Татарстанда минималь хезмәт хакы күләмен билгеләделәр

Татарстан Хөкүмәт йортында минималь хез­мәт хакы күләмен билге­ләделәр. Ул – 7 мең 309 сум тәшкил итәчәк. Яңалык рес­публика икъти­са­дының бюджеттан тыш секторы оешмаларына кагыла. Килешү Татарстан проф­союзлары федерациясе, Эш бирүчеләр берләш­мә­ләре­нең координация советы һәм Министрлар Кабинеты арасында имзаланды.

Татарстан Премьер-ми­нист­ры Илдар Ха­ликов сүз­ләренә караганда, бу өченче очрашу инде. Тәүге тапкыр минималь хез­мәт хакы турындагы киле­шү­не 2007 елда имзалаганнар. Бүгенгә кадәр 2014 елда кабул ителгән документ га­мәл­дә булган. Аның ни­ге­зен­дә иң түбән айлык хезмәт хакы 6 мең 420 сум тәшкил иткән.

– Бүген килешүне имзалау шартлары үзгә, – диде Хө­күмәт Рәисе. – Агымдагы ел ил күләмендә шактый катлаулы. Россия икътисадындагы үз­гәрешләр республикага да тәэсир итә. Шуңа күрә Татарстандагы төп микроикътисадый күр­сәткечләр узган елгыдан әллә ни аерылмый. Бу, беренче чиратта, эчке һәм тышкы базарлар­да сорау кимүгә бәйле. Шул ук вакытта Татарстан быел­ның беренче яртысында сә­нәгать җи­теш­терү күләме буенча, мо­ңарчы кебек үк, ил тө­бәкләре арасында – бишенче, Идел буе фе­дераль округында беренче урында тора. Икътисадый шарт­лар авыр булуга да карамастан, Татарстанда ин­вести­цияләр җәлеп итү, яңа проектларны тормышка ашы­ру дәвам итә. Агымдагы елның алты аенда гына да төп капиталга 207 миллиард сум күлә­мендә ин­вести­ция­ләр җәлеп ителгән.

Төзелеш тармагындагы күрсәткечләр дә узган ел дә­рәҗәсендә саклана. Сигез ай эчендә республикада 121 миллиард сумлык эш башкарганнар. Төзелеш эшләре күләме буенча Татарстан ил төбәкләре арасында – алтынчы, ә Идел буе федераль ок­ругында беренче урында тора. Бүген республикада 1,5 миллион квадрат метр торак кулланышка тапшырылган. Со­циаль тармакта, бигрәк тә хезмәт базарында да хәл тот­рыклы, дип ышандырды Илдар Халиков. Республика кү­ләмендә эшсезләр саны эшли торган халыкның 0,79 процентын тәшкил итә.

– Россия Президен­ты­ның “май указлары” ниге­зендә, Татарстанда бюджет тармагында эшләүче­ләр­нең хез­мәт хакын арттыру юнәле­шендә эш алып барыла, – диде Илдар Халиков. – Республика быелның беренче яртысында уртача айлык акча күләме буенча ил төбәкләре арасында – 26, Идел буе федераль ок­ругында беренче урында тора. Яңа килешү түбән хез­мәт хакы алып эш­ләү­че­ләр­нең айлык акчасын арттырырга да ярдәм итәчәк.

Әлеге документ федераль бюджеттан акча ала торган оешмаларны исәпкә алмыйча, республикадагы барлык эш бирүчеләргә кагылачак. Ки­лешмәгән оч­рак­та алар килешү басылып чык­каннан соң бер ай эчен­дә Татарстан Хезмәт, халыкны эш белән тәэмин итү һәм социаль яклау министрлыгына хат юлларга тиеш. Андыйларны җентекләп тик­ше­рә­чәк­ләр.