Кремльдә ни булганын хәтерләмим, ди Путин янында булып кайткан Татарстан механизаторы

“Сөт иле” – Яңа Чишмә” җәм­гыяте белән элемтәгә кергәч, безгә аның бик тыйнак һәм шул ук вакытта булган кеше икәнен әйттеләр. Нинди генә эшкә тотынса да, җи­ренә җиткереп эшли торган һөнәр иясе булуын ассызыкладылар. 2008 елда Ринат Миннемулла улына “Татарстан Рес­пуб­ли­касы­ның атказанган механизаторы” исеме бирелә. Ә аңа кадәр Авыл хуҗа­лыгы һәм азык-төлек минис­тр­­лы­гының Мактау грамотасы бе­лән бүләкләнә. Район буенча эш күр­сәткечләре иң югары булуын күреп, тагын нинди дәүләт бү­ләге­нә тәкъдим итәргә була икән дип уйлана башлыйлар. “Дуслык“ орденына тукталалар. 2014 ел башында документлар җыю эшенә керешә­ләр. Ринат абый исә үзенә мондый исем бирерләр дип башына да китерми. Кая инде авылның гади бер механизаторына андый дәрә­җә?!

 

Тик көннәрнең берсендә Мәс­кәүдән телеграмма килеп тө­шә. Ринат Сөләймановны Мәскәү Кре­ме­ленә бүләкләүгә чакырганнар. Баш­тарак моңа хатыны да, үзе дә ышанмый. Чын түгелдер дип уйлыйлар. “Сөт иле” – Яңа Чиш­мә” җәмгыяте генераль директоры Наил Сабиров өйлә­ренә кил­гәч кенә, моның чын булуына ышана ул.

 

– Җитәкчелек Казанга барырга машина бирде, – ди Ринат ага. – Поездга утыртып җибәрделәр. Ә Мәскәүдә безне Татарстан вәкил­лә­ре каршы алып, Кремль­гә озатып куйды. Бүләкләнгәннән соң кабат вокзалга илттеләр. Монда кайт­сак, район тагын машина җи­бәргән. Без мондый хәлне күргән­мени, шушы бер­ничә көн эчендә уч төбендә йөрттеләр! Уңайсыз­ландым инде. Бик зурладылар, барысына да бик зур рәхмәт.

 

Авылдан беркая да китми, гомер буе җирдә эшләгән Ринат ага бүген дулкынлануын яшерә алмый. Мәскәүгә барып, ил җитәк­чесе кулыннан бүләк алу турында ул уена да кертеп карамаган була бит. “Мондый борылыш аласын, Путинның мине кабул итәсен беркем дә көтмәгән иде. Бүләкләү булса да, гадәти шартларда гына үтәр дип уйлаган идек”, – ди Ринат ага.

Президент янына чыгуын да то­манлы гына хәтерли. “Андый кү­ренекле кеше янында үзеңне ничек тотасын да белмисең бит әле. Исем-фамилиямне әйтү бе­лән чыктым, үземнең шул миз­гелдә ниләр кичерүемне сөйләп аңлата алмыйм, бөтен нәрсә томан эчен­дә, хәтерләмим. Мине озата барган улларым да залда иде. Соңыннан алардан бу хакта сораган идем, әти, борчылма, бик яхшы килеп чыкты, дип тынычландырдылар”, – дип Кремльдә булган вакыйгаларны искә төшерә ул.

 

Кече яшь­тән әтисе белән трактор янында кайнашып үскән малай басу-кырга чыккач кына дулкынланмый. Гомере буе техника иярли. Башта “ДТ-75“ тракторына уты­ра. Әтисе лаеклы ялга чыккач, аның “Т-40“ына күчә. Техника буенча бригадир ярдәмчесе була, аннан бригадир, кабат техникага утыра. 2005 елда колхоз бетеп, “Вамин” килгәннән соң, хуҗа­лыкка яңа техника кайта. Билгеле инде, аны теләсә кемгә биреп булмый: чит илдә җитеш­терел­гән “Макдон” комбайнына Ринатны утырталар. Беренче мәлдә аны ничек кабызасын да белми механизатор. Ә аннары җаен табып, яңа комбайны бе­лән районда беренче урынга чыга.

 

Ринат абый узган ел лаеклы ялга чыккан. Эшли әле ул. Тәндә егәр барында өйдә тик ятасы килми, ди. Хатыны Нәфисә апа да гомер буе колхозда эшләгән. Бүген ул лаеклы ялда. Ринат абыйның эштән, ике улының, дүрт оны­гы­ның кунакка кайтуларына тәмле ризыклар пешереп көтеп тора. Ул­ларының берсе – Чаллыда, икенчесе Яңа Чишмәдә гомер итә. Берсе дә авыл хуҗалыгы тармагын сайламаган. Үзләре теләгән һөнәрне сайларга мөм­кинлек бирдек, ди ул. Авылда тырышлар күп булса да, орден бик сирәкләргә генә эләгә...