15 яшьтә 110 см толымга ия булган Розалиягә "Чәчеңне кистер, күз тиюе бар" дигәннәр (ФОТО)

 

– 8 сыйныфта укыганда озын чәчле кыз турында бер кино караган идем. Исемен хәтерләмим. Ул кинодагы актрисаның чәче шуның кадәр озын ки, ул аны кесәсенә салып йөри иде. Шул чакны мин дә озын чәч үстерү хыялы белән яна башладым. 9 сыйныфтан соң бер дә кистермәдем, очларын гына тигезләп тордым. Чәчемә күпләр сокланып карый, “су анасы” дигән сүзләрне дә ишетергә туры килә. Тик әлегә толымнарым кесәмә салып йөрерлек түгел. Хыялымны тормышка ашырасы иде. 

 

 

Үзе турында: Рамилә Гарифуллина, 5 яшь. Биектау районы Татар Әйшәсе авылыннан. 

 

 

– Әле чәчемне үстерә башлаганга 3 кенә ел. Әниемнең дә чәче бик озын иде. Алла боерса, мәктәпкә укырга кергәндә чәчләремә зур ап-ак бантиклар куеп барырмын. Әлегә Арча районы Кәче авылындагы “Кояшкай” балалар бакчасына йөрим. Сезнең газета аша дус кызларыма, тәрбияче апаларга зур сәламнәр җибәрәм. Мин аларны бик яратам.

 

 

Исеме: Назилә Хәсәнова;

Туган ягы: Теләче районы, Сауш авылы;

Белеме: КНИТУның 2 курсында укый;

Чәч озынлыгы: 96 см.

 

 

– Бервакыт кечкенә чакта төшкән фотоларыма карап утырдым. Ә анда мин гел кыска чәчтән. Моны күреп күңелем төште һәм үстерергә кирәк дип үз-үземә сүз бирдем. 9 сыйныфтан бирле кистергән юк. Очларын гына тигезлим. Көндәлектә урап, өскә җыеп йөрергә яратам. Дусларым “Рапунцель” дип шаярткалый. Кайсылары “сиңа шарф та кирәк түгел инде” диләр. Чәчемне кыш көне атнага бер, җәен ешрак юам. Коелмасын һәм ныгыту өчен кычыткан, әрекмән тамыры, календула чәчәге, утчәчәк төнәтмәләре белән чайкыйм. 

 

 

Исеме: Розалия Хөсәенова, 15 яшь.

Чәч озынлыгы: 110 см.

Туган җире: Актаныш районы, Табанлы Күл авылы. 

 

 

– Чәчемне 2 сыйныфтан бирле үстерәм һәм озын толым итеп үреп йөрим. Халык арасында йөргәндә чәчемне кызыксынып тотып карыйлар. Әле бервакыт кибеттә бер апа артымнан күзәтеп йөргән дә, килеп: "Үскәнем, бу чәч толымыңны кистер яки өеп йөрт, күз тиюе бар" – диде. Шуннан соң чәчемне күз тиюдән саклый торган ташлы резинка белән җыеп йөри башладым.

Чәчемне әрекмән, кычыткан төнәт­мәләре белән юам.

 

 

Исеме: Сәйдә Сөнгатуллина, 4 яшь;

Туган җире: Чистай районы, Яуширмә авылы;

 

 

Үземә дүрт яшь булса да,

Чәчләремә бары өч.

“Кисмә, – ди әби, – чәчеңне,

Чәчләрдә ди, сихри көч!”

Татарның чәче һәрвакыт 

Озын булырга тиеш.

Еламыйм мин чәч үргәндә,

Мин матур блондинка ич.

 

 

 

Үзем турында: Әхмәтова Ләлә Фәргать кызы, 32 яшь, укытучы булып эшлим.

Тумышым белән: Спас районы Көек авылыннан.

 

 

Чәчемне алтынчы ел үсте­рәм, очларын гына тигезләтәм. Кияүгә чыкканчы чәчем җилкәмнән ары үсмәде, ниләр генә эшләп карамадым... Ә мәхәббәт төрле тылсымга ия икән! Кияүгә чыккач, чәчем калынайды, матурланды, үсә башлады! Моңа бик шатландым, озын чәчле булу – күптәнге хыялым иде! Биюче татар кызларының толымнарына һәрвакыт соклана идем! Ниһаять, мин дә озын толым иясе! Татар кызы! Сыйныфымдагы кызларым да, миңа карап, чәч үстерә башладылар. Тиздән озын чәчле кызлар артыр!