“Мин дүрт сәгать алдарак яшим,”- ди "попутка" белән 6 илне гизгән Казан егете Рәйхан Халитов

“ВТ” хәбәрчесе бер елга якын сәяхәттә йөрүче илгизәр белән аралашканда, ул Вьетнамда тукталган иде.

 

– Америкада укыганда япон егете белән таныштым. Аның белән аралашып торабыз. Шулай бер көнне Япониягә виза алырга мөмкинлек чыкты. Кесәдә 70 мең сум тирәсе генә акчам бар иде. Ә Казаннан Япониягә очарга якынча 40 мең сум кирәк. Шуңа күрә мин Хабаровскидан ун меңлек билет сатып алдым да Казаннан Хабаровскига кадәр автостоп белән барырга булдым.

 

– Япониягә барырга җай чыкты дигәч, әни: “Синдәге мөмкин­лек, сә­ләт белән мин синең яшьләрдә инде әллә кайларда булыр идем”, – дип куйды. Шул сүз җитә калды. Башта 1 мең сум акча алып, автостоп белән Мәскәүгә виза алырга барып кайттым. Шушы акчага юл чыгымнарын да каплап, Мәскәүдә бер атна яшәп карарга да уйладым. Нәтиҗәсе мин көткәннән дә яхшырак булды. Мәскәүгә барып кайту миңа нибары 850 сумга төште. Казаннан Хабаровскига якынча маршрут төзегәч, юлга кузгалдым. Бөтендөнья татар конгрессының ярдәме дә зур булды. Яшьләр форумы рәисе Тәб­рис Яруллин конгрессның башка шә­һәрдәге бүлекчәләре белән элем­тәгә керде. Шул рәвешле мине шушы төбәкләрдә яшәүче татарлар каршы алып, кунак итте. Бу юлы, Россияне гизәргә дип, биш мең сум акча алган идем. Аның да 3,5 мең сумы гына тотылды. Хабаровскига барып җитү өчен 3 атна вакыт кирәк булды. Аннары Япониягә очтым.

 

 

– Сәяхәткә чыгар алдыннан картаны өйрәнә торгач, сәфәрне Япониядән соң да дәвам итеп, Ав­стралиягә кадәр барып җитәр­гә булдым. Нәтиҗәдә, Япония – Көнь­як Корея – Кытай – Вьетнам – Ав­стра­­лия яңа маршруты төзелде. Мин дүрт илгә – АКШ, Япония, Австралия һәм Канадага беркайчан да бара алмам дип уйлый идем. Ник дигәндә, анда үтеп керү кыенрак. Чынлыкта исә миңа, АКШта ике тапкыр булып, шунда бер ел яшәргә туры килде. Япониядә дә булдым, хәзер Австралиягә юл тотам. Киләчәктә Канаданы да күрергә исәп.

 

 

– Моңа кадәр мин Лаоста булдым. Вьетнамның Дананг шә­һәрендә инде дүртенче аемны яшим. Тагын бер айдан Тайланд, Малайзия, Индонезиягә юл тотачакмын. Аннары, ниһаять, Австра­лиягә барып җитәргә ниятлим. Анда бик көчле татар диаспорасы бар. Шулар белән элемтәгә кереп, ярдәм сорарга уйлап торам.

 

 

– Шәһәрдәге кунакханә­ләр­нең берсендә, чорма өлешен арендалап торам.

 

 

– Мин инглиз телен бик яхшы беләм. Шуңа Дананг шәһәрендә яши башлагач, инглиз телен өйрә­тү үзәгенә эшкә урнаштым. Монда бу хезмәт өчен бик яхшы түлиләр. Дүрт айда 300 мең сум акча эшләдем.

 

 

– Вьетнам халкы бигрәк хыялый. Аларның бернинди проблемалары юк, һәрчак елмаеп йөри­ләр. Шуңа ошыйлар да. Гәрчә вьетнамнар бик ярлы халык. Хезмәт хаклары безнекеннән 1,5-2 тапкыр тү­бән­рәк. Вьетнам­нарның ак тәнле ке­ше­гә акча янчыгы итеп карый торган гадәтләре дә бар. Җае чыккан саен күбрәк акча “кысарга” гына торалар. Монда “гопник”лар да, Тайландтагы кебек трансвеститлар да, урамда чабып йөри торган этләр дә юк. Очып йөри торган зур тараканнар гына бераз борчый.

 

 

 

– Әйткәнемчә, минем 70 мең сум акчам бар иде. Шуның 10 меңе Хабаровскидан Япониягә билет алуга тотылды. Тагын 10 меңенә рюкзак, палатка ише кирәк-ярак сатып алдым. Калган 50 мең сум акчага мин алты ай сәяхәт иттем. Шул акчага өч авиабилет сатып алдым һәм дүрт татуировка ясаттым.

 

 

– Менә әле берничә сәгать элек кенә Вьетнам сурәтен ясаттым. Дөрестән дә, үзем барган бер генә илдә дә татуировка ясатмыйча калганым юк. Бу – бик кызык фикер. Аны интернеттагы блогымны күзә­теп баручылар да хуплады. Бу татуировкалар аркасында кешегә сөй­ләрлек җим бар. Ә блогымда сәя­хәт вакытымда үзем күргән-бел­гәннәр­не, үзем тап булган маҗара­лар­ны тасвирлап барам. Кеше аны нәкъ китап укыган кебек күзәтеп бара ала.

 

– Шулай диюгә, төнлә урман аша берүзем бөек Кытай стенасына менүем искә төшә. Ул бик озын һәм туристлар аның бер өлешен генә күрә. Калганы җимерек хәлдә. Мин аның нәкъ менә шул урынына килеп чыкканмын. Япониядәге Фудзияма тавы таң калдырды. Япония үзе дә бик ошады. Токиога барганда үземнең нәкъ менә шушы җирдә басып торуыма бик озак ышана алмыйча тордым. Барысы да төш кебек кенә тоелды.

 

 

– Кистереп кенә “юк” дип әйтә алмыйм. Вакыйгалар бик тиз үз­гә­рә бит. Әлегә мин бернинди план­сыз яшим. Бернинди җаваплылык та, үз-үзеңне ниндидер кысаларга кертү ихтыяҗы да юк. Рәхә-ә-әт! Бөтен нәрсә үзгәргәндә мин шул үзгәрешнең уңай ягын табам да шул плюслар белән яшим. Нәтиҗә­дә бернинди тискәрелек сизмим. Теләсә кайсы негативтан үземә позитив ясыйм. Мисал өчен бер көнне мотоциклда барганда арткы тәгәрмәче төшеп калды. Башка вакытта бу күре­неш­кә кәефем кырылыр иде. Ә монда, иң мөһиме үземә берни дә булмады,  дип сөендем дә, шуның белән оныттым. Тагын да куркынычрак хәл килеп чыгарга мөмкин иде бит.

 

 

– Әллә ни үзгәрдем дип әйтә алмыйм. Аның каравы, чын дөньяны күрдем. Ул матур һәм телевизордагы дөньядан бик нык аерыла. Анда сөйләнгәннәрдән чыгып фикер йөртсәң, бөтен дөньяда ниндидер конфликтлар бара кебек. Ә чынлыкта дөньяда бернинди конфликт та юк. Кешеләрнең бер-берсе бе­лән сугышасы килми. Болар бар да сәяси уеннар гына. Барысы да бер-берсенә ярдәм итәргә генә тора. Кемгәдер зыян салу дигән нәрсә уйларында да юк. Шәхсән үземә дә бик күп ярдәм иттеләр. Россиядән икәнемне белгәч, киресенчә, хөр­мәт белән карыйлар.

 

– Австралиягә барып җиткәч, берәр лайнерга яки йөк корабленә волонтер, йә булмаса, эшче сыйфатында эшкә урнашып, Тын океанны бушлай йөзеп чыгарга хыялланам. Аннары сәяхәтем Көньяк Америкада дәвам итәчәк.