"Татар Җыры”н кем киендерә һәм иң кыйммәтле күлмәкнең бәясе күпме тора (ФОТО)

Елның иң мөһим музыкаль вакыйгасы “Татар Җыры” фестивале “Пирамида” күңел ачу үзәгенең концертлар залында 19 декабрьда узачак. Фестиваль ел да тамашачыларны үзенең масштаблары белән генә түгел, ә катнашучыларның кабатланмас стильләре белән дә гаҗәпләндерә. Элегант костюмнар, купшы, зәвыклы күлмәкләр соклану хисен уятмыйча калдырмый. Мөгаен күпләр “Әлеге онытылмас образлар кем эше икән?” дип кызыксына торгандыр.

Ел саен фестивальне оештыручылар профессиональ стилистлар белән хезмәттәшлек итә. Быел тантанада катнашучыларны дизайнер Алинә Бәдретдинова киендерәчәк.

Алинә Бәдретдинова – дизайнерлар арасында уздырыла торган бихисап бәйгеләрнең җиңүчесе. Күп еллар дәвамында “Эстель” мода театры өчен коллекцияләр әзерләп килә.  Казан милли тикшеренү технология университетының  Җиңел сәнәгать технологияләре, мода һәм дизайн Институтының “Мода һәм технология” кафедрасында өлкән мөгаллим.  Татарстан республикасының Мәдәният министрылыгыннан “Милли мода үсешенә керткән өлеше өчен” диплом белән бүләкләнгән. 2009 елдан татар эстрадасы йолдызлары белән хезмәттәшлек итә.

- Алинә, фестивальнең быелгы идеясе - туган якка булган мәхәббәт темасы костюмнарда чагылыш табачакмы?
- Туган як минем өчен серле урын ул. Туган йортымда үткән балачак елларымны һәрвакыт сагынып искә алам. Шуңа да әлеге тема миңа бик якын. Костюмнарда исә якты, нәфис төсләргә өстенлек бирергә тырыштым. Иң мөһиме – үзем өчен силуэтларда кабатланмаска дигән шарт куйдым.

 - Фестивальдә катнашучылар өчен сәхнә киеме сайлау процессы нидән гыйбарәт? 
- Чыннан да, бу процесс һәм бик катлаулы процесс. Барысы да булачак номерның куелышы турында фикер алышудан һәм җырны тыңлаудан башлана, аннан костюмның силуэтын һәм төсен сайлыйбыз. Беренчел эскизлар ясалганнан соң, иң катлаулы этапларның берсе башлана, ул да булса җырчы белән  бердәм фикергә килү. Монда, әлбәттә, үз позицияңне дөрес җиткерә белү бик мөһим. Кайвакыт башкаручылар төзәтмәләр дә кертеп җибәрә һәм, ниһаять,  җитәкчелек эскизларна кабул иткәч, материал сайланып, костюмны тегә башлыйбыз яки инде әзер күлмәкне генә сатып алабыз.

- Сер булмаса, проектта катнашучыларның сәхнә кименәре ничә сум тора?
- Барысы да материал бәясеннән, костюмның ни дәрәҗәдә катлаулы булуыннан тора. Мәсәлән, арзанраклары 40 000 тирәсе, ә иң кыйммәтле күлмәк 150 000 сум тора. 

- Стилист әзерләгән образда сәхнәгә чыгу бер хәл, ә менә үз белдеклегең белән күлмәк сайлау -  икенче эш. Татар эстрадасы йолдызлары сәхнә өчен киенә беләме?
- Һәр җырчының үз зәвыгы, һәркем үзенә туры килгән, үзенә килешкән киемне сайлап алырга тырыша. Иң мөһиме үз стилеңне булдыру. Кемнедер кабатлау беркайчан да уңышка илтмәячәк. Сукырларча мода артыннан куу да дөрес түгел. Күпчелек артистлар моны яхшы аңлый. Ел саен эстрадабызга яңа идеяле, үзенчәлекле образлары белән таң калдыручы, сәхнә костюмнарына яңа сулыш өрүче яшь башкаручылар килә. Бу, әлбәттә, шатландыра гына!

Партнерлар: Рэсми партнер «Татнефть» компаниясе; «Медитуризм» компаниясе – «Сэламэтлек артыннан Торкиягэ!»; Калинина 37 йортта урнашкан «Люкс» бутигы; «Семь озер» артезиан суы; «Аль-Резе» кондитерлык-кафесы; Кин профильле «Ава –казань» клиникасы; «Капитоь» кун хэм мех салоннары челтэре; «Иль де Ботэ» парфюмерия хэм косметика кибетлэр челтэре; «Таттелеком» компанисе;  Туры трансляциянен генераль партнеры «Намус» тозелеш компаниясе;  Туры трансляциянен генераль иминиятлэштеру партнеры «Наско» компаниясе».