Татарстанда транспорт һәлакәтенә юлыгып, җәяүлеләр әрәм булган

Февральнең 23 көнендә Татарстанда юлларда кешеләргә шәхси бәла-каза, фаҗига китергән 235 транспорт һәлакәте теркәлгән һәм аларда 14 кешенең гомере өзелгән, 276сы имгәнгән, җәрәхәтләнгән. ТР буенча ЭЭМның ЮХИДИ идарәсе статистикасы шул хакта сөйли. Кичә дә кеше үлеме белән тәмамланган транспорт һәлакәте була.

Ул кичке 9 туларга 5 минутта Яр Чаллы – Зәй – Әлмәт трассасының Зәй районына туры килгән 63 нче чакрымында килеп чыга. “ВАЗ-2109” рулена утырган 1991 елгы егет юл читеннән хәрәкәт юнәлешендә атлаган 1973 елгы җәяүле ир кешене бәрдерә, соңгысы “ашыгыч медицина ярдәме” машинасында үлеп китә. Әлеге һәлакәт китереп чыгарган сәбәпләреннән транспорт белән идарә итүче хәрәкәт иминлеген тәэмин итәрдәй тизлек сайланмаганлыгы, җәяүленең машина хәрәкәте уңаенда яктылык кайтаргыч элементларсыз баруы күрсәтелә, ягъни юл йөрү кагыйдәләренең 10.1 нче һәм 4.1 нче пунктлары бозылган.

Җәяүле үлеме белән төгәлләнгән һәлакәт 20се көнне кичке 9 нчы 15 минутта Яр Чаллы каласының Вахитов проспектында була. “ВАЗ-2110” белән идарә иткән 1986 елгы егет тә, юл йөрү кагыйдәләренең 10.1 нче пунктын үтәмәстән, 1958 елгы хатын-кызны бәрдерә, соңгысының да, кагыйдәләрнең 4.4 нче пунктын бозып, светофорның “кызыл” төсенә юл аша чыгып барышы була. Шушы һәлакәттә имгәнеп, җәяүле бәрдерелгән урында җан бирә...