Татарстанда елгага пычрак сулар агызу факты буенча тикшерү бара

Казанда Нокса елгасына пычрак сулар агызу факты буенча административ тикшерү башланды. Бу хакта «Татар-информ» га ТР Экология һәм табигый байлыклар министрлыгының территориаль үзәк идарәсе җитәкчесе урынбасары Алмаз Исмәгыйлов җиткерде.

«Глушко урамындагы 2нче йорт һәм Нокса елгасы арасында урманлакта Большие Клыки бистәсенә якын урында канализация коесыннан агызылган су җыелган урын билгеле булды. Әлеге су Нокса елгасына агып төшә. Пычрак су 3600 квадрат метр мәйданны били», – дип аңлатты экология инспекторы.

Мәгълүм булганча, 17 ноябрьдә, Большие Клыки бистәсендә яшәүчеләр пычрак судан интегүләрен хәбәр иткәннәр иде.

Әлеге хәлне күрүчеләр канализация сулары урманның бер өлешен, җәяүлеләр юлын, бистә кырыен басып алып, Нокса елгасына агып төшүе турында җиткерделәр.

Урынга барып, экология хезмәткәрләре химик анализ өчен үрнәкләр алдылар. Аларның нәтиҗәләре турында атна ахырында белеп булачак.

Хәзерге вакытта биредә “Водоканал” хезмәткәрләре эшли, алар су агуны туктату эшләре белән мәшгуль. Бүген бу эшләр төгәлләнмәскә дә мөмкин, дип белдерде Алмаз Исмәгыйлов.