“Песием генә тук булсын”

Русиядә халыкның яртысы өендә җәнлекләр тота икән һәм аларны асрауга елына барлыгы 1 триллион сум чамасы акча сарыф итә. Исәпләүләр күрсәткәнчә, бер җәнлеккә аена уртача 4,5 мең сум акча тотыла, имеш. Эт-мәче ише җәнлекләр яратучылар нигездә зур шәһәрләрдә яшиләр (57 проценты), ә иң киң таралган җан иясе – мәче: алар сораштыруда катнашучыларның 26 процентының өендә гомер кичерә.

Песиләрдән соң популярлык буенча, әлбәттә инде, этләр китә: дүрт аяклы дусларны русиялеләрнең 21 проценты асрый. Аквариум балыклары халыкның – 3, әрлән ише йорт күселәре, кенәри һәм тутый кошлар 2 процентында бар.

Йортта җәнлекләр асрау шактый кыйммәтле эш – аларны ашату, йоннарын кистерү-кыркыту, ветеринарга алып бару, уенчыклар, җамаяклар алу, үзең берәр җиргә киткәндә махсус кунакханәгә илтеп тору зур суммалар таләп итә. Өстәвенә, кризис чорында, ягъни соңгы ике-өч елда бу товарлар һәм хезмәтләр бәясе 30 процентка кыйммәтләнгән. Әмма сораштыруда катнашканнар барысы да үземнең тамагымны кыссам кысам, ләкин эт-мәчемә акчаны кызганмыйм дип җавап биргән.

Халыкның бигрәк тә мәчеләргә мөкиббән китүенең популярлык сәбәбен социологлар шәһәр фатирында эт асрауга караганда песи тоту уңайлырак булу һәм мырауҗаннар асрау чагыштырмача арзанга төшү белән бәйләп аңлаталар.