Гүзәл Уразова һәм Илдар Хәкимов дүртенче бала алып кайтырга җыена?

Татарстанның атказанган артисты Гүзәл Уразова һәм "Гүзәл-Илдар" җыр театры директоры Илдар Хәкимов 1 июнь - Халыкара балаларны яклау көне уңаеннан Казанның "Уникс" концертлар залында кабат "Улым" программасын тәкъдим итәчәк. Артистлар юкка гына 1 июнь көнен сайламаган: бу көнне алар чын балалар бәйрәме уздырырга җыена.

- "Улым" дип исемләнгән театральләштерелгән программагызны халык яратты, кая гына барсагыз да, тамаша аншлаг белән уза. Бүгенге көнгә ничә концерт куйдыгыз, Гүзәл?

- Программаны сентябрь аеннан куя башладык. Бик күп төбәкләрдә өстәмә концертлар булды. Хәтта Себергә дә ике тапкыр барып концерт куеп кайттык. Туган якларны әйтмим дә инде, Уфада гына да 5 концерт тәкъдим ителде. Казанда тамашачылар соравы буенча алтынчы тамашабыз көтелә. Бүгенге көнгә 200ләп концерт куйдык. Программаны, чыннан да, яратып кабул итәләр. Авылларга да чакыралар, шуңа күрә дәвамы булмый калмас дип уйлыйм.

- Гүзәл, дүртенче бәби алып кайтырга җыенуыгыз турында имеш-мимешләр күбәйде. Бу хакта ни диярсең?

- Бу сүзләр үземә дә килеп иреште һәм каян килеп чыкканын чамалыйм. "Улым" концертында Илдар тагын бер бәби теләвен белдерә. Әлбәттә, Ходай Тәгалә ни кушкан, шул булыр. Балаларымны бик яратам!

- Өч бала әнисенең үзен ничек формада тотуы белән күпләр кызыксына. Махсус диеталар тотасыңмы?

- Бездәге кебек яшәү рәвеше белән диета тоту мөмкин түгел, чөнки гастрольләрдә туклану режимын алып бару бик авыр. Гел хәрәкәттә булуыбыз үзебезне формада тотарга ярдәм итәдер. Быелгы программада бигрәк тә күп хәрәкәтләнергә туры килде, алып баручы да үзебез, өстәвенә биибез дә.