Башкортстанның Кырмыскалы районында почтальонны үтерүчеләрне тотканнар

Башкортстанда Кырмыскалы районында 48 яшьлек почта хезмәткәренә һөҗүм итүчеләрне тоткарлаганнар. Бу хакта "Башинформ" хәбәр итә. Тикшерү һәм оператив-эзләү чаралары нәтиҗәсендә җинаятьчеләрнең эзләренә төшкәннәр һәм шәхесләрен ачыклаганнар. Җинаятьне 48 яшьлек Авыргазы һәм 27 яшьлек Гафури районнары кешеләре кылган.

Алар җинаятьләре өчен үкенүләрен белдергәннәр. Урланган акчаларның бер өлеше алынган. Кулга алынучылар «Талау» һәм «Үтерү» маддәләре буенча гаепләнә. Алар сак астына алынган.

Тикшерү фаразлавы буенча, 20 август иртәсендә почтальон Кырмыскалы районының Ибраһим авылына пенсия таратырга чыккан, анда инде аны әлеге ир-атлар сагалап торган. Бер йорт янында 27 яшьлек ир-ат почта хезмәткәренә һөҗүм ясаган: берничә тапкыр столяр чүкече белән башына суккан һәм 900 мең сум пенсия акчасы булган сумкасын алган. Җинаятьчеләр урыннан автомобильгә утырып качканнар.

Хәзерге вакытта җинаятьнең барлык фактларын да ачыклау эшләре бара, тикшерү дәвам итә, - дип хәбәр итә республика тикшерү комитеты.