Киек каз юлыннан китеп барды (Марс Макаровны искә алып)

Виртуоз баянчы һәм композитор Марс Макаров 78 нче яшендә бакыйлыкка күчте. Татар көенең асылын тирән аңлап, ягъни аны халык бәгыренә үтәрлек итеп уйнаучы баянчылар бармак белән генә санарлык. Марс Макаров әнә шундый оста баянчыларның берсе иде.

Татар дәүләт җыр һәм бию ансамблендә, соңрак филармониядә музыкант булып эшләгәндә ул татар моңын халыкка җиткерү буенча биниһая зур хезмәт куйды.

Ә аның шагыйрьләребез сүзләренә язылган моңлы көйләре... Хәсән Туфан белән бергәләп иҗат иткән «Киек казлар» җыры менә ярты гасырга якын дөнья гизә һәм туган җирләрен калдырып читтә яшәргә мәҗбүр булган милләттәшләребезнең үзәкләрен өзә. «Мәк чәчәге», «Көмеш тояк тулпар атым», «Агыла да болыт агыла», «Зәңгәр кыңгыраулар» кебек җырлары да аның талантлы композитор булганлыгы хакында сөйли.

Марс Макаров соңгы вакытта үзе белән бергә эшләгән җырчылар, музыкантлар хакында газета-журналларга байтак истәлекләр язды, әмма аларның бергә тупланып китап булып чыгуын гына күрә алмады. Тиздән Татарстан китап нәшриятында бу талантлы шәхеснең җырлары, шигырьләре һәм истәлекләре тупланган «Кайтаваз» дигән китап басылып чыгачак.