|
|
Бүген кемнәр туган
|
|
Архив
|
31.03.2016 Җәмгыять
Булдыклы җитәкче һәм атаПильна районы Сафаҗай авылы мәдәният йорты бүгенгә гөрләп эшли. Көн саен биредә вокал, хор, бию, драма түгәрәкләре иҗади эшчәнлекләрен җәелдерә, сәхнәләштерелгән бәйрәмнәр, төрле бәйгеләр оештырыла. Еш кына Казан артистларының матур концерт программалары шыгрым тулы зал җыя. Теләгән кеше өчен бильярд та бар. Һәр ял көннәрендә дискотекалар уза. Икенче ел инде клуб белән яшь, энергиясе ташып торган, мәдәни һәм спорт җанлы егет Илгиз ИЗМАЙЛОВ (фотода гаиләсе белән) җитәкчелек итә. 25 март - Мәдәният хезмәткәрләре көне уңаеннан аның белән очрашып, үзе, эшчәнлеге, гаиләсе белән таныштык. Илгиз һәрьяктан сәләтле булган гаиләдә үскән шәхес. Әттәсе Зөфәр һәр эштә алтын куллы гаилә башлыгы. Күп еллар Петрякс җирле хуҗалыгында намуслы хезмәт куя. Бүген отделка ремонты белән шөгыльләнә. Әннәсе Венера югары тәҗрибәле укытучы. Авыл балаларына инглиз теленнән белем бирә. Бертуган абыйсы Эмиль да һөнәре буенча укытучы. Бабасы Максут ага Низамовны Петрякста, бөтенләй Пильна районында белмәгән кешеләр бик аздыр. Ул оста баянчы, якынча биш дистә еллар авыл клубында художество җитәкчесе булып эшләгән. Хәтта өч кызы белән гаилә ансамбле дә оештырган булган. Мәктәпне тәмамлап Илгиз дә якыннары кебек педагог юлын сайлый һәм Түбән Новгород педагогия институтына укырга керә. Шул ук вакытта аңа Петрякс клубы җитәкчесе вазифасын тәкъдим итәләр. Һәм легендар баянчы Максут оныгы җиң сызганып эшкә керешә. Спорт җанлы булганга, яшь буынны милли көрәш нечкәлекләренә дә өйрәтә Илгиз. Биредә ул дүрт ел хезмәт итә. Сафаҗайда күп еллар авыл клубын җитәкләгән Флюра Ягудина лаеклы ялга чыккач, авыл хакимияте бу урынга Илгизны тәкъдим итә һәм 2014 елның беренче декабреннән яшь җитәкче үз вазифасына керешә. - Якынча ел ярым вакыт дәвамында клубта бернинди чаралар оештырылмады, чөнки тиешле шартлар юк иде. Мин килгәнче, җирле инициативалар программасы буенча клубыбызда капиталь ремонт барды: диварлар яңартылды, тәрәзәләр, ишекләр алмашынды. Ремонт дигән нәрсә һәркемгә дә яхшы таныш. Аннан соң бинаны кеше хәленә китерү, чүп-чарны, төзү материаллары калдыкларын арытуга байтак көч куярга кирәк. Мин нәкъ шул чорга эләктем. Шулай да бер ай вакыт эчендә барысын да җайлап, Яңа елны яңартылган клубта зур, күңелле тамаша белән каршы алдык, - ди яшь җитәкче.
Бүгенге көндә авыл хакимияте карамагында булуга карамастан, спонсорлар ярдәменнән башка бер генә мәдәни чара да узмый. Мәсәлән, ике туган Ринат һәм Илдар Аляутдиновлар цифралы форматта кино аппаратурсы бүләк иткәннәр. Фитнес залны җиһазлау да уртак көч белән булдырылган.
Һәр җитәкче өчен мөһим һәм катлаулы бурыч – коллектив белән уртак тел табу. Илгиз билгеләвенчә, моның белән бернинди кыенлыклар юк икән. Спорт инструкторы Рөстәм Хайретдинов, директор урынбасары Рөстәм Абдулбяров аның беренче ярдәмчеләре. Түгәрәкләр эшчәнлеген Венера ханым ирекле рәвештә алып бара. Бүгенге көндә алар бергәләшеп “Битва хоров” район конкурсына әзерләнәләр.
Эштә үзен һәрьяктан уңай күрсәткән Илгиз гаиләсендә дә олы ихтирамга ия. Тормыш иптәше Эльвира белән алар биш ел мәхәббәтләренә тап төшерми яшиләр, ике ягымлы бала тәрбиялиләр. Алия балалар бакчасына йөри, ә нәни Юсуфка алты ай.
Эльвира чыгышы белән Воркутадан. Күп еллар элек язмыш аны безнең якларга китерә. Һәм ул Сафаҗай мәктәбендә белем ала башлый. Бер класска олырак укыган Илгиз чибәр кызны шунда ук ошатып ала. Дөрес, Эльвира баштан аңа бөтенләй игътибар бирми, тик озак тырышулардан соң Илгиз барыбер сөйгәненең мәхәббәтен яулый. Алар шактый озак вакыт очрашып йөриләр һәм гаилә коралар. Моңа кадәр Эльвира Түбән Новгород медицина колледжында теш табибы һөнәрен ала.
Бүген яшьләр Илгизның әти-әнисе белән барлык уңайлыклары булган иркен йортта яшиләр, балалар үстерәләр. Олы буын яшьләргә гел ярдәмнәре, акыллы киңәшләре белән. Аз-маз терлек тә асрыйлар, бакча да үстерәләр. Туган ягының чын патриоты булгангамы, инде шәһәр тормышы күңеленә ятмагангамы, Илгиз калага китеп урнашу мөмкинлегеннән баш тарта. Кая туган, шунда яраган, димәк. Әйе, Илгиз кебек яшь белгечләр авылларыбызга кирәк.
Без Илгизны ихлас күңелдән һөнәри бәйрәме белән тәбрик итәбез. Бәхет, күтәренке кәеф һәм нык сәламәтлек телибез.
Румия ХАМЗИНА |
Иң күп укылган
|