Сау бул, Сүрия!

Владимир Путин Сүрия­дәге Россия гаскәрлә­ренең төп өлешен чыгара башларга фәрман бирде. Кичә бу эш башланды да инде. Очкычларның беренче төркеме Сүриядәге Хмеймим авиабазасыннан Россиядә даими урнаша торган урыннарына юл тоткан. Бу хакта Россия Оборона министрлыгы­ның матбугат үзәге хәбәр итә.

Путин бу карарын хәр­биләр алдына куелган мак­сат­ларның үтәлүе белән аң­латты. “Безнең Тартуста урнашкан диңгез базасы һәм Хмеймим һава базасы үз эш­л­әрен элеккечә дәвам итәчәк. Алар җирдән, судан һәм һавадан һөҗүм булган оч­ракта ныклап якланган булырга тиеш”, – диде Владимир Путин. Ул шулай ук Россия көчләрен чыгару Сүрия­дә килешү төзү эшенә уңайлы стимул булачак дигән өметен белдерде. Путин шулай ук Сүриядә низагны туктату буенча солых сөйләшүләрендә Россиянең ролен активлаштырырга кирәклеген әйтте. Россия хәрбиләрен техниканы чыгару турындагы карар Сүрия җитәкчесе Бәшәр Әсад белән килештерелгән.

Сүриядәге хәрби операцияне Россия 2015 елның 30 сентябрендә башлаган иде. Бу беренче чиратта Россиядә тыелган террор оешмасы ДАИШка каршы көрәш дип аталды. Путин исә гаскәрләр­нең чыгарылуына аңлатма биреп, террорчыларны көч­сез­лән­дерә алдык, диде. Гас­кәрләрнең Сүрия­дән чыгарылуын кемдер көтелмә­гән вакыйга дип бәяли, икенче­ләр исә, эш шул якка таба бара иде, дип аңлата. “ВТ“ бу белгечләрнең бу хактагы
фикерен белеште.

Ш.Мәрҗани исемендәге Тарих институты директоры Рафаил Хәкимов, Сүриядә уздырылган хәрби опера­ция­ләр Россия өчен мәгънә­сез­рәк гамәл булды, дигән фи­кердә. “Гаскәрнең чыгарылуы көтелмәгән дип әйтеп булмый. Бу – Женевада очрашу, Путин һәм Обаманың киле­шүе­нең дәвамы. Шуңа күрә гаскәрләрнең чыгарыла башлавы – көтелгән вакыйга. АКШ­ны 37 дәүләт хуплый, ә Россиянең таяныр иле юк диярлек. Сүриядә АКШ та, Россия дә хәрби куәтен, техника, коралын күрсәтте, сынап карады. Ике як та күрде, шуның белән җитәр дип уйлыйм.

Россия өчен бу сугыш кыйммәткә төште. Хәрби операцияләр алып бару акча таләп итә. Бер очкычның гына очуы да күз алдына китерә алмаслык бәягә төшә. Ә алар көненә берничә тапкыр оча, һөҗүм ясый. Россиянең бү­генге хәле масаерлык түгел – икътисад артка тәгәри. Төп максат чит илдә тәртип урнаштыру түгел, бюджетта акчаны саклап калу, арттыру булырга тиеш.
Федераль каналлар Сү­рия­дә Россия гаскәрләренең гамәлен ДАИШка каршы көрәш дип аңлатырга тырышты. Сүриядә тынычлык урнаштыру дип сөйләсәләр дә, анда ни булып ятканы безнең халыкка мәгълүм түгел. Кырым, Украинадагы хәлләр булса, бер хәл – алар безнең чиктә урнашкан, алар­ны беләбез. Хәтта Төр­киядәге вәзгыять белән дә кызыксыну зур, чөнки ике дәүләт арасында элемтә бар, халык азмы-күпме анда ял итәргә йөрде. Ә Сүрия – ерак, безгә таныш булмаган дәүләт. ДАИШ теләсә кайсы илгә үтеп керә ала, аларның юлларын кисү, аларга каршы көрәш алып бару – махсус хез­мәтләрнең бурычы. Сүриядә тынычлык тиз генә урнашмас. Оппозицион хәрәкәтләр көчле. Сайлаулар булырга тиеш, кандидатлар арасында инде Бәшәр Әсад булмас дип уйлыйм”, – дип сөйләде Рафаил Хәкимов.

Татарстан Дәүләт Советы депутаты Рафил Ногманов, гас­кәрнең чыгарылуы – кө­телмәгән хәл, әмма Россия Сүриядә тәртип урнашты­рыр­га ярдәм итте, дигән фикердә. “Дөресен генә әйткәндә, Путинның бу фәрманы минем өчен көтелмәгәнрәк булды. Әмма бу алдан билгеле булгандыр дип уйлыйм. Сү­рия­гә керү дөрес, ки­рәкле га­мәл булды. Мәх­шәр иде бит анда! Россиянең анда катнашуы тынычлык урнаштырыр­га ярдәм итте. Каршы якларны килештерә алдылар. Кызганыч, очкычны бәреп тө­шер­деләр, хәрбиләребез һәлак булды”, – диде ул.