ГАДӘТТӘН ТЫШ, ӘММА КӨТЕЛГӘН

Татарстанда корылык 300 мең гектар игенгә зыян сала.

Көне-көне белән утыз градустан арткан эсселек айлар буе дым күрмәгән игеннәрне куырыпмы-куыра. Узган елның көзеннән үк барлык агротехник чараларны, тиешле технологияне үтәгән, туфракка кирәк кадәр минераль ашламалар кертә алган игенчеләребез бу җәйдә көтелгән уңышны ала алмаячак шул инде.

Корылык нәтиҗәсендә игенчеләребезнең югалтулары Татарстанда гадәттән тыш хәл игълан итүгә кадәр китереп җиткерде. Май аеннан июль азагына чаклы дәвам иткән кызу һава туфрактагы барлык дым запасларын юкка чыгара баруы нәтиҗәсендә республиканың көньяк-көнчыгыш районнарында 5828 гектардан артык иген һәм яшелчәләр һәлак була. Татарстан Авыл хуҗалыгы һәм азык-төлек министрлыгыннан, Россия Федерациясе Гадәттән тыш хәлләр министрлыгының Татарстандагы Баш идарәсеннән алынган мәгълүматлар буенча, дәвамлы корылык республиканың 30 районына шактый зур күләмдә матди зыян сала. Бигрәк тә Азнакай, Аксубай, Актаныш, Әлмәт, Апас, Баулы, Бөгелмә, Буа, Югары Ослан, Зәй, Кайбыч, Кама Тамагы, Лениногорск, Минзәлә, Мөслим, Түбән Кама, Яңа Чиш­мә, Нурлат, Сарман, Тукай, Чирмешән, Чистай һәм Ютазы районнары кырларында игеннәрнең хәле мөшкел. Урыны-урыны белән кырларга урып-җыю техникасы кертеп мәшәкатьләнәсе дә юк. Мондый хәлнең Татарстанда әлегәчә күренгәнен күпләр хәтерләми. Җирләр ярылып, бармак түгел, кул сыярлык тишекләр күңелгә шом сала. Күп хуҗалыклар корылыктан зыян күргән мәйданнарны сөреп, чөгендер, күпьеллык үлән яисә башка төр культуралар чәчә. Күпләре туфракны киләсе ел уңышы өчен әзерли.

Гадәттән тыш хәлләр кичекмәстән хәлиткеч чаралар күрүне дә сорый. Татарстан Республикасы Министрлар Кабинеты карары нигезендә республикада корылык буенча гадәттән тыш хәл режимы кертелә. Россия Федерациясе Гадәттән тыш хәлләр министрлыгының Татарстандагы Баш идарәсе белгечләре катнашында оператив төркем эшли. Югалтуларның күләме турындагы урыннардан алынган мәгълүматлар Россия Федерациясе Гадәттән тыш хәлләр министрлыгының кризислы ситуацияләр белән идарә итү буенча илкүләм үзәгенә җиткерелә, спутник элемтә аша тикшерелә.

Оператив төркем белгечләре республиканың Кайбыч районында булып, "Алтын Башак" агрофирмасы кырларына корылык нәтиҗәсендә килгән зыянның күләмен ачыклый. Россия Федерациясе һәм Татарстан Республикасы белгечләре катнашында эшләүче оператив төркем җитәкчесе Николай Суржко әйтүенчә, корылыктан зыян күргән хуҗалыкларга тиешле ярдәм күрсәтеләчәк.

Булган кадәрле уңышны тиз арада җыеп алу – игенчеләребез алдында торган иң зур бурыч. Тулаем алганда, дүрт мең ике йөздән артык комбайн бүген урып-җыю эшләренә әзер. Шуларның сигез йөз иллесе – югары җитештерүчәнлеккә ия чит ил комбайннары. "Дон" комбайннары тәүлегенә – 70 тонна, чит илнеке 100 тоннадан артык ашлык суктырырга сәләт­ле. Шуңа да урып-җыю эшләрен август аенда тәмамлау бурычы куела. Оператив мәгълүматларга караганда, урып-җыю эшләрен быел Нурлат, Зәй һәм Түбән Кама игенчеләре башлап җибәрде. Бүген аларга тагын җиде район кушыла. Быелгы елның тагын бер үзенчәлеге – саламның кадере арта. Аны әрәм-шәрәм итүгә юл куймыйсы иде.