Санкциягә эләккән азык-төлекне юк итүгә ничек карыйсыз?

Россия тарафыннан игълан ителгән чикләүләргә эләгеп тә, төрле юллар белән безгә килеп эләккән азык-төлек продукциясе 6 августтан юкка чыгарыла башлады. Хәтерләсәгез, былтыр Россия, Көнбатыш санкцияләренә җавап йөзеннән, АКШ, Канада, Европа Берлеге илләре, Австралия һәм Норвегиядән ит, сөт, балык, яшелчә һәм җиләк-җимеш кертүне тыйган иде.

Белгечләр исә, аларны кибет киштәләрендә әле һаман очратырга мөмкин, ди. Бу атнада Идел буе транспорт прокуратурасы Казанның ваклап сату нокталарында тикшерү уздыра башлады. Чикләүгә эләккән азык-төлекне бульдозерлар белән таптатмакчылар. Россиянең кайбер төбәкләрендә исә тыелган продукцияне терлекләргә ашатырга җыеналар. Чикләүгә эләккән азык-төлекне мохтаҗларга өләшергә кирәк диючеләр дә бар. Ә сез тыелган азык-төлекне ни эшләтер идегез?

Илгизәр ГАЙНЕТДИНОВ, авыл хуҗалыгы фәннәре кандидаты, икътисадчы:

– Россиягә чикләнгән ризык кергән икән, иң элек аны керткән кеше­ләргә җәзасын бирергә кирәк. Әгәр дә инде ул азык-төлек безнең кибет киштәләренә эләккән икән, азык сыйфаты начар булмаса, аны мал-туарга ашатсаң да, балалар, картлар йортына, мохтаҗларга өләшсәң дә була. Монда бит азык-тө­лекнең бернинди гаебе дә юк. Бездә әле дәүләт тарафыннан үзебезнең җи­теш­терүче­ләргә күрсәтел­гән ярдәм күләме чит илләр белән чагыштырганда азрак. Шу­ңа күрә безнең азык-төлекнең үзкыйм­мәте дә югарырак булырга мөм­кин, аның көндәш­лек­кә сә­ләте дә түбәнрәк. Чит­тән кертелгән азык-төлек­не юкка чыгару үзебезнең җитеш­терүче­ләргә мөм­кин­лекләрне арттыра.

Гөлгенә ГЫЙЛЬМЕТДИНОВА, сөт җыючы (Балык Бистәсе районы, Иске Арыш авылы):

– Азык-төлекне, гому­мән, юкка чыгарырга ки­рәк­­ми. Моның өчен күпме өстәмә чыгым таләп ителә бит! Чикләүгә эләккән азык-төлекне чүплеккә ташлау да дөрес түгел, иң яхшысы – мохтаҗларга таратырга кирәк. Шулай эш­ләгәндә, бик саваплы булыр идек, җәмәгать. Ташланып юкка чыгарылган ризыкның гөнаһын кая куярлар?

Гөлназ СИРАЕВА, җырчы:

– Ризыкны шул рәвеш­ле юкка чыгару, һичшик­сез, дөрес гамәл түгел. Нин­дидер сәяси аң­лашыл­маучанлык аркасында ризык белән шулай кылану – башка сыймый торган хәл! Дини яктан карасаң, бу ризыкны исраф итү була. Миңа калса, аны мохтаҗ­ларга тарату, һич югы малга ашату дөресрәк.

Владимир АППАКОВ, фермер (Түбән Кама районы):

– Без үзебез­нең продукцияне кая куярга белмибез, малларга ашатабыз. Монда эш башкада. Без җитеште­рә­без. Тик моны беркем дә барлап тормый. Бездә базарны көйләп торучы кеше дә, үзебездә җитеш­терелгән азык-тө­лек турында җи­тәр­лек дә­рә­җәдә мәгълү­мат та юк. Тендер дигән нәрсә уйлап таптылар. Тик җитеш­те­рүчеләрнең анда катнашырга вакыты да, акчасы да юк. Шушы мәсь­әләләр безне бүген чик­ләүгә эләк­­­­кән продукцияне ниш­­ләтергә дигән сорауга караганда күбрәк борчый.

Илнар хәзрәт ЗИННӘТУЛЛИН, “Туган авылым” мәчете имам-хатыйбы:

– Әгәр азык-төлек ил чигенә килеп җиткән икән, аны, иң беренче чиратта, ­керт­­мәскә кирәк. Аларны кертә торган урыннарда көч­ле контроль булырга тиеш. Ә инде ризык без­нең илгә кергән икән, миңа калса, бу очракта аны, дөрес­тән дә, мох­таҗ­ларга, һич югы тер­лек­ләргә бирсәң хәер­лерәк. Безнең иле­бездә әле азык-төлекне ул дә­рәҗәдә алмаштырырлык мөмкин­лекләр юк. Мәсә­лән, без санк­цияләр игълан иттек, ризыкны кертмибез. Лә­кин аны билгеле бер план буенча, системалы рә­вештә эш­ләргә кирәк. Ризыкны бүген кертми башлыйбыз икән, ир­тәгә инде бездә ачлык башланырга мөмкин. Шу­ңа күрә үзе­безнең җир­лектә әлеге товарларны алмаштырырлык структуралар, шул ук фермерлар белән эшне җайга салырга кирәк. Юкса бу беткә үч итеп, тун яккан кебек килеп чыга.