Чаллы бассейнында бала үлемендә гаепле дип шикләнелгән кешеләр тоткарланган

Чаллы шәһәрендә “Афина” спорт-күңел ачу үзәге бассейнында 11 яшьлек үлемендә гаепле дип шикләнелгән хезмәткәрләр кулга алынган. Болар – үзәкнең 34 яшьлек администраторы Олеся Шадрина һәм бассейн директорының бизнес үсеше буенча урынбасары 53 яшьлек Наталья Мавренкова.

Шул рәвешле, Россия Тикшерү комитетының Татарстан буенча тикшерү органнары тарафыннан РФ Җинаять кодексының 238 нче маддәсе 2 нче часте (куркынычсызлык таләпләренә җавап бирмәгән хезмәт күрсәтеп, саксызлык аркасында үлемгә китерү) буенча җинаять эшен тикшерү дәвам иттерелә.

Искәртеп узыйк: 2016 елның 19 нчы ноябрендә 11 яшьлек бала үзенә яшьтәш иптәш кызы белән бассейнга килә. Күпмедер вакыттан дусты кызның югалуын абайлап, бу хакта инструкторга хәбәр итә. Тикшерү версиясе буенча, фаҗига җаваплы затның балигъ булмаган баланы бассейнда караучысыз калдырганы аркасында килеп чыга. Бассейн тирәнлеге 3,5 м тәшкил итә.

Кулга алынган ханымнарның икесе дә җинаять кылуга катнашы булуын тулысынча таныган. Фаҗиганең барлык сәбәпләрен ачыклауга юнәлдерелгән чаралар комплексы үткәрелә. Җинаять эшен тикшерү дәвам итә, дип хәбәр итә Россия ТКның Татарстан буенча идарәсе җитәкчесенең өлкән ярдәмчесе.

Язган идек: Татарстанда бала бассейнда батып үлгән