Татарстанга корылык яныймы?

Татарстанның кайбер районнарында атмосфера һәм туфрак корылыгы күзәтелә. Әлеге куркыныч агрометеорологик күренеш республикада уңыш начар булуга китерергә мөмкин.

Авыл хуҗалыгы фәннәре докторы, профессор, Татарстанның Фәннәр академиясе әгъза-корреспонденты, Казан дәүләт аграр университетының “Гомуми игенчелек, үсемлекләрне саклау һәм селекция” кафедрасы мөдире Радик Сафин әйтүенчә, менә инде ничәнче көн рәттән республикада атмосфера корылыгы хөкем сөрә. Ул һаваның аз күләмдәге дымлылыгы һәм югары температура белән сыйфатлана, дип хәбәр итә “Татар-информ” агентлыгы.

Хәзер атмосфера корылыгына өстәп, туфрак корылыгы да барлыкка килгән. Күптән түгел яуган яңгырлар да тиешле нәтиҗә бирмәгән. Һаваның югары температурасы аркасында, су, туфракка барып җитмичә, парга әйләнгән.

Әлеге күренешләр Татарстанда куркыныч агрометеорологик күренеш – корылык булуын күрсәтә. Радик Сафин белдерүенчә, иң куркыныч вәзгыять көнчыгыш һәм көнбатыш Чулман аръягында, Идел алдында күзәтелә.

Җир шулкадәр корыган ки, корылык нәтиҗәсендә җирдә барлыкка килгән ярыкларга кешенең уч төбе дә сыя. Бу очракта чәчү мәйданнарын сугару иң нәтиҗәле гамәл булып санала. Ләкин, ни кызганыч, барлык җитештерүчеләрнең дә ясалма яңгыр яудыру җайланмалары юк.

Бу проблемадан чыгуның башка юлы да бар. Аграр университет галимнәре Татарстанның Авыл хуҗалыгы һәм азык-төлек министрлыгы белән берлектә игенчеләр өчен брошюра рәвешендә махсус тәкъдимнәр чыгарган. Бу әсбапларны авыл хуҗалыгы һәм азык-төлек буенча район идарәләре алган. Галимнәр үсемлекләрне стресска каршы препаратлар ярдәмендә сакларга киңәш итә. Моннан тыш, авырулардан саклау чараларын да куллану мөһим. Быелгы уңыш хәзерге вакытта – бары тик игенчеләр кулында.