Өмет шәме сүнми әле...

Күптән түгел булган хәй­рия концертын Замирә Рә­җәпова шушы гыйбарәне сөйләп башлады. Бу көнне Совет районындагы “Сәй­дәш” мәдәният үзәгендә Әлмәт шәһәрендә яшәүче өч бала анасы, 39 яшьлек Роза Фәтхи­еваны дәвалау өчен татар эстрадасы артистлары зур концерт куйды. Әлеге ханым турында “ВТ”ның 161нче санында “Бер башлагач, туктарга ярамый” дигән язма басылган иде. Роза тәнендәге миңенең үсеп китүен күреп, табибларга мөрәҗәгать итә. Быелның апрель аенда миңне кисеп алалар, анализ нәтиҗәләре меланома барлыгын күрсәтә. Бу авыр диагноз гаиләне борчуга сала. Аның күзенә карап, савыгуын көтеп торучы өч сабые бар бит. Олысы Наилгә – 15, Ка­миләгә – 8, Саматка  6 яшь­ кенә бит әле.

 

“Сеңлегез турында язышыйк, – дип апасы Лилия­гә шалтыраткач, ул: “Белмим дә инде. Аптырадык. Интернеттагы төркемне дә ябармын дип торам. Акча табар җиребез юк. Бар булганнарына дару алдык. Тик бер атнага 115 мең 300 сумлык дару кирәк булачак. Өметем сүнеп бара, – дигән иде. – Ярдәм сорап, кая гына бармадык. Фондларда, акча юк, диләр. Әлеге даруны алу өчен квота барлыгын ишетеп, Татарстан сәламәтлек саклау министры Гадел Вафинга хат яздык.  Алар Президенттан күрсәтмә көтәләр. Аңа да хатлар юлладым. Барып җиткәнме-юкмы икәнен генә белмим.

 

Кыйммәтле дару нә­тиҗәсен күрсәткән. Инде тө­шенкелеккә бирелеп яткан Роза өстәл янына килеп ашый башлаган, кәефе күтә­релгән. Минзәлә районы Тау асты Байлар авылы халкы да, танышлары, дуслары, күр­ше­ләре, хәтта бер белмәгән кешеләр дә ярдәм кулы сузган.

 

Әле менә күптән түгел узган бу чарада Лилия ха­нымның улы Айнур укый торган Казан шәһәренең 6 нчы гимназиясе укучылары кул эшләрен тәкъдим итеп, үзләреннән өлеш кертте.

 

– Кулымнан бөтен эшем төшкән вакытта “Ватаным Татарстан” журналисты шалтыратып, күңелгә җылылык керт­те. Әлеге катлаулы хәл­дән чыгу юлларын күрсәтте. Бу чарада сезнең дә өлеш зур. Коллективыгызга зур рәх­мәтемне җиткерәм, – ди Лилия ханым.

 

“Сәйдәш” мәдәният үзәге директоры Рөстәм Җама­лиев белән дә без күптәннән таныш. Аның кеше кайгысына битараф калмаучы җитәк­че икәнен белгәч, Лилия ханымга да шунда барып карарга киңәш биреп

 

ялгышмаганыбызны аңладык. “Рөс­тәм Расыймович бер­сүзсез риза булды. Хәлне аңлаткач, залны бушлай бирде”, – ди Лилия ханым. Ә Рөстәм әфәнде бу изге гамә­лен инвалидлар ун­көнлеге кысаларында бер игелекле эш булсын дип башкарган.

 

– “Сәйдәш” – Совет районында бердәнбер мәдәният йорты. Башка мондый зур үзәк юк. Кешеләрнең гозер­ләрен тыңлау, аларга булышу тәрбиямнән килә. Әби-бабам гел яхшлык эшләргә генә өйрәтте. Мулла бабам, кешелекле бул, дип үстерде. Читләр кайгысына беркайчан да битараф кала алмыйм”. 

Чыннан да, “Сәйдәш” сәх­нәсенең берьюлы моның кадәр җырчы күргәне булмагандыр әле. Бер кичтә татар эстрадасының 39дан артык җырчысы чыгыш ясады. “Хәйрия сүзе үзенчәлекле булып чыкты. Тамашачы да зал тутырып килгән. Җыр­ларга теләүчеләр дә шактый. Үзләре катнашырга теләк белдерүчеләр дә күп булды. Безнең тәкъдимне дә ике­ләнмичә кабул иттеләр”, – ди концертны оештыручы Алсу Фазлыева. Фазлыевлар бу бәйрәмгә ныклап әзерлән­гән. Парлы җырларын башкарып кына калмадылар, хәтта кечкенә уллары да сәхнәгә чыкты. Сабый да кечкенәдән игелек эшләргә өйрәнеп үсә.

 

Ә оештыруга килгәндә, Алсуга тиңнәр юк иде. Җырчыларның да шулай кеше язмышына битараф калмыйча, вакыт табып чыгыш ясаулары сөендерде. Сер түгел: моңа кадәр татар артистларын бушка җырлату авыр иде. Әллә оештыру җитеп бетмәгән, әллә инде артистлар кешеләргә сәхнә биеклегеннән генә түгел, аскарак төшеп карый башлаганнар – билгесез. Әмма аларның шулай бердәм булып, ярдәм итү максаты белән сәхнәләрне дер селкетеп, килгән халыкны ял иттерүләре мактауга лаек. Араларында “стаж”лы хәй­рия­челәр дә бар. Татарстан­ның атказанган артисты ИлСаф шундый чарадан бер дә читтә калмый. “Зө­Ләй­Лә” кыз­лары, Нурзадә, Ил­гәрәй, Гөл­нара Габидуллина да мон­дый эшләрдә актив катнаша.

 

– Ярдәмгә мохтаҗ кеше­ләр яныннан болай гына узып китә алмыйм. Үз энем дә армия сафларыннан га­риплә­неп кайтты. Шуңа күрә андый хәлгә калган кеше­ләрнең хәлен чамалыйм. Үземнән өлешемне кертергә тырышам, – ди Гөл­нара.

 

Концерт шулкадәр мәгъ­нәле сүзләр белән үрелеп барды. Тамашачы ял итте. “Розага ярдәм кирәк булгач, бик теләп килдек. Мин апасы Лилиянең күршесе. Аның хәлләрен беләм”, – ди Розалия апа. Ә Лилия апа турында аерым алып язарлык. Булса да булыр икән туган­лыкның көче! Газиз сеңлесен аякка бастыру, бераз гына булса да хәлен җиңеләйтү, гомерен озайту өчен нинди генә киртәләрне узмый ул. Ярый хәлен аңлаучы тормыш иптәше бар! Аңа мең рәхмәтләр укый Лилия апа. Әле  тагын Әлмәткә юл алмакчы булып тора. “Үз күзләрем белән күреп кайтам. Казандагы онкология хастаха­нәсенә яткырып булмасмы”, – дип өметләнә ул.

 

Язмамны Замирәнең тагын бер матур хикәяте белән тәмамлыйсым килә.

– Ана карынындагы балага Аллаһы Тәгалә әйтә икән. Тиздән син Җирдә бер фә­рештә белән очрашачаксың. Ул сине саклар да, яклар да. Җил-давыл тидермәс. Аңа төрле кеше төрле телдә эндәшә. Син генә аңа “әни” диячәксең, – дигән. Роза Фәт­хиева да – үз сабыйларының саклар фәрештәсе. Балалары аның терелүен өмет итә, тү­земсезлек белән көтә. Шундый хәйрия чараларында катнашып, без бу са­бый­ларның фәрештәсенең гомерен озайта алабыз. 2016 ел­ның 18 гыйнварындә Кәрим Тинчурин театры бинасында Роза Фәтхиева өчен тагын бер концерт оештырылачак.

 

P.S. “Сәйдәш” мәдәният үзәге тыштан ялтырый, эч­тән калтырый дигәндәй, тө­зек­ләндерүгә мохтаҗ. Бу хакта Совет районы хакимияте башлыгы да хә­бәрдар. Төзек­ләндерү эшләре башлар өчен тендер да откан булганнар. Тик әлеге акчалар кайдадыр эленеп калган. Әллә бу үзәк, үзе мескен хәлдә булганга, мохтаҗ­ларның хәлен аңлый микән? Биредә күпме ансамбльләр чыгыш ясый, балалар үз иҗатларын үс­терә. Мондагы хез­мәт­кәрләрнең мәдә­ният өл­кәсендә башкарылган эш­ләрен санап бетерү мөмкин түгел. Дүртенче шәм шикелле “Сәйдәш”нең дә өмете сүнми әле.

 

Розага ярдәм итәргә теләүчеләр өчен исәп-хисап счетлары:

 

Сбербанк  639002629016317371 (банк картасы апасы Әскәрова Лилия Рәис кызы исемендә). Хәбәрләшү өчен телефон: 89178857859.