Чик сагы ветераннары

Т.Новгород өлкәсе Кызыл Октябрь районы Семочкида 75 яшенә атлап баручы Мөнип абый ӘББӘСОВны мин күптән инде беләм. Әле бала чакта Семочки белән безнең Кочко-Пожар командалары Пьяна буенда футбол уйнаганда, Мөнип абый кырыс хөкемдар иде, безнеңчә әйткәндә, баш судьялык вазифа¬сын һәрвакыт җитди башкарып килде. Аннары Семочки фут¬болчылары яки хоккейчылары белән нинди дә булса турнирда очрашырга туры килсә, Мөнип абый һаман авылдашлары янында булып, аларга рухи дәрт биреп тора иде.

Аллага шөкер, әле бүген дә шулай ул. Семочкиның чын спорт ветераны авылдашлары чыгыш ясаган бер генә турнирны да калдырмый. Әйтергә кирәк, “Туган як”ның да һәр санын укып бара. Аеруча “Авылларда” рубрикасын якын күрә. Ә иске фотолар бастыра башлагач, Мөнип абый бер фото ышандырган иде. Ниһаять, ул аны үзе редакциягә китереп тапшырды һәм без аны Чик сакчылары көненә туры китереп бастырырга булдык.

- Бу фотога төгәл ярты гасыр. Анда Мөтеравылдан Нәим Сәйфуллинны, Семочкидан, билгеле, мине, Кочко- Пожардан Равил Арифуллинны һәм Уразавылдан Марс Рамазановны күрәсез. Без, якташлар, 1962-1965 елларда Төркмәнстан белән Иран чигендә хәрби бурычыбызны үтәдек һәм шунда фотога да төшкән идек, - дип аңлатма бирде Мөнип абый.

Аны армиягә алганда, өендә 70 яшьлек әнисе һәм өч көнлек кызы Гөлсинә белән хатыны Өркия кала. Аллага шөкер, өч елдан чик сакчылары дүртесе дә туган якларына әйләнеп кайталар. Ә Мөнип абыйга хатыны тагын өч кыз һәм бер малай бүләк итә.
Чик сагы хезмәте отличнигы, хезмәт ветераны хатыны белән бүген төпчек улы Мөҗип гаиләсенең кадер-хөрмәтендә яшиләр. Аларның 12 оныклары һәм 3 оныкчыклары бар. Мөнип абый дүртенче срок авыл советы депутаты булып тора.

Семочки администрациясе башлыгы Равил Бедретдинов та 50 ел моннан элек илебезнең чик сагында торган Мөнип абый турында гел яхшы сөйләде.

- Аның кебек аек фикерле, туган авылы өчен җан атып торган, көчен, вакытын, хәләл малын кызганмаган кешеләр күбрәк булса, авылда күп проблемалар хәл ителер иде. Икенчедән, ул яшь буынга бер дигән тере үрнәк өлгесе. Шундый ветераннарны, чын мәгънәсендә, авылның аксакаллары дип йөртергә мөмкин. Иҗтимагый тормышта да актив катнаша зур стажлы авыл советы депутаты һәм чик сакчысы. Ул авылыбызның бер горурлыгы булып тора, - дип бәяләде Мөнип абыйны Равил Хашимович.

Без шушы тарихи фотода булган хөрмәтле милләттәшләребез йөзендә барча чик сакчылары гаскәрләрендә хезмәт иткән һәм итүче якташларыбызны хәрби бәйрәмнәре белән (28 май) тәбрик итәбез! Илебезнең иминлеге, беренче чиратта, алардан тора.