"Бу авыру турында бөтенләй онытып яшисем килә!”

Эльвирага ярдәм итү өчен “Ватаным Татарстан” газетасы татар эстрадасы җырчылары белән берлектә “Йөрәктән–йөрәккә” дигән хәйрия концерты оештырган иде. Алар әле дә Эльвираның хәлен белешеп тора. Концертка килгән тамашачылар да шалтыратып Теләче кызының язмышы белән кызыксына. Үзебез дә Эльвира  һәм аның туганнары, авылдашлары белән элемтәдә торабыз.

 

Биш ай дәвамында Эль­ви­раның янәшәсендә ире Дамир белән сеңлесе Гөлнирә булды. “Бик авыр көннәр кичердек. Башыма төрле уйлар килде. Бу авыруга каршы көрәшүдән арган вакытлар булды. Химия терапиясен авыр кичердем. Нык ябыктым, ашау үтмәде, чәчләрем, кашларым коелды. Көзгегә дә карамый идем. Менә шул чакта ирем булышты. Мин кияүгә чыкканда аның шундый кешелекле, ярдәмчел, сабыр икәнен бел­мәгән дә икәнмен. Бу авыру безне тагын да якынайтты. Мин аның үземә никадәр якын, кадерле икәнен аңладым. Ул минем нинди генә көйсез чакларымда да янәшәмдә булды. Авырганда ипләп кенә сыйпап торды. Ничек алай булдыра алгандыр?” – дип сөйли Эльвира.

 

Дамир Эльвираның хәлен мәхәббәт белән дә җиңе­ләй­тер­мен дигән иде. Димәк, сүзендә торган. Хатынына ныклы терәк була алган. Авыруга бер җылы сүз, назлы караш та җитә! Ә сеңлесе Гөлнирә Эльвирага икенче тапкыр туарга ярдәм итте дисәк тә була. Эльвирага сең­лесенең сөяк миен күчереп утырттылар. “Сеңлемә чиксез рәхмәтлемен. Әгәр ул булмаса, нишләр идем соң мин?”– ди Эльвира.

 

Сөяк миен күчереп утыртканнан соң Эльвираның хәле нык авырлаша. Табиблар да бик сак булырга куша. Менә шул чакта Эльвирага бик көчле химия бирәләр. Хәле авыр була. Бернинди ризык та ашый алмый. “Ирем белән сеңлем көч бирде. Дамир һәр иртә ашарга пешереп алып килә иде. Шуны көчләп диярлек ашата. Бары тик шуннан соң гына кан күрсәткечләрем яхшырды. Яшәү теләге артты. Урамга чыга башладым. Инде хәзер тизрәк өйгә кайтасым килә. Тик әлегә көндезге бүлектә дәва­ланам. Атнага бер тапкыр анализ тапшырам, – ди Эльвира. – Озакламый тагын бер анализ тапшырасым бар. Әгәр  бар да әйбәт була икән, өйгә кайтачакмын.  Ә анда газиз балам көтә. Кызым Әлмирәне ничек сагынганымны үзем генә беләм. Бик авырган вакытларымда да уемнан кит­мәде. Сабыем хакына яшәргә кирәк! Үземне әнә шулай өмет­ләндердем. Кызымны тәр­бияләп торган әти-әни­ләремә, авылдагы сеңлем Чулпанга, апаларыма, абыйларыма рәх­мәтемне җит­керәм. Авырый башлагач, иң яхшы туганнар, дуслар бездә икәненә ышандым. Хәтта бер белмәгән кешеләр дә ярдәм итеп торды. Газета аша барлык ке­шеләргә, Теләче районы ха­кимиятенә, “Ватаным Татарстан” газетасы коллективына, барлык җыр­чыларга чиксез рәхмәтемне белдерәм. Әлегә дәваланып беттем, яман чирне җиңдем, дип әйтә алмыйм. Биш ел дәвамында гел табибларга кү­ренеп торасы. Аллага тапшырган инде. Һәр­вакыт догада булдым. Хәзер инде бу авыру турында бөтенләй онытып яшисем килә!”

 

Эльвира кебек авырудан интегүчеләргә дәвалану өчен елына күп дигәндә ике мәртәбә квота бирелә. Борһановлар гаи­ләсе алга таба үз акчасына дә­валанырга тиеш булачак. Шуңа алар исәп-хисап счетын япмый тора.

 

 

Сбербанк картасы

Бурганова Эльвира Гильфановна 

6761 9600 0378 646021

4230 7810 5622 1627 2900

Сбербанк картасы

Бурганов Дамир Нафельевич

5469 6200 1826 1014