12.07.2016 Шоу-бизнес
Бер төркем артистлар Кыерлы Сабантуенда катнашканнар (ФОТО)
Сабан туйлары дәвам итә: узган атнада Мамадыш районының Югары Кыерлы авылында да милли бәйрәмебез гөрләп узды. Татарстанның атказанган артисты Илнар Сәйфиев чакыруы буенча килгән бер төркем артистлар бәйрәмгә җыелган халык алдында зур тамаша оештырдылар.
Сабан туен ел да Фәнил Вакказов алып бара, "Сәйдәш" бию төркеме чыгыш ясый. Илнар Сәйфиев тә бәйрәмгә ел саен төрле артистларны чакыра. Әйтик, быел авыл халкы Айгөл Рәхимова, Гөлназ Сираева, баянчы Булат Шәрипов, Эльмира Сөләйманова һәм Ленар Сәйфиевны күрә алды. Intertat.ru хәбәрчесе исә бу җырчыларның җәйге яллары турында кызыксынып алды.
Айгөл Рәхимова: Әлегә ял итәргә бармадым, Сабан туйларында катнашып йөрим. Сентябрь аенда дус кызларым белән чит илгә диңгез буена барырга уйлап торам.
Гөлназ Сираева: Ял көннәрендә генә Соль-Илецк якларына барып кайттым. Ә якын арада Кытайның Хайнань утравына барырга телим. Ялы туры килсә, ирем белән барачакмын, Алла теләсә.
Булат Шәрипов: Улыбыз Әмиргә 1 яшь тула. Кечкенә булгач, җылы якка бару турында уйлаган юк. Үсә төшкәч, һичшиксез барачакбыз, Алла боерса.
Эльмира Сөләйманова: Чит илгә үк бармабыз, Россиядә дә җылы яклар, диңгез буе бар. Тиздән гаилә белән ял итәргә барырга җыенабыз. Ә күптән түгел Казан аквапаркында рәхәтләнеп ял итеп кайттык. Июнь аенда улыбыз Артемга 2 яшь тулды.
Ленар Сәйфиев: Җәй узып бара, ә минем әле ял итәргә барганым юк. Якын киләчәктә дуслар белән җыелып чит илгә барып кайтырга планлаштырабыз.
Кашыкка йомырка салып йөгерү, капчык киеп йөгерү, гер күтәрү, кул көрәштерү, баганага менү кебек традицион ярышлар белән бергә тоннель аша чыгу, себерке бәйләү, йон эрләү, тау башына менү, кеше утыртып боз чана (ледянка) тарту кебек ярышлар да оештырылды. Биредә ачык күңелле кешеләр яши, барысы да уеннарда теләп катнаша. Үзешчән җырчыларның күп булуы сөендерде. Хәтта балалар да су буе чиратка тезелеп, җырларга яки биергә теләвен белдерде. Шуны да әйтергә кирәк, уен-ярышларда җиңүче, катнашучыларның барысына да кыйммәтле бүләкләр тапшырдылар.
Һәр Сабантуйның күрке – милли көрәш, әлбәттә. Сабантуйда танылган көрәшче, Теләче егете Раил Нургалиев абсолют батыр калды. Аңа тәкә белән затлы мотоцикл тапшырылды. Авыл батыры итеп исә Айнур Мөхәммәдиев танылды.