Эсседә парфюмнан файдалану кагыйдәләре

Өеннән чыгып киткәндә хушбуй сибенмәсә, гүзәл затларыбызның күңеле булмый. Тик эсседә парфюмнан файдалануның билгеле бер кагыйдәләре барлыгын гына кайберәүләр бик үк белеп бетерми.

Бергамоттан саклан. Сос­тавында бергамот мае булган хушбуй кояш нурлары тәэси­рендә тән тиресендә пигмент тап­лары калдырырга мөмкин. Шул ук вакытта аның болай да бик көчле исе кояш нурлары йогынтысында тагын да арта. Нәтиҗәдә күпләрнең гайрәтен чигерердәй чамадан тыш көчле хуш исләр барлыкка килә.

Сулы булсын. Җәйгелек өчен “туалетная вода” (“Edt” дип билгеләнә) кулай. Җиңелчә генә исле “парфюмированная вода” (“Pdt” дигән тамгасы буенча эз­ләгез) дигәне елның әлеге фасылы өчен тагын да әйбәтрәк. Парфюмериянең бу төрләре сос­тавындагы су спиртның тән тиресенә йогынтысын киметә. Юкса спирт компонентлары кояш нурлары тәэсирендә тәнне ялкынсындыру гына түгел, хәтта пешерергә дә мөмкин.

Гадәтләрдән арынырга. Кайбер туташ-ханымнар мускус, агач исләре кебек борынга бик тиз бәрелә торган зәһәр исләрне ярата. Тик мондый исләрнең кыш өчен генә әйбәт булуын белеп торырга кирәк. Югыйсә сездән кил­гән хуш исләр ти­рәгездә­геләрнең сулышын кысарга, кү­ңе­лен болгатырга мөмкин. Эсседә чәчәк, җиләк, цитрус, үлән исләре кебек җиңелчә хуш ис­ләргә өстенлек бирергә кирәк. Гомумән, туташ-ханым­нарның хушбуй исе табигать, шаулап утыручы яшеллек исләренә тартым булырга тиеш. Җәен фәкать кичен берәр кая җыенганда гына зәһәр исле хушбуй сөртү килешә.

Шампунь, лак исләре… Чәчләрегездән шампунь һәм лак исе, тәнегездән юына торган гель, дезодорант исе аңкып торса, хушбуйның исе инде артыкка китәчәк.

Эсседә хуш исләрне яратмаучылар да бар. Мондыйларга дезодорант-гель ише әйбер­ләрнең “иссез” дигән тамгалысын сайлап алырга кирәк. Бер үк төрле хуш искә ия булганнарыннан да файдаланырга мөмкин.

Дезодорант артык түгел. Хушбуй сибенгәч, дезодорант сөртмәскә дә була, дип уйлаучылар ялгыша. Киресенчә, парфюмлы дезодорант хушбуй кулланмау мөмкинлеге бирә. Җәен дезодорант – бик кирәкле әйбер. Эсседә тирләүгә “күз-колак” булып тора, начар исләрне юкка чыгара ул. Ә менә тир исен хушбуй белән бетереп булмый. Парфюмны фәкать бернинди дә ис килми торган чиста тәнгә генә сөртергә ярый. Юкса хушбуй исе авыр искә әйләнәчәк.

Ял иттерә, көч-дәрт өсти. Соңгы вакытларда сатуда “релаксирующий” дигән тамгалы хушбуйлар күренә башлады. Җылы, “татлы” исләр – чәчәк-агач, сандал агачы мае исләре күңелгә тынычлык иңдерә, киеренкелекне бетерә. Ә инде цитрус җимешләре – бергамот, лимон, мандаринның эфир майлары күңелне күтәрә, көч-дәрт өсти.

Көчле булмасын. Кайвакыт хушбуй исеннән баш авырта башлый. Әмма аны азмы-күпме сөрт­кәнеңне үзеңә генә белүе кыен. Ник дигәндә, куллана башлаганда гына хуш ис безгә бик ачык беленә. Аннан соң борыныбыз бу искә ияләшкәч, хушбуйны һаман аз сипкәнбез кебек тоела. Сибенгәч, өегездәгеләрдән исе­нең көчлеме-түгелме икәнен сорагыз. Шулай итеп, алга таба хушбуегызны күпме сибәсен белә­чәксез.

Парфюмны “җылы” урыннарга тидерергә кирәк. Кан тамырлары якын урнашкан урыннар бу (беләзек, терсәк буыны, колак артлары, муенның алгы чокыры). Хушбуйны тез астына сибү тагын да әйбәтрәк. Бу очракта барган шәпкә тирәгездә хуш исләр таралачак.

Бу – кызык

- Әле шушы көннәрдә генә кайбер массакүләм мәгълүмат чараларында Мәскәү һәм илнең башка төбәкләре исеннән гый­барәт булган хушбуй уйлап табылачагы турында хәбәр таралды. Хуш, чит ил гүзәлләре “Будапешт”, “Франкфурт”, “Вена”, “Истанбул” һәм “Мюнхен” исләрен­нән торган парфюмны әллә кайчан ук куллана икән инде. “Мюнхен”нан лимонлы салкын чәй исе килә. “Вена”да – ваниль, татлы тамыр белән шоколад, кофе катнашмасы исе. “Истанбул” грейпфрут, бергамот, татлы борыч һәм тәмләткечләр исе белән туташ-ханымнарны әсир итә ди.

- Нью-Йоркның бер парфюмерия маркасы күз күрмәгән, колак ишетмәгән исләр белән “җен­ләнә” икән. Алар уйлап тапкан исләр арасында сабый исе, сыек чыбык яки камчы, кысла, чәчәк серкәсе һәм хәтта... яңа гына мәет чыккан өй исе дә бар, янәсе.