|
|
Бүген кемнәр туган
|
|
Архив
|
29.04.2016 Җәмгыять
Бәйрәмдә ни эшләргә җыенасыз?Май җитте – яллар башланды. Халык алдагы бәйрәмнәрне көтеп ала. Ни дисәң дә бакчада казынырга, тирә-якны тәртипкә китерергә менә дигән мөмкинлек! Табигатькә чыгу, шашлык кыздырулар китә. Бу инде – гадәткә кергән күренеш. Әмма сак булырга кирәк, чөнки Татарстанда янгынга каршы махсус режим игълан ителде. Ә сез май бәйрәмнәрен ничек уздырырга җыенасыз? Марат РӘХМӘТУЛЛИН, Татарстан Гадәттән тыш хәлләр министрлыгының матбугат хезмәте вәкиле:
– Башкалар ял иткәндә, без эшлибез. Киресенчә, барлык хезмәтләрнең эше көчәйтелә. Без бу көннәрдә кизү торачакбыз. Тәҗрибә шуны күрсәтә: май ялларында янгын сүндерүчеләргә мөрәҗәгать итүчеләр арта. Шуңа безгә ял юк. Май бәйрәмнәре җитүгә, безнең халык табигатькә чыга, бакча-йортларында шашлык пешерә башлый. Берсен дә тыеп булмый. Әмма без тагын бер кат кисәтәбез. Бакчагызда ит кыздырасыз икән, мангал кулланырга кирәк! Учак яндырганда йорт, корылмалардан кимендә 5 метр ераклыкта булырга тиеш. Итне кыздырыгыз, рәхим итегез! Әмма безнең халык ял иткәндә салгаларга ярата. Спиртлы эчемлекләрдән тыелырга киңәш итәбез. Бәла-казалар шул исерек баштан килеп чыга да. Аннары тирә-якта – коры үлән, бер очкыннан янгын чыгарга мөмкин. Ял иткәндә, шашлык пешергәндә тәмәке тартмаска киңәш итәбез.
Фарсель ЗЫЯТДИНОВ, танылган бакчачы:
– Мин кайда ял итим ди инде?! Әлбәттә, бакчада! Буш вакыт чыкты исә, мин шунда. Көннән-көн эшләр күбәя, әмма хәзерге вакытта җирдәге дымны туплап, аны саклап калу эшен башкару мөһим. Бу эш башкарылган булса, җирне казырга да мөмкин. Май бәйрәмнәре – бакчадагы җиләк-җимеш агачларының ботакларын ялгау өчен менә дигән вакыт. Алмагач, груша агачлары бар икән, бу эшне башкарып чыгарга тәкъдим итәм. Кем ничек тели, шулай эшли, ысуллары төрле. Аны ботактан да, бөредән дә ялгап була. Җиләк-җимеш агачлары төпләрен йомшартырга кирәк. Җиргә ашлама кертү дә файдалы. 1 квадрат метр мәйданга 4-5 кг ашлама кертелсә, җир туеначак. Компост та, торф та, минераль ашламалар да ярый. Бөреләнмәгән агачлар булса, аларны мочевина белән эшкәртергә кирәк. Мәшәкать күп, эшләргә генә өлгер!
Зөлфәт ЗИННУРОВ, “Яңа Гасыр” каналында “Башваткыч” тапшыруын алып баручы:
– Авылга күкәй җыярга кайтам, Алла боерса! Бездә шундый йола бар: 1 Майда таң белән балалар, җыелышып, өйдән өйгә йөреп, йомырка җыя. Өйгә керәләр дә: “Исәнме, түтәй, бир бер күкәй! Бирсәң бер күкәй, тавыгың салыр мең күкәй!” – дип әйтәләр. Хуҗалар төрле төскә буялган йомыркаларны һәрбер балага өләшеп чыга. Матур үзенчәлекле төстә булса, затлы йомырка дип санала. Андые эләгә икән, башкалар кызыгып үлә! Хәзер йомырка белән бергә тәм-том да тараталар. Балалар өйләренә зур капчыкны көчкә өстерәп кайтып керә. Узган ел кызым да кайтты, катнашты. Быел да шуны көтәбез. Май бәйрәмендә туган нигездә булабыз, Алла боерса!
Хәния ФӘРХИ, җырчы:
– Урал яклары, Оренбург далаларында гастрольләр май башында тәмамлана. Без шуннан соң туган якларга – Башкортстанга кайтачакбыз. Туганнарымның бәйрәмнәре. Әни янында бераз торырмын, аларга ярдәм итеп килермен дигән ният бар. Аннары Казанга кайтам, бакча эшләре күп. Без Габделхәй белән җирдә казынырга яратабыз. Бакчада зур теплицабыз бар, барысын да үстерәбез. Сатып алган бер яшелчә дә юк. Кишерен дә утыртырга кирәк, чөгендерен дә. Помидор, кыяр үсентеләре дә матур утыра. Балалар белән табигатькә дә чыгабыз, май бәйрәмнәренә кияүнең туган көне туры килә.
--- |
Иң күп укылган
|