теләк бар, без шат кына булыр идек, ләкин, беренчедән, бүгенге көндә танылган артистлар да һәрвакыт тулы заллар җыя алмый, икенчедән, бүгенге көндә Эльвирабыз Түбән Камада театрда хезмәт куя, Олеся яңа гына икенче тапкыр әни булды. Шуңа да ныклап алынып концерт куярлык мөмкинлек тумый.
— Күпчелек артистлар ретро, халык җырларына өстенлек бирә. Сез репертуарны ничек сайлыйсыз?
— Без төрле жанрда җырлыйбыз. Репертуарыбызда халык җырлары белән беррәттән эстрада җырлары да бар. Төрле тамашачыга төрле юнәлеш ошый бит.
— Бертөрле күлмәкләр тектерү чыгымлымы? Һәрберегезгә дә бер үк күлмәк ошап бетәме?
— Һәрберебез үзенә ошаган һәм үзенә килешкән фасонны сайлый. Нәтиҗәдә һәрвакыт матур һәм без теләгәнчә килеп чыга. Һәрбер артистка да сәхнәгә чыгарга костюм кирәк ич, безнең дә тамашачыларны гүзәл һәм зәвыклы күлмәкләр белән сөендерәсебез килә.
— Төркемнән кала аерым иҗат итәсезме?
— Әйе, һәрберебез дә аерым иҗат итә, ләкин бу төркем таркалды дигән сүз түгел. Без аерым да, бергә дә чыгышлар ясыйбыз.
— Күп төркемнәр эстрадада озак еллар иҗат иткәч, төрле сәбәпләр аркасында йә таркалырга мәҗбүр булалар, йә катнашучыларын алыштыралар. Сезнең төркемдә мондый кискен хәлләр туганы булмадымы?
— Безнең катнашучылар составы үзгәрде, чөнки университетны тәмаулауга өч кызыбыз китте. Без икебез, ягъни Алсу һәм Олеся гына калдык. Аннары төркемгә Эльвира килде. Ул безнең Олесяның сеңлесе. Бүгенге көндә шулай өчебез иҗат итәбез.
— Төркем булганда җитәкчесез булмыйдыр. Продюсерыгыз кем?
— Берничә ел дәвамында безнең җитәкчебез булып Элеонора Калашникова торды. Безгә ярдәм итеп торганы өчен аерым рәхмәтләр. Ул чыннан да безнең өчен бик күп эшләр башкарган кеше. Ә менә продюсерыбыз юк.
Фотолар шәхси архивтан алынды.
Гөлшат МИНГАЗИЗОВА
Gong-TV
№ --- | 11.12.2016