Татарстанда хатынын кыйнап үтергән хыянәтче хөкем ителде

Татарстанның Питрәч районы Ленино-Кокушкино авылында яшәүче 60 яшьлек Марат Билаловка карата хөкем карары чыгарылды. Ул РФ Җинаять кодексының 11нче маддәсенең 4нче өлешендә каралган җинаять кылуда (“Сәламәтлеккә күрәләтә авыр зыян салып, саксызлык нәтиҗәсендә, кеше үлеменә китерү”) гаепле дип табылды.

Бу хакта Россия Тикшерү комитетының ТР буенча Тикшерү идарәсе матбугат хезмәте хәбәр итә.

Шунысы ачыкланган: былтыр 28 июльдән 29ына каршы төндә Билалов һәм аның хатыны арасында низаг чыга. Хатыны иренә, үзе өйдә була торып та сөяркәсен алып кайтуы һәм аның белән бергә яшәве уңаеннан, ризасызлык белдерә. Моңа җавап итеп, ир куллары һәм аяклары белән кимендә 25 тапкыр хатынына суга, тибә. Нәтиҗәдә, соңгысы шунда ук һәлак була. Икенче көнгә Билалов фельдшерларны чакыртып, алардан хатын-кызның йөрәк өянәгеннән үлүе турында нәтиҗә чыгарырга күндермәкче була.

Җинаять эшен тикшерү барышында ир-ат хатынының баскычтан егылып төшүе турында әйтә, соңрак – йортларын һөҗүм итеп талаулары хакында. Билалов гаебен танымаса да, тикшерү тарафыннан аның җинаятькә катнашы булуын күрсәтә торган дәлилләр җитәрлек күләмдә тупланган. Шул исәптән суд-медицина, вазгыяти экспертиза нәтиҗәләре. Алар хатын-кыз тәнендәге җәрәхәтләрне, имгәнүләрне баскычтан егылып төшү нәтиҗәсендә алмавын раслаган.

Суд карары нигезендә Билалов 7 елга катгый режимлы колониягә хөкем ителгән.