Түбән Новгородта остабикәләр ярышты

Т.Новгород өлкәсенең Сергач районы Шөбиле авылының “Оргкомитет-2015” төркеме 18 июль көнне Ураза бәйрәменә багышлап, алар гадәти булмаган чара – камыр ашлары конкурсы оештырдылар.

Ул өч номинациядә үткәрелде. Беренчесе “Иң яхшы бәлеш”, икенчесе “Иң яхшы пәрәмәч яисә өчпочмак”, өченчесе “Теләсә нинди камыр ашы” иде. Конкурс Шөбиле халкы арасында зур кызык¬сыну уяткан, катнашучылар саны утызга якын булды, тамашачылар да күпләп җыелды. Мәчет алдын-дагы өстәлләрдә нинди генәме камыр ашы юк иде – төрледән-төрле бәлешләр, пәрәмәч-өчпочмаклар, күз явын алырдый матур тортлар, барысы да телеңне йотардый тәмле дә әле.

Жюри составына “Оргкомитет-2015” төркеменең берничә кешесе һәм барча халык яратып өлгергән, рәхәтләнеп тыңлаган “Татар радиосы”ның Сергачтагы алып баручысы Галия Таһирова керделәр. Галия конкурсны алып баруда да ярдәм итте. Жюриның эше ай-һай авыр булды бу көнне, чөнки һәрбер ашамлык беренче урынга лаек иде. Әмма конкурс булгач, аның кагыйдәләрен тотарга һәм җиңүчеләрне ачыкларга кирәк. Нәтиҗәдә, беренче номинациядә Румия Валеева искиткеч уңган һәм тәмле пахлавасы белән җиңде, икенче номинациядә Зилә Альму¬хаметова беренче булды. Ә менә өченче номинациядә җиңүчене билгеләү бигрәк кыен иде, ник дисәң, тәкъдим ителгән тортлар арасында өчесе Рамазан аена багышланып, искиткеч итеп бизәлгән иде.

Васимә Исхакованың мәчет формасында эшләнгән тортына сокланмаган кеше калмады, әмма жюри Гөлнур Арифуллинаның шулай ук мәчет формасындагы тортын тәмлерәк дип тапты, нәтиҗәдә Васимә икенче урында булды, ә өченче урын Коръән китабы формасында эшләнгән торт өчен Рәмзия Азизбаевага бирелде. Беренче ике номинациядә икенче-өченче урыннар Эльмира Жамалова белән Диляра Иляловага һәм Динара Галямова белән Гөлнара Курамшинага бирелде. Шунсы шатландыра – катнашучылар арасында яшь кызлар да байтак иде. Менә шундый уңган кыз-ларыбызны кәләшлеккә сайлагыз, егетләр, ни булса да, ач булмассыз.

Җиңүчеләр һәм призлы урыннарны яулаучылар грамоталар һәм кыйммәтле бүләкләр белән бүләкләнде. Беренче урын алучыларга суыткыч, суыткыч камера һәм автомат кер юу машинасы бирелде, әмма алар ул бүләкләрен садака итеп мәчеткә калдырдылар. Икенче урын алучылар электр мичләр белән бүләкләнде, әле инде алар бу мичләрдә тагы да тәмледән тәмле камыр ашлары пешерерләр. Өченче урын алучыларга электр иттарткычлар тапшырылды. Шулай ук һәр номинациядә 4-5 урын алучылар яхшы сыйфатлы табалар белән бүләкләнде. Барлык бүләкләрне бу конкурсның төп оештыручыларының берсе булган Мәскәүдә яшәүче Дамир Минаҗев гаиләсе биргән.

Менә шундый әлегә аналогы булмаган күркәм генә бәйрәм узды Шөбиледә. Беренче тапкыр булганга, оештыру эшендә кайбер җитешсезлекләр булса да, халык бик канәгать калды һәм Х.Жафяровка, З.Нәвретдиновка, Ф.Арифуллинга, М.Ишмуратовка, М.Динмухаметовка, И.Атабаевка,

Р.Иляловка, шулай ук “Оргко¬митет-2015” төркеменең бүтән әгъзаларына зур рәхмәтләрен белдерделәр. Бу конкурс соңгысы булмас, әлбәттә, һәм шуңа да “киләсе очрашуларга кадәр” дип ка¬лабыз.