14.12.2015 Җәмгыять

Пенсионерларны байга һәм мохтаҗга бүләчәкләр

Киләсе ел башыннан хезмәт ветераннары икегә бүленәчәк: күп керемле байлар һәм аз керемле мохтаҗлар. Акчасы болай да күп дигән ярлык сугылганнарга социаль ташламалар буенча акчалата түләүләрне киметмәкчеләр. Түрәләребез шулай итеп акчаны янга калдырмакчы. Хезмәт, мәшгульлек һәм социаль яклау министры урынбасары Наталья Бутаева матбугат конференциясендә әйткәнчә, моңа кадәр һәр хезмәт ветеранына бертөрле социаль ярдәм күрсәтелсә, киләсе ел башыннан үзгәрешләр булачак.

Ноябрь аенда Дәүләт Советы “РТ халкына адреслы социаль ярдәм турында”гы Татарстан законына үзгәрешләр керткән закон кабул итте. Шулай ук Министрлар Кабинеты 2004 елның 17 декабрендә чыгарган “Пенсионерларга юл хакы өчен айлык акчалата түләү турында”гы карарга да үзгәрешләр кертелде. Бу ике норматив акт буенча, һәр ташламага ия пенсионерның кереме аерым тикшереләчәк, һәм мохтаҗ дип саналганда гына кирәгенчә ярдәм оештырылачак. 2015 елда республикада 1,5 миллионнан артык кеше социаль ярдәмнән файдаланган. Аларның 1,3 миллионына акчалата түләү оештырылган. “Боларның айлык кереме дә, мохтаҗ булу-булмаулары да исәпкә алынмады”, – ди Н. Бутаева.

Ташламалар, акчалата түләүләр 2016 елга кадәр билгеләнгән пенсионерлар тынычлап йоклый ала, чөнки “льгота”лар шул килеш калачак. Яңалык күбрәк киләсе ел башыннан лаеклы ялга чыгучыларның күңеленә коткы салыр, мөгаен. Аларга айлык керем 20 мең сумнан артмаган очракта гына социаль ярдәм күрсәтеләчәк. Республика законына кертелгән үзгәрешләр нәкъ менә алар кесәсенә сугачак. Төгәл әйткәндә, айлык кереме 20 мең сумнан артучыларга торак-коммуналь чыгымнарга 50 процент ташлама ясалмаячак, бушлай колак аппараты алу, теш куйдыру мөмкинлеге бетәчәк һәм транспортта йөрү өчен айлык акчалата түләү кимеячәк, аның суммасы 280 сум гына булачак. Ә керемнәре аз булганнарга “социаль проездной” акчасы 427 сум каралган. Ел саен хезмәт ветераннары сафына 9,5 мең кеше өстәлә. 1,5 мең пенсионерның айлык кереме 20 мең сумнан артып китә.

Киләсе елдан башланучы үзгәрешләр, әлбәттә, бөтен пенсионерларда да кызыксыну уятачак. Үзгәрешләр булган очракта ул хактагы барлык мәгълүмат исәп-хисап фактураларында язылачак икән. Аңлашылмаучылыклар да шактый булачагын алдан ук фаразлыйлар, шул җәһәттән 200дән артык телефон шалтыратулар кабул итәчәк, диләр. “Әгәр сезгә беркем дә үзгәрешләр хакында хәбәр итмәгән икән, димәк, социаль ташламалар элеккечә сакланган, – ди Наталья Владимировна. – Ә янга калган акчаны дәүләт мохтаҗларга ярдәм итүгә юнәлдерәчәк”.

Фәния АРСЛАНОВА
Ватаным Татарстан
№ --- | 12.12.2015