Алсу Фазлыева 30 меңлек операция ясаткан

Татар эстрадасының моңлы, үрнәк гаиләсе Алсу һәм Азат Фазлыевларга кайчан шалтыратма, һәрвакыт мәҗлестә алар! Хәтта атна уртасында да никах-туйлар алып баралар. "Чыгымнарыбыз күп бит, шуңа хәлдән килгәнчә эшләргә тырышабыз", – ди Алсу.

Фазлыевлар хит булырдай җырларны башкарып кына тора. Яңа иҗат ителгән "Гашыйк булам көн саен" исемле җырның да киләчәге якты күренә. Азат әйтүенчә, ул "Күгәрченем-гөлкәем" җыры кебек үк популяр булырга охшаган, чөнки аны Сабан туйларында да сорап җырлата башлаганнар. "Бу – чыннан да, бик матур җыр. Хәзер мәҗлесләрнең дә программасын үзгәрттек, шушы җырдан башлап җибәрәбез. Тиз арада аңа клип та төшерергә уйлыйбыз, Алла бирса", - диде Азат.

– Яшәгән саен тәҗрибә дә күбрәк җыела, җырларны да сайлап, тикшереп кенә алабыз. Элек кенә бөтенесен рәттән җырлый идек. Мөмкинлек булса, җәйгә тагын 3 клип төшерергә ниятлибез, - ди Алсу Фазлыева.

Күптән түгел Алсу ике күзенә дә операция ясаткан. Бәясе ташлама белән 30 мең 600 сумга төшкән. Җырчы бу адымга күптәннән әзерләнде, шөкер, барысы да уңышлы узган. Ул хәзер үзен яңадан тугандай хис итә, хис-кичерешләрен хәтта сөйләп кенә аңлатып бирә алмавын белдерде.

Фазлыевларның Аяз белән Ильяс исемле уллары көзгә кадәр авылда әби-бабалары янында торачак икән. "Без аларны баллы-татлы ризыклардан тыя идек, ә әби-бабалары көн саен кибеткә алып барып, “тәмнүшкә”ләр белән сыйлый икән. Кечкенә чагында олысы Аязның тешләрен дәвалагач, Ильясны баллыга өйрәтмәдек, үзенең дә исе китми иде. Авылдан "бозылып" килмәсәләр ярый инде", - дип сөйләде Алсу Intertat.ru хәбәрчесенә.