Кыйный, димәк, ярата?

Бүген үз йортында хатынын, балаларын җәберләп яшәүчеләр­гә җәза юк диярлек. Җәнҗал­чы­ларны “вак хулиганлык” маддәсе буенча гына җаваплылыкка тартырга мөм­киннәр. Әле монысын да дә­лилләп күрсәтергә кирәк. Барыбер очына чыгып булмаячагын аңла­гангамы, мескен хатын-кыз­ларның күбесе өйдәге гауга турында кычкырып сөйләми. Хәер, болай эшләү килешми дә кебек. Әнә әти-әниләр кызларын кияүгә биргәндә, барган җиреңдә таш булып ят, дип өйрәтәләр бит. Бала хакына кат-кат гафу итүчеләр дә җитәрлек.

 

Яңа закон проекты исә өйдәге тынычлыкны бозучыларны күздә тотып эшләнгән. Аның авторы Дәүләт Думасы депутаты Дмитрий Носов сүзләренә караганда, “сугыш чукмары”ның якыннарын имгәт­кәнен, аннан да куркынычрак, үтергәнен көтеп ятып булмый бит инде. Андый очраклар да юк түгел. Тавыш куптаручыга 1 меңнән 5 мең сумга кадәр штраф һәм 50 сәгать мәҗбүри эш белән янаганнар. Өйдә бала барында “буран” чыкса, штраф күләме 3,5 мең сумга, ә мәҗбүри эш вакыты 70 сәгатькә кадәр җитә. Икенче тапкыр шул ук тырмага басучыларга кесәдән дүрт мең сум акча чыгарып бирергә туры киләчәк. Моңа өстәп, 150 сәгать көрәк-тырма күтәреп йөрисе дә була.

 

“Штраф гаилә бюджетына суга, шуңа күрә гауга чыгаручыларны мәҗбүри эш белән тәрбияләргә кирәк”, – дигән түрәләр. Акылга утырту чаралары арасында урам себерү, тирә-юньне җыештыру, койма буяуны атаганнар. Көрәк-себеркене эштән буш вакытта кулга алырга туры киләчәк. Файдалы да, тынычландыра да!

 

Законга үзгәрешләр кертелгән очракта, полиция хезмәткәрләре “су­гыш чукмары” турында туры­дан-туры прокуратурага хәбәр итә алачак. Ә аннары судка чакырганнарын көт тә тор! Шунысын да әйтергә кирәк: хатынына кул күтә­рүче ирләргә кырысрак җәза бир­дерү тәкъдиме элегрәк тә әйтелде. Тик алар тиешле яклау тапмады.

 

Рәсми мәгълүматларга караганда, Россиядә ел саен өйдә тавыш чыгып, ирләре кулыннан меңләгән хатын-кызның гомере өзелә, 14 яше тулмаган ике миллионга кадәр бала өлкәннәр тарафыннан кыерсытыла. Хокук саклау оешмалары хәбәр итүенчә, ел дәвамында 50 меңгә кадәр малай-кыз әти-әнисенең кыланмышларына чыдый алмыйча, өйдән чыгып кача. Йөк урыныннан кузгалырмы, монысын вакыт күрсәтер.

 

 

– Җәза сүзе бик шикләндерә мине. Штраф түлиме ул, иҗ­ти­магый эшләрдә катнашамы, ахыр чиктә тавыш куптаручы ир-ат барыбер гаиләсе янына әйләнеп кайтачак бит. Ә өйдә шул ук хатын көтә. Җәнҗалчы кабат якыннарына кул күтәрмәс дип беркем дә ышандырып әйтә алмый. Ире тарафыннан мәсхәрәләнеп яшәүче хатын-кызлар һичшиксез яклауга мохтаҗ. Ике арадагы мөнәсә­бәт­ләрне судка кадәр җиткерү, ай-һай, җиңел түгел. Әниләр еш кына балаларының киләчәге турында борчыла. Ялгыз калса, ул-кызын аякка бастыра алырмы? Фатир яки машинага алган кредитны кем түләр? Шунлыктан хатын-кыз­лар­ның күбесе дәшми калу ягын артык күрә. Җәза уйлап баш ватканчы, профилактика чаралары турында онытмасыннар иде. Бәлки, сөйләшү, кисәтү белән генә чик­ләнергәдер. Башына акыл керәсе булса, кешегә бер тапкыр гаебен күрсәтү дә җитә. Ә таш диварга борчак атудан ни файда? Үз башыңа китереп чиртергә дә бик мөмкин.

 

 

– Гаилә булгач, савыт-саба шалтырамый тормый анысы. Гаеп атта да, тәртәдә дә булырга мөмкин. Ир һәм хатын еш кына бүген сугыша, ә иртәгә дуслаша бит ул. Шуңа күрә гаилә эшенә тыкшыну бик үк дөрес түгел дип саныйм. Хатын-кызлар арасында да үзләрен ямьсез тотучылар җитәрлек. Дус кызлары белән очрашуга китеп, төн уртасында исерек хәлдә кайтып кергән хатынны кочак җәеп каршы алыргамы инде хәзер? Аннары хатын-кызлар арасында да ирләренә кул күтәрүчеләр юк түгел.