|
|
Бүген кемнәр туган
|
|
Архив
|
18.09.2016 Юмор
Ничек миллиардерга кияүгә чыгарга?(УЙЛАНУ+КӨЛКЕ)Бүген иртән миллардерга кияүгә чыгу инструкциясен (!) таптым. Интернет киңлекләрендә "йөзгәндә", "Титаник" айсбергка төртелгән кебек килеп чыкты ул. Районыбызда кияүгә чыкмаган кызлар күп бит, Сезгә дә әлеге "алтын" бәһасенә тиң инструкцияне тәкъдим итәм. Сезгә нинди сыйфатларга ия булу кирәк: Гел үзгәрештә торучан Белем алырга омтылучан
ИНСТРУКЦИЯ: (белмим, әлеге киңәшләрне ник шулай атаганнардыр, күрәсең, бик яхшы эшләгәнгәдер)
1. Сез миллардерга кияүгә бары тик тормышка реаль күзлектән карасагыз гына чыга алачаксыз. Дөрес аңлагыз: әгәр Сезнең буй озынлыгы мактанырлык булмаса, фигурагыз да нәфислеге белән аерылмаса, юмор хисегез белән мактана алмасагыз, белем дәрәҗәсе мәктәпнекеннән дә түбән булса, тизрәк бу кимчелекләрне төзәтергә кирәк.
УЙЛАНУ:Миллиардер хатыннарының буй-сын, акыл дәрәҗәсе турындагы законнар җыелмасы кайчан чыкты икән, әллә без белми калдыкмы? Табигать бирән матурлыкны юк итеп кенә, бәхетле булу мөмкинме? Аптыраган. Шушы урында мин, кайгыдан, батонны урталай ярып, кетчуп агызып, колбасалы бутерброд ясарга уйладым. Беткән баш беткән.
2. Миллардерга кияүгә чыгарга 10-15 ел гына вакытыгыз бар, чөнки Сезнең тышкы кыяфәтне вакыт аямый. Иң чибәр вакытыгызда чыгып калу уңайлы.
УЙЛАНУ:Башны кашымый булмый әле монда. Үзеңнең иң матур һәм чибәр чагыңны нинди теорема белән исәпләргә ул, ә? Пифагор туры килми, ә башкасы белән дуслык көчле түгел. Туктале, мин бит күп белергә тиеш.
3. Миллиардерны яшь чактаракэләктерү җаен кара. Әгәр Сез үз яшегездәге перспективалы егет белән ул кечкенә чактан таныш икән, шанслар бермә-бер арта. Икенче ысул, бай ир ясарга мөмкин егет табып, кияүгә чыккач аны «кеше» итәргә.
УЙЛАНУ: Ә егетнең киләчәктә миллиардер буласын ничек белеп була? Уф, онытып торам, формула-теоремалар күп бит, мин аларны белергә тиеш. Мәсәлән, берәр трактор йөртүчегә кияүгә чыктың, ди. Аннан трактор магнаты ясап була икән… Тәәәәк, район трактористларын барлар вакыт.
4. Аның белән байлык, акча турында сөйләшмәгез. Шулай ук һәркемгә дә билгеле булган фактларны «Америка ачу»га бормагыз. Бу сезнең файдага эшләми.
УЙЛАНУ: Кыскасы, аның янында әз сөйләшегез, еш елмаягыз. Бәлкем ул Сезне аз сөйләшүчә дип уйлар, ә бәлкем юләр диеп диагноз куяр.
5. Хыялыгыздагы миллардер яныгызда булганда, эчәргә һәм тартырга, наркотиклар кулланырга, сүгенергә ярамый. шулай ук үзегезне җилбәзәк кебек тотмагыз, агрессия күрсәтмәгез.Элегант һәм сабыр күренегез. Сезнең бит сөяркә генә буласы килми, шулаймы?
УЙЛАНУ: Әллә минем баш мие дөрес аңламый, әллә Сез «хыялыгыздагы» миллиардер янында булмаганда исерек, наркотик кулланган һәм җилбәзәк булсагыз, бу — нормаль күренешме икән? Никтер бу хакта ләм-мим. Сүгенмичә түзеп кара менә шундый киңәшләрдән соң.
6. Миллиардерга кияүгә чыкканчы, байларның яшәү рәвешен өйрәнегез. Алар ешрак теннис уйный, гольф белән мавыга, атта йөри. Ашау, шәраб, музыка, сәнгать хакында күбрәк укыгыз, шәрабны аерырга өйрәнегез. Алар бу хакта еш сөйләшә. Географияне белү, сәяхәт ярату да комачау итмәс.
УЙЛАНУ: Аллоооо, мин — эчмим, шәрабны ничек аерыйм? Ә тәмен? Аны эчмичә генә шәпме, юкмы икәнен кайдан белим?
7. Очрашу урыннарын эзләгез һәм барын алдан планлаштырыгыз. Һәрвакыт АНЫ очратырга әзер булыгыз.
УЙЛАНУ: МИН ӘЗЕР, ӘЗЕР, ӘЗЕР… Бутербродны гына ашап бетерим һәм туйганчы бер сүгенеп калыйм. Кыска итәкләрне аннан ягармын.
Менә шундый киңәшләр Сезгә, кияүсез кызлар!
Чыганак: baltasi.ru.
--- |
Иң күп укылган
|