18.07.2009 Шоу-бизнес

КАСТИНГТА 300ДӘН АРТЫК КЕШЕ КАТНАШТЫ (ФОТО)

17нче июльдә "Татарстан - Яңа Гасыр" телевидениесенең зур студиясендә өр-яңа татар фильмында төшәргә теләүчеләр арасында кастинг узды. Булачак фильмның сценариен Халисә Ширмән язган. Аның иҗат җимеше "Яңа Гасыр" телерадиокомпаниясе һәм "Татмедиа" агентлыгы ел саен үткәрә торган сценарийлар конкурсында җиңүче дип табылды. 2006 елда дөнья күргән һәм меңләгән тамашачының мәхәббәтен яулаган "Язмышлардан узмыш юк икән" сериалы нәкъ менә Халисә Ширмән әсәре буенча төшерелгән иде. Әлеге фильмда баш рольне Зөлфия Вәлиева башкара.

Ә яңа фильмда баш рольләрдә кем уйнар? Әлегә билгесез. Жюрига 300дән артык кешедән сайларга туры киләчәк. Кастингка халык бөтен Татарстаннан гына түгел, Башкортостан, Киров өлкәсе кебек Россиянең башка төбәкләреннән дә килде.

Жюрида исә булачак фильмның режиссеры Нурания Җамали, сценарий авторы Халисә Ширмән һәм Россиянең атказанган, Татарстанның халык артисты Ирек Баһман. Жюриның рәисе - "Яңа Гасыр" телерадиокомпаниясе" ААҖ генераль директоры урынбасары Миләүшә Айтуганова.

Кино нәрсә турында?

Зур тормышка аяк басучы яшьләр турында. Төп геройга инде 30 тула, ә ул һаман да аягында нык басып тора алмый: үги әнисе белән үскәнлектән барлыкка килгән психологик проблемалар аңа аек акыл белән эш итәргә ирек бирми. Ул гашыйк була. Ләкин аның хисләре җавапсыз. Вакыйгалар безнең көндә бара.

Премьера кайчан?

Фильмны агымдагы елның август һәм сентябрь айларында төшерергә уйлыйлар. Режиссер сүзләренчә, тамашачылар өч серияле картинаны ноябрьдә күрә алачак.

Һәм янә кастинг турында

Оештыручылар кастингның шартларын төгәл тасвирласалар да, кагыйдәләрне үтәмәскә күнеккән кешеләр дә үз көчен сынап карады. Мәсәлән, Фәридә апа Ибраһимовага 74 яшь, һәм ул кастингка килергә булган. Статистика шуны күрсәтә: кинода төшәргә теләүчеләр саны елдан-ел арта. Әйтик, 2006 елда "Яланаяклы кыз" сериалы кастингына 170ләп кеше килгән булса, быел әлеге сан икеләтә зуррак.

Йолдызлар һәм кастинг

Шунысы кызык: үзен кино сәнгатендә сынап карарга теләүчеләр арасында Миләүшә Сафина, Гөлнара Мулланурова һәм Зиннур кебек популяр җырчылар да бар иде.

Һәм нәтиҗәләр

Нурания Җамали белдергәнчә, яңа фильмда төп рольне башкарырдай кеше кастингта күренмәде. Баш рольләрдә, мөгаен, профессиональ актерлар уйнар. Аның каравы, икенче пландагы рольләргә туры килгән халык бар. Андыйлар - 10 чамасы. Моннан кала, якын киләчәктә тагын бер татар фильмы өстендә эш башланачак. Әлеге картина өчен дә кандидатуралар юк түгел... Ә җиңүчеләр исемлеге 20-21нче июльдә www.tnv.ru сайтында эленәчәк.