поиск новостей
  • 28.03 "Ак чәчәкләр кебек..." Кариев театры,18:30
  • 28.03 "Җан Баевич" Тинчурин театры, 18:30
  • 29.03 "Рөстәм маҗаралары" Кариев театры, 13:00
  • 29.03 "Кияүләр" Тинчурин театры, 18:30
  • 30.03 "Кәҗүл читек" Кариев театры, 11:00
  • 30.03 "Тапшырыл...ган хатлар" Кариев театры, 18:00
  • 30.03 ПРЕМЬЕРА "Флешка, рэп һәм мәхәббәт"Тинчурин театры, 13:00 һәм 17:00
  • 31.03 "Шәй-бу, шай-бу" Кариев театры, 18:00
  • 31.03 "Өч аршын җир" Тинчурин театры, 17:00
  • 02.04 Хан кызы Турандык. Тинчурин театры, 18:30
  • 03.04 Гомер буе сине көтәм. Тинчурин театры, 18:30
  • 04.04 Кияү урлау. Тинчурин театры, 18:30
  • 05.04 Гастрольләр: Тайна замка на холме. Хакасский национальный драм.театр. Тинчурин театры, 11:00 һәм 13:00
  • 05.04 Гастрольләр: Ханума. Хакасский национальный драм.театр. Тинчурин театры, 18:30
  • 06.04 Гастрольләр: Мастер и Маргарита. Хакасский национальный драм.театр. Тинчурин театры, 17:00
  • 07.04 Гастрольләр: Мелодия коралловых бус. Хакасский национальный драм.театр. Тинчурин театры, 17:00
  • 09.04 Җилкәнсезләр. Тинчурин театры, 13:00 һәм 18:30
  • 10.04 Синең хакта… Тинчурин театры, 18:30
  • 11.04 Ядәч! Исемдә! Бер гаилә трагикомедиясе. Тинчурин театры, 18:30
  • 12.04 Флешка, рэп һәм мәхәббәт. Тинчурин театры, 18:30
Бүген кемнәр туган
  • 28 Март
  • Ренат Әюпов - режиссер
  • Фирүзә Җамалетдинова - язучы
  • Артур Поляков - мәдәният хезмәткәре
  • Гиоргий Куприянов - дәүләт эшлеклесе
  • Вил Мәһдиев - көрәшче
  • Никах, юбилей,Туган кон,балалар бэйрэмен,торле кичэлэрне алып барабыз.8-4кэ хэтле шалтыратта аласыз.89393453961
  • Чистаидан иорт сатып Алам чистаинын узенэн 89274905164
  • 1 булмэле фатир моселман гаилэсенэ озак вакытка арендага бирелэ ЖК Салават купере. Собственник ( риелтор тугел!!!)89509488227.
  • Сдается 2-х комнатная квартира по ул. Ф.Амирхана порядочной семье на длительный срок. В квартире есть мебель, рядом остановка, магазины, рынок. Только граждане РФ без животных!!! 8-965-584-66-30 собственник.
  • Продаю листы нержавейки 530х630, толщина 3,5мм, запчасти на УАЗ.тел 89178553159.
  • Коттедж төзэргэ кирэк казанда минэм номер 89274905164
  • Баян сатыла. Казан. Тел.:89003238614
  • татар теленең аңлатмалы сүзлеге сатыла, 3 томда, Казан, Татарстан китап нәшрияты, 1981 ел. тел.8 919 647 47 91
  • Казанда оч булмэле фатирнын залына тэртипле кыз эзлим. Бигичев урамы. Риелторсыз 89600347300
  • Исэнмесез! Бенто тортларга hэм капкейкларга заказлар кабул итэм! Казан шэhэре. 89377708700 Динара.
Архив
 
16.03.2016 Сәясәт

Рөстәм Миңнехановның Сергей Брилевка биргән ИНТЕРВЬЮСЫ (ВИДЕО)

Болгавыр чорда югалып калмас өчен ни эшләргә кирәк? “Вести в субботу” тапшыруы алып баручысы Сергей Брилевның Татарстан Президенты Рөстәм Миңнеханов белән корган чираттагы әңгәмәсендә сүз мәгариф һәм белем бирү, һөнәр мәсьәләләренә кагылды. “5 вечеров с Рустамом Миннихановым” тапшыруының соңгы чыгарылышында әйтелгән фикерләрне җиткерәбез.

СЕРГЕЙ БРИЛЕВ: Исәнмесез, Рөстәм Нургалиевич! “Пять вечеров” тапшыруы кысаларында инде бишенче тапкыр очрашабыз. Әгәр миннән: “Син Миңнехановны бе­ләсеңме?” – дип сорасалар, “Бе­ләм”, – дип җавап бирә алам. Ә бит чынлыкта белмим! Чөнки әлегә ниндидер төгәл әйберләр хакында сөйләштек, ә хис-тойгылар читтә­рәк калды. Әйдәгез, иң гади сораулардан башлыйк әле. Мәктәп елларын хәтерлисезме? Ничек укыдыгыз?

РӨСТӘМ МИҢНЕХАНОВ: “4”ле, “5”ле билгеләренә. Өйгә эшләрне дә, гомумән, укуны да артык яратмадым. Күбрәк иҗадилык белән алдырырга тырыша идем.
 
С.Б.: Сезнең соңгы елларда инглиз телен өйрәнүегезне күпләр белми дә. Димәк, белемсез ерак китеп булмаганын үз вакыты белән аңлагансыз?
 
Р.М.: Минем күп тапкырлар әйткәнем бар – укыган чагында нәрсәнең күбрәк кирәк булачагын белмисең. Советлар Союзы вакытында чит тел кемгә кирәк иде соң? Әмма дөнья үзгәрә, бүген инглиз теле халыкара аралашу теленә әверелде. Мин математика, физика, химияне начар беләм дип әйтмәс идем. Әмма химияне яхшырак өйрәнәсе калган – бүген эшемдә бик тә кирәге чыга.
Әйе, мин инглиз телен өй­рәнәм. Бөтен авырлыгы да шунда: әгәр Сез инглиз телендә сөйлә­шәсез икән – мин аны аңлыйм әле, ә менә америкалыны аңлавы кыенрак.
 
С.Б.: Республикада балалар бак­чаларына бәйле вәзгыять ни­чегрәк? Путин мәктәпкәчә учреж­дениеләргә чиратлар булмаска тиеш дигән теләген җиткергән иде бит.
 
Р.М.: Чыннан да, без әле мәктәпкәчә белем бирү учреж­дениеләренең ролен, мәгънәсен аңлап бетермибез. Бакча түгел, ә нәкъ менә мәктәпкәчә белем бирү оешмаларының ролен. Без, балалар бакчасы – ул әти-әниләр эштә чагында сабыйларны калдырып тору урыны, дип кенә фикер йөртәбез. Ә бу алай түгел. Бүген мәктәпкәчә белем бирү учреждениесе – башлангыч мәктәп ул. Һәм, әлбәттә инде, баланың анда алдагы тормышында кирәге чыгачак күнекмәләрне алуы мөһим. Бел­гечләр сабыйның 70 процент белемне 7 яшькә кадәр алуын әйтә. Ә 7 яшьтән соң инде үзенә кирәк­лесен туплый. Мин моның белән килешәм! Без үз алдыбызга бакчалар төзү белән бергә, аларда матди-техник базаны яхшыртуны да бурыч итеп куябыз. Анда үз эшенең осталары хезмәт куярга тиеш. Күрсәткечләргә килгәндә, без, әлбәттә, балалар бакчаларын бик күп төзедек. 2012 елдан бирле 192 мәктәпкәчә учреждение сафка басты, бу – 40 меңнән артык урын дигән сүз. Шул рәвешле 3 яшьтән 7 яшькә кадәрге сабыйларны бакча белән тәэмин иттек. 2015 елда гына да 75 мәктәпкәчә учреждение файдалануга тапшырылды. Шәхси бакчалар булдыру юлын да таптык. Аларга да билгеле бер ярдәм күрсәтәбез. Әлбәттә, шәхси бакча ул – аңа түләргә мөмкинлеге булган әти-әниләр өчен. Анысы бөтен кешенең дә хәленнән килми.
 
С.Б.: Ә укытучыларны каян алырга? Хәтерләсәгез, бигрәк тә узган гасырның 90нчы елларында педагог һөнәре бик үк дәрәҗәле саналмый башлаган иде.
 
Р.М.: Укытучыларны әзерләргә кирәк. Без мөгаллимнәрне ресурслар үзәге базасында әзерләү мәсьәләсен аерым карадык һәм аларның матди-техник базалары да, яшәү урыннары да яхшырак булсын өчен тырыштык. Максатчан программалар, махсус стипен­дияләр бар. Һәм, әлбәттә инде, Президент Владимир Путинның май Указлары нәтиҗәсендә педа­гог­ларның матди хәле сизелерлек яхшырды.

С.Б.: Укытучының хезмәт хакы төбәктәге уртача эш хакына тигез булырга тиеш дигән сүзне әй­тәсезме?
 
Р.М.: Әйе. Хәзер мөгаллимнәр генә түгел, мәктәпкәчә белем бирү учреждениеләре тәрбиячеләре дә лаеклы хезмәт хакы ала. Соңгы мәгълүматларга караганда, белем бирү тармагында эшләүчеләрнең 25 проценты – яшьләр. Үткәрелгән аттестацияләр дә киләчәктә мәга­риф системасында эшләргә теләгән белгечләрнең дәрәҗәсе шактый югары булуын күрсәтә.

С.Б.: Сезнең коллега – Калуга өлкәсе губернаторы Мәскәүнең елдан-ел киңәеп, өлкә чигенә үк килеп җитүенә зарланган иде. Шуңа күрә андагы авыл укытучылары күрше бистәләргә эшкә китә башлаган. Акчаны бит мәскәүчә түлиләр. Ә сездәге укытучылар читкә китмиме? Әллә, киресенчә, Татарстанга килергә атлыгып торалармы?
 
Р.М.: Татарстандагы уртача хезмәт хакы – безнең округта иң югарылардан санала. Мари Иле, Чуашстан республикалары, Ульяновскида эш хакы азрак. Безнең педагоглар күбрәк ала. Һәм, әлбәттә инде, башка төбәкләрдән безгә укырга килгән егет-кызларны шатланып кабул итәбез. Минем фикеремчә, Татарстанда яшәү сыйфаты югары. Казанның җәлеп итүчәнлеге елдан-ел арта бара. Безнең университетларда 8 меңгә якын чит ил студенты белем ала. Россиянең төрле төбәклә­реннән киләләр. Әйтик, Чаллыдагы IT-паркта эшләүчеләрнең 30 проценты – башка төбәкләрдән килүчеләр.
 
С.Б.: Чаллыны искә алгансыз икән инде, андагы балалар технопаркы хакында да сөйләгез әле.
 
Р.М.: Бу – моңарчы күрелмәгән проект. Совет заманында Яшь техниклар йорты, техник түгәрәкләр бар иде бит. Бүген без күп кенә позицияләрне югалттык. Ә бу инженерлык фәннәренә булачак белгечләр әзерләү өчен яхшы платформа иде. Мин моннан 5-7 еллар элек техник түгәрәкләрне җанландырып җибәрү бурычын куйдым. Бу түгәрәкләрнең эшенә мәгариф һәм фән министры гына түгел, сәнәгать һәм сәүдә минис­тры да, безнең сәнәгать предприя­тиеләре дә күзәтчелек итәргә тиеш. Без үзебезнең системаны булдырдык. Моңа роботлар да, цифр­лы технологияләрне куллану да, пилотсыз автомобильләр дә керә. Анда башкача уйлаучы, фикер йөртүче кешеләр әзерләнә. Алар акыл үсеше ягыннан бездән ике-өч башка югарырак. Без аларның нәрсә турында сөйләшкәнен хәтта аңламыйбыз да, бу – киләчәк кешеләре! Мондый технопарклар төзүне дәвам итәчәкбез. Чаллыда ул эшли башлады инде. Бу – безнең тәүге тәҗрибә. Әлбәттә, моның өчен зур акча кирәк. “КамАЗ” директоры белән килештек, ул чыгымнарның бер өлешен үз өстенә алырга сүз бирде. Бүген “КамАЗ” пилотсыз автомобиль эшләү белән шөгыльләнә. Бу бөтенләй яңа фән. Яңа проектларны бары яшь белгечләр генә гамәлгә ашыра ала...
 
С.Б.: Гыйнвар аенда Давостагы Бөтендөнья икътисадый форумында яңгыраган соңгы докладта кызыклы бер әйбер телгә алынды. Киләчәк – цифрлы технология­ләрдә. Аларны гамәлгә кертү һәм роботлаштыру дөньяда 2025 елга кадәр 100 триллион долларлык байлык хасил итәчәк. Бу – бик матур киләчәк, әлбәттә. Әмма мәсьә­ләнең икенче ягы да бар. Роботларны киң куллану аркасында Европа берлегендә 5 миллион кешенең эшсез калачагы әйтелде. Роботлар килә – кешеләр китә. Технологик алгарыш, цифрлы тех­ноло­гияләр, акча, кешеләр язмышы – боларның барысын да ничек берләштерергә? Сүз безнең ки­ләчәк турында бара. Бу мәсьәләдә Сезнең уй-фикерләрне беләсе килә.
 
Р.М.: Әйе, мин Давос форумында катнаштым. Дүртенче технологик революция, цифрлы техноло­гияләр быел анда төп тема булды. Беләсезме, докладларны тыңла­ганда, мин үзебезнең соңга калуыбызны аңладым! Ни өчен дигәндә, якындагы 10-15 елда күп кенә һөнәрләр юкка чыгачак. Аларның кирәге калмаячак. Шул ук вакытта гаять күп санда яңа профессияләр барлыкка киләчәк. Шунысы көн кебек ачык: 2025 елдан машина йөртүчеләр саны да кимиячәк, пилотсыз җәмәгать транспорты пәйда булачак. Мондый яңа юнә­лешләр бик күп. Без моңа әзер булырга тиеш. Монысы, беренчедән. Икенчедән, мин шуны аңладым: белемле кешеләргә ихтыяҗ зур булачак. Көндәшлеккә сәләтле булыр өчен, син яхшы белгеч булырга тиешсең. Шунлыктан янә кеше капиталы мәсьәләсе калкып чыга. Белем дәрәҗәсе югары, талантларны ачу өчен тиешле шартлар тудырылган илләр көндәшлеккә сәләт­ле булачак. Россия Президенты Дәүләт Советының соңгы утырышында, без дөньяда әйдәп баручылар булырга тиеш, дигән бурыч куйды. Бездә моның өчен бөтен алшартлар да, сәләтле кешеләр дә җитәрлек. Әмма тиешле белем алмаган кешеләр дә бар. Аскы планканы күтәреп, дәрәҗәне арттырыр­га кирәк. Моның өчен мәктәпкәчә, урта белем бирү өлкәсендә реформа үткәрү шарт. Югары уку йортлары да нәрсә эшләгәнен белеп эшләргә тиеш. Кешенең кая барачагын, аның белән нәрсә булачагын белеп тору мәслихәт. Уйлап табучы була икән – аңа вузга барырга кирәк. Бәлки ул яхшы белгеч булыр – аңа ресурс үзәгенә барып, яхшы белгечлек алырга кирәк. Бу эштә эзлеклелек булырга тиеш. Ни генә дисәк тә, киләчәгебез – белемле, ниндидер яңа әйбер эшләү, булдыру теләге белән янган креатив кешеләр кулында. Яшьләр моны аңларга тиеш. Син бәлки Стэнфорд, Гарвард университетын тә­мамлагансыңдыр, әмма синдә дәрт, теләк юк икән, бу белемнәр ачылмаячак. Шул ук вакытта яхшы белемнән башка да бернигә дә ирешмәячәксең. Шуңа күрә яшь­ләр­гә, белем алу өчен вакытны мөмкин кадәр нәтиҗәле файдаланыгыз, дигән фикерне җиткерү мөһим. Кемдер, менә Гуглга кердем дә теләсә нинди сорауга җа­вап таптым, дип әйтергә мөмкин. Әмма Гуглны аңлау өчен дә тиешле белемең булырга тиеш бит.

С.Б.: Ә бердәм дәүләт имтиханнары турында ни әйтер идегез?
 
Р.М.: Күпләр БДИны тәнкыйть­ләргә омтыла. Алайса, белемне ничек тикшерергә? Сорауларның ничек бирелүендә укучылар түгел, ә үзебез, методистлар, белгечләр гаепле бит. Димәк, алар моны примитив һәм кызыксыз итеп эшли дигән сүз. Әлеге системаны үзгәр­тергә кирәк. Мин тагын бер мәр­тәбә кабатлыйм: бездә ниндидер база белеме булырга тиеш. Ничек инде үз илеңнең тарихын, дөнья тарихын, географияне белмәскә мөмкин? Һиндстанның нинди ил­ләр белән чиктәш икәнлеген белү өчен һаман саен Гуглга керә алмыйсың бит инде...

С.Б.: Сез Дәүләт Советында узган утырыш хакында телгә алдыгыз. Анда Владимир Путин, хәте­рем ялгышмаса, мәктәпләр төзе­лешенә федераль бюджеттан 50 миллиард сум акча бүлеп бирергә вәгъдә итте. Әмма шул ук вакытта әлеге уңайдан төбәкләр һәм муниципалитетларга төп басым ясалачагын искәртте. Сездә бу юнәлештә эшләр ничек бара?
 
Р.М.: Мин моңа уңай карыйм. Әмма шул ук вакытта икенче смена укучыларга уңайсызлык тудыра дип уйламыйм. Бүген төп проблема бу түгел. Хәзер булган мәктәп­ләрне тәртипкә китерергә кирәк. Бездә шактый искергән, начар җи­һазландырылган мәктәпләр аз түгел. Һәм, әлбәттә инде, без бу программада катнашачакбыз. Россия Президентының шундый бурыч куюы һәм федераль ярдәм күрсәтеләчәге бик тә мөһим. Безгә республика буенча 38 мәктәп тө­зергә кирәк. Мәктәпләрне капиталь төзекләндерү эшләре тулы куәтенә бара. 2012 елдан бирле, ял­гышмасам, 620-630 белем йорты ремонтланды. Алар заманча стандартларга җавап бирә. Кайчак, яңалык белән мавыгып китеп, булганы турында онытып җибәрәбез. Бала бит ул яши торган микрорайонда яңа мәктәп булмаганга гаеп­ле түгел. Ул укый торган мәктәптә дә шул ук шартлар тудырылырга тиеш. Белем йортларын җылы бәдрәфләр белән җиһазландыру турында бик яхшы федераль программа бар иде. Бу программада Татарстан да катнашты һәм күп кенә мәктәпләрдә шартлар яхшырды. Һәм мондый әйберләр бик күп. Авыл мәктәпләрендә балалар саны аз булса, шәһәрләрдә, әлбәттә, икенче сменада укытуга бәйле проблема бар. Без, беренче чиратта, белем йортларын аларга их­тыяҗ зур булган яңа микрорайоннарда төзиячәкбез.  Бүген Рос­сиядә дә, төбәкләрдә дә икътисадый вәзгыять җиңел түгел. Прези­дентның мәктәпләр төзелешенә 50 миллиард сум акча бүлеп бирүе – безнең өчен дә, тулаем алганда, программаны алдагы елларда дәвам итү өчен дә яхшы фал.

С.Б.: Киләчәккә күз салсак та, булачагы билгеле киләчәк турында сөйләшмәдек әле. Бу – World Skills чемпионаты. Аңа әзерлек эшләре ничек бара?
 
Р.М.: Эшче һөнәрләрне әзер­ләү­дә нәрсәнедер кулдан ычкындырабыз дигән уй бездә моңарчы да бар иде. Һөнәри техник училищелар системасында ниндидер торгынлык күзәтелә һәм бернинди яңалык та юк иде. Соңгы елларда яңа юллар эзләү белән мәшгуль булдык... Татарстан базары өчен ихтыяҗ иң зур булган һөнәрләр буенча 25 ресурс үзәге төзү турында карар кабул ителде. Бүген шундый 19 үзәк эшли инде, якын киләчәктә алар 25кә җитәргә тиеш. Бу – матди-техник җиһазлау, кадрлар туплау дигән сүз. Иң мө­һиме: ресурс үзәге үзе йөз тоткан тармак яки предприятие кысаларында эшләргә тиеш. Әйтик, “КамАЗ”, “Татнефть”, Түбән Кама “Нефтехим” – әнә шундыйлардан. Әле­ге предприятиеләр кадрлар җәлеп итәргә сәләтле. Аларның белгеч­ләре, үз чиратында, ресурс үзәклә­рендә белем бирәчәк. Бу – бик тә яхшы юнәлеш. Россиянең 2012 елда “Ворлдскиллс” хәрәкәте әгъзасы булуы һәм әлеге халыкара ярышларны 2019 елда үзендә үткәрергә теләк белдерүе безнең файдага булды. Бельгия, Франция кебек җитди көндәшләребез бар иде. Әлбәттә, бүгенге сәяси шартларда бу сизелерлек кыенлыклар тудырды. Әмма Президент Владимир Путин безнең алга бурыч куйды, World Skills делегациясе әгъзалары белән очрашты һәм безгә Казанда әлеге ярышларны үткәрергә күр­сәт­мә бирде. Һәм без шундый хокукка ия булдык. Әл­бәттә, федераль Хөкүмәт гаять зур ярдәм күр­сәтте. Россия вице-премьеры Ольга Голодец безнең белән җитәк­челек итте. Җитди көндәшлеккә дә карамастан, без җиңеп чыктык! Бүген эшче һө­нәрләр өлкәсендә дөнья бик нык алга китте. Без ком­пе­тен­цияләр, технологияләр алыр­га телибез. Татарстан алдында 2019 елда World Skills чемпионатын үткәрү генә түгел, Россияне лаеклы төстә күрсәтү бурычы да тора. Бүген дөнья чемпионатына әзерлек эшләре буенча 6 төбәкара үзәк төзү турында карар кабул ителде. IT-юнәлешендәге шундый үзәкләр­нең берсе Татарстанда булачак. Әлбәттә, хәзер Россиядә “Ворлдскиллс” ярышлары бөтен­ләй башка шартларда уза. Иң мө­һиме: предприятие җитәкчеләре аңа карата зур кызыксыну белдерде. Гәрчә бу төбәк ярышлары гына булса да, предприятиеләр яшь­ләр­­не мөмкин кадәр күбрәк җәлеп итү белән кызыксына башлады инде. Ярышларны лаеклы төстә үткәрү өчен, оештыру комитеты төзелде, бурычлар билге­ләнде, әзерлек үзәкләре эшли.
 
С.Б.: Россия җыелма коман­дасының җиңүен дә теләп калабыз.
 
Р.М.: Бу теләк кенә дә түгел, ул җиңәргә тиеш! Без шундый бурыч куярга һәм җиңәргә тиеш.
 
С.Б.: Рөстәм Нургалиевич, бу әңгәмәләрне Татарстан Президенты сайлавына кадәр башлап җи­бәргән идек, сайлаудан соң бер­ничә ай үткәч тәмамлыйбыз да. Сез бүген “хис, тойгы” дигән сүзләрне берничә тапкыр телгә алдыгыз һәм бу миңа бик тә ошады. Сезнең фикерегезчә, үз квалификациягезне күтәрү җәһәтеннән тагын нәрсәгә өйрәнә алыр идегез? Инглиз телен өйрәнүдән тыш, тагын ни белән шөгыльләнергә телисез?
 
Р.М.: Минем фикеремчә, без­нең һәркайсыбыз укуын дәвам итәргә тиеш. Без мәгариф турында күп сөйлибез, ә бу өлкәдә бурычлар кую өчен, синең үзеңнең җит­ди база дәрәҗәсе булуы шарт. Күп­т­ән түгел бер чарада катнаштым, анда безнең берничә министр, тиешле белем алганнан соң, үзлә­ренең проект эшләрен тәкъдим итте. Мин алар алдына киләсе биш елда “Стратегия – 2030” кысаларында нәрсә эшләргә теләвегезне әйтегез, дигән бурыч куйдым. Әле уку белән генә эш бетми бит, үз эшеңне яхшырту өчен алган бе­лемнәреңне куллана белергә дә кирәк. Ягъни бүген министр да, муниципаль район башлыгы да, Президент та киләчәктә кирәге чыгачак әйберләрне белергә тиеш. Менә, әйтик, мин “Татнефть” ком­па­ниясенең Директорлар советы рәисе буларак, бурыч куяр алдыннан нинди технологияләр бар, аларны ничек файдаланырга мөм­кин икәнлеген аңларга тиеш. Без, нефть эшкәртүче республика буларак, авыр калдыклар булмасын өчен нинди технологияләрне кулланырга икәнлеген белеп торырга бурычлы. Инде килеп нефть химиясе тармагын алыйк – нинди этилен комплексы төзесәк максатка ярашлы булачак? Яки электрон хезмәт күрсәтүдә тагын ниләр эшли алабыз? Мин, бөтен кешеләр кебек үк, һәрвакыт нинди дә булса яңалык эзләргә тиеш.
 
С.Б.: Ягъни белем алуны дәвам итәсез...
 
Р.М.: Әлбәттә! Без катнашкан шул ук Давос форумы бик тә кызык­лы, файдалы булды дип уйлыйм. “Евразия һәм бүгенге ефәк юлы” дигән сессиядә катнаштык, тагын бер чарада кояш энергиясендә иң ерак арага берөзлексез очып дөнья рекорды куйган самолет тәкъдим иттеләр. Әлеге самолетны уйлап табучылар үз алларына куйган бурычны үтәгән бит! Кешеләр­нең беренче карашка сәер булып тоелган әйберләрне гамәлгә ашыруын тыңлап торуы бик тә кызык. Бу тормышка ашмаслык әйбер түгел икән бит! Ул дөньяны үзгәртәчәк. Ягъни безнең карашка сәер булып тоелган әлеге кешеләр дөньяны үзгәртергә сәләтле. Менә без – гадәти кеше­ләр – агым уңаена йөзәбез: берәү­ләр ишкәк ишә, икенчеләр кул кушырып утыра, ә болар – ниндидер ыргылыш ясый. Миңа бу кешеләр белән танышу, аларны кунакка чакыру, уй-фи­керләрен тыңлау бик тә кызык. Әйдәгез, фикер алышып кына калмыйк, мәсьәләнең асылына төше­ник. Ягъни мәсьәләнең асылына төшенә барган саен, яңа белем үзләштерүнең әһәмиятен яхшырак аңлыйсың. Мисал өчен, әгәр мин Давос форумына бармаган булсам, боларны белми калыр идем. Бу – кайдадыр еракта, безгә кагылмый, дип уйладым. Тик бу алай түгел. Дүртенче технология революциясе – пар машинасы, илне электрлаштыру, автоматлаштырудан соң хәзер бара торган процесс ул.

С.Б.: Автоматлаштыру – ул цифрлы технологияләр дигән сүз.
 
Р.М.: Әйе. Шунлыктан барыбыз да туктаусыз алга барырга, белем алуны дәвам итәргә тиешбез. Кемдер – заманнан алдарак барыр, кемдер – арттарак. Ә безгә исә бергәләп хәрәкәт итәргә кирәк.


---
Ватаным Татарстан
№ --- | 16.03.2016
Ватаным Татарстан печать

▲ Өскә
Матбугат-инфо
Матбугат.ру
Ватаным Татарстан
Шәһри Казан
Бердәмлек
Рәшит Ваһапов фестивале
Камал театры
Тинчурин театры
Татар дәүләт филармониясе
Ирек мәйданы
Татарстан яшьләре
Кариев театры
Идел
Өмет
Татарстан китап нәшрияты
Милли Музей
Шаян
Татаркино
Ханский дом
Татар телен һәм ТР яшәүче халыклар вәкилләренең<br />туган телләрен саклау, үстерү мәсьәләләре комиссиясе
«Элита»