Чыгарылыш имтиханнарын хәзер татарча да биреп була?

Тугызынчы сыйныф укучыларына чыгарылыш имтиханнарын татар телендә тапшыру өчен бернинди каршылык юк. Дөрес, моңа кадәр дә чикләү юк иде. Әмма быел сигез фәннән имтиханнарга әзерләнү өчен материаллар, ягъни демоверсияләр татарчага тәрҗемә ителгән. Сынау нәтиҗәләре ни­ге­зен­дә урта һөнәри уку йортларына укырга керер­гә мөмкин.

Бу хакта Министрлар Кабинетында узган брифингта җиткер­де­ләр.

– Быел  БДИ бирүдә әллә ни үзгәрешләр күзә­телми. Укучылар имтиханнарга тыныч кына әзерлә­нә ала. Лә­кин тарих, җәм­гыять белеме, география, информатика һәм мәгъ­лүмат техноло­гияләре буенча  җаваплар­ны сайлап алу өлеше юкка чыгарылачак. Бу эш узган ел ук башланган иде. Би­ремнең чишелешен күрсәтү уку­чының белемен объектив бәяләргә ярдәм итәчәк, – дип аңлатты респуб­ли­каның баш педагогы Энгель Фәттахов. – Контроль-үлчәм материалларын  (КИМ) имтихан пунктларында   бастыру мөмкин булачак. Быел  тәҗрибәдә Әгерҗе, Азнакай, Актаныш, Баулы, Бөгелмә, Ютазы, Чүпрәле районнары катнаша. 

Укучылар 1 февральгә кадәр үзләренең нинди фән­нәрдән сынау тапшыруын хәл итеп бетерергә тиеш. КФУ проректоры Рияз Гатауллин чыгарылыш укучыларына математика им­ти­ханының профиль өле­шен сайларга тәкъдим итә. Чөнки вузга укырга кер­гәндә база белемнәре генә җитмәячәк. Узган ел Татарстан укучыла­рының 80,5 проценты профиль өлешен сайлаган. Ә бу сан Россиядә уртача нибары  42 процентны тәшкил иткән. 

Инша нәтиҗәләреннән башка укучылар имтиханнарга кертелми. Декабрь аенда  язган иншаларда рес­публикада 99,8 процент укучы “зачет” алды. Ә менә 34 укучы аны яза алмаган. Аларга  февраль аенда кабат белемнәрен сынарга туры киләчәк.

Быел бердәм дәүләт имтиханнарында – 17 меңнән артык, ә  тугызынчы сыйныф сынауларында 35 меңнән артык укучы катнашачак. Алдан тапшыру этабы  21 март – 6 май көннә­ренә билгелән­гән. Ә  төп этап  26 майдан 30 июньгә кадәр дәвам итәчәк. Шунысын истә тотарга кирәк: имтихан кагыйдәләрен бозган укучыларга кабат сыналу мөмкинлеге бирелми. Узган ел 7 укучы әлеге кагыйдәләр белән исәпләш­мәгән иде. ГТОны алтын күкрәк бил­гесенә тапшырган укучыларга вузга кергәндә өстәмә баллар биреләчәк. Гомумән, шәхси казанышлар өчен   баллар  саны уннан артмаячак.