Казанда Вәсилә Фәттахованы искә алдылар

Беренче коймак төерле була. Әмма яхшы гамәл төерне юкка чыгарырга сәләтле икән. Сүзебез TMTV каналының беренче музыкаль телевизион премиясе турында. Ялт-йолт ялтыраган чарада Вәсилә Фәттахованы да искә алдылар һәм “Ашыгасың” клибын күрсәткәннән соң премия тапшырылуы турында игълан иттеләр.

Бу чараны күпләр “Золотой граммофон”, “Муз-ТВ”, “RU.TV” кебек музыкаль чаралар белән чагыштырды. Җырчыларның кайбер­ләре әлеге фикер белән килеште. Татарстанның халык артис­ты Эльмира Кәли­мул­лина да бу чараны рус эс­тра­да­сындагы тантаналар бе­лән чагыштырды, бу начар тү­гел, диде ул. Аның фи­ке­ренчә, премияләр бер-бер­сенә охшарга мөм­кин, чөн­ки максатлар бер үк төрле.

Төп оештыручыларның берсе – “TMTV” каналы режиссеры Лилия Кадыйрова: “Без, чыннан да, велосипед уйлап тапмадык, бу – дөнья­күләм үткәрелә торган чара. Ләкин безнең премия татарлыгы белән аерылып тора”, – диде.
Татар эстрадасы җыр­чылары чын мәгънәсендә ярышка әзерләнгән иде. Бу җырларның театраль тамашаны хәтерләтүендә дә, киемнәрдә дә чагылды. Ул күзне камаштырырлык кос­тюмнар, күлмәкләр. Ландыш Нигъмәтҗанова әллә биш, әллә алты тапкыр кием алмаштырды, саный торгач, исәбе югалды. Әле классик костюмнан, әле сыланып торган елык-елык костюмнан, әле күлмәктән пәйда булды ул. Бер чыгышында хәтта елан белән килеп чыкты.

Нишлисең инде, сәхнәгә чыккач, тамашачыны ничек булса да үзеңә каратырга кирәк. Рәсим Низамов та шулай ди. Аныңча, сәхнәне изге урын санаганнар, элек-электән үзләрен тыйнак тотканнар, бу киемдә дә, репертуарда да, үз-үзеңне тотышта да чагылган. “Ә бит җырчы киеме белән түгел, иҗаты белән алдырырга тиеш”, – дигән нәтиҗә ясады ул.