Минтимер Шәймиев татар телендә ант әйттерде

Татарстанның кеше хокуклары буенча вәкаләтле вәкиле вазифасына Сәрия Сабурская, ә бала хокуклары буенча вәкил вазифасына исә Гүзәл Удачина кандидатурасы тәкъдим ителде. Аларны Дәүләт Советына Татарстан Президенты вазифаларын вакытлыча башкаручы Рөстәм Миңнеханов керткән. Депутатларга исә кандидатларны Татарстан президенты Аппараты җитәкчесе Әсгать Сәфәров тәкъдим итте.

 

Билгеле булганча, кеше хокуклары буенча вәкаләтле вәкил вазифасына 30 яшьтән яшьрәк булмаган, абруена тап төшмәгән, югары белемле, кеше һәм граждан хокуклары һәм ирекләре өлкәсендә гыйлеме, аларны яклау тәҗрибәсе булган Россия Федерациясе гражданы сайлап куела. Россия Федерациясе субъектында Кеше хокуклары буенча вәкаләтле вәкилнең чит дәүләт гражданлыгы яисә Россия Федерациясе гражданының чит дәүләт территориясендә даими яшәү хокукын раслый торган яшәүгә рөхсәте яисә башка документы булырга тиеш түгел.

 

Тагын бер мөһим таләп: бер үк зат Кеше хокуклары буенча вәкаләтле вәкил вазифасына рәттән ике сроктан артыкка сайлана алмый.

 

Рөстәм Миңнеханов исә үзенең чыгышында кеше хокукларын яклау буенча вәкилнең ни дәрәҗәдә зур эш башкаруын ассызыклады.

 

- Әлеге эшчәнлеккә бәйле рәвештә без халыкны нинди мәсьәләләр борчыганын, аеруча зур игътибар сорый торган тармакларның нинди булуын беләбез, күрәбез. Өстәвенә, Сәрия Сабурская “Халык контроле” проектын тормышка ашыру буенча да актив эшли һәм бу эшне шактый уңышлы тормышка ашыра. Халык тарафыннан килгән мөрәҗәгатьләр арасында төрлесе бар, әлбәттә. Тиз арада хәл итеп булмый торганнары да юк түгел. Шулай да, барлык шикаятьләрнең 70-80 проценты хәл ителә, - дип белдерде Рөстәм Миңнеханов үзенең чыгышында.

 

Дәүләт Советы депутатлары әлеге кандидатураларны бертавыштан хуплады. Аннары исә алар парламент вәкилләре алдында кеше һәм бала хокукларын яклау буенча кулларыннан килгәннең барысын да эшләячәкләре турында ант итте. Сәрия Сабурская да, Гүзәл Удачина да антны рус телендә генә әзерләгән иде.

 

- Закон нигезендә ант ике дәүләт телендә әйтелергә тиеш, - дип ризасызлыгын белдерде Татарстанның Дәүләт киңәшчесе Минтимер Шәймиев.

 

Яңа сайланган вәкаләтле вәкилләр югалып калмады, билгеле: телләрен вата-җимерә булса да, ант сүзләрен татар телендә дә әйтеп чыктылар. «Татарстан Республикасына тугрылыклы булырга, кеше һәм гражданның хокукларын, ирекләрен һәм законлы мәнфәгатьләрен якларга, Татарстан Республикасында Кеше хокуклары буенча вәкаләтле вәкил буларак үземә йөкләнгән бурычларны намус белән үтәргә сүз бирәм», - диде Сәрия Сабурская.