Сабан туе - бәхет һәм шатлык туе

“Туган якта һәр тал җырлый”, - дип язып калдырган татар халкының күренекле шагыйре Сибгат ага Хәким. Камышлы районының Яңа Усман авылы Сабан туена баргач, моның шулай икәнлегенә бернинди шигем дә калмады. Сок елгасы буендагы яшел әрәмәнең уртасында урнашкан мәйдан тирәсендәге һәр агач һәм куак кошлар моңына кушылып, чыннан да җырлап тора иде кебек. Ә бу милли бәйрәмебезгә туып үскән якларын сагынып кайткан, бүген читтә яшәүче авылдашлар, килгән кунаклар күңеленә дә тагын да бер ямь өстәп җибәрде.

Камышлы муниципаль район администрациясе башлыгы Рафаэль Баһаутдинов Яңа Усман халкын, кунакларны бәйрәм белән котлаганнан соң, хезмәт алдынгыларына, авылның уңган эшмәкәрләренә Рәхмәт хатлары, Мактау кәгазьләре тапшырды.

Авыл җирлеге җитәкчесе Айдар Зарипов та үзенең тәбрикләү сүзендә бәйрәмне оештыруда матди ярдәм итүчеләргә рәхмәтен белдерде. Крестьян-фермер хуҗалыгы җитәкчесе Илшат Гыйниятов шулай да үз чиратында  уңган терлекчеләрне, сыер савучыларны, алдынгы механизаторларны бүләкләде.

Мәйдан уртасындагы озын колга башына Сабан туе әләме күтәрелгәч, төрле спорт бәйгеләре, милли уеннар башланып китте. Мәйдан буйлап гер күтәреп йөгерүдә Камил Вәлиуллин - беренче, аның улы Руслан - икенче, ә Илнар Гайфуллин өченче урыннарны яуладылар. Гер күтәрү бәйгесендә Рәсим Шәймәрданов, шул ук Илнар Гайфуллин һәм Рәшит Фәрхетдинов призлы урыннарга ия булдылар.

“Яңа гасыр” Татарстан телерадиокомпаниясенең генераль директоры урынбасары, “Болгар” радиосы җитәкчесе Илнур Фәйзерахманов бәйрәмнең алып баручысы буларак, тамашачы белән ике арада бик тиз дуслык мөнәсәбәтләре урнаштырып, төрледән-төрле кызыклы, матур уеннар оештырып торды. Ул үзе дә келәмгә чыгып, көрәшчеләр белән бил алышты.

Танылган пар җырчылар Гүзәл Уразова белән Илдар Хәкимов ихлас күңелдән халыкка үзләренең берничә җырын бүләк иткәч, вертолётка утырып, зәңгәр күккә күтәрелделәр дә мәйдан тирәли берничә түгәрәк ясадылар. Ә тамашачылар яраткан җырчыларына хәерле юл теләп, кул болгап, озатып калдылар. Ә инде алар киткәч, яшь җырчылар Чәчкә белән Ирек Гыйбадуллин рәхәтләнеп сәхнәдән үзләренең җыр-моңнарын яңгыраттылар.

Барысы да көйләп куйгандай дәвам итеп, келәмдә көрәш кызганнан-кыза барды. Баштан заманында мәйданны дер селкеткән өлкән көрәшчеләр бил алышса, аларны мәктәп укучылары алыштырды, аннан көрәш мәйданына бүгенге көннең чын көрәшчеләре чыкты.

Көрәш мәйданыннан читтәрәк физкультура укытучысы Алсу Мохтарова җитәкчелегендә кул ярышы, аркан тарту, авыш баганага менү, көянтә-чиләк белән су ташу һәм башка күптөрле уеннар алып барылды.

Кинәт кенә  яңгыр сибәли башласа да, бу беркемне дә куркытмады. Беркем дә Сабан туе мәйданын калдырып китәргә ашыкмады.

Бераздан куе болытлар биек тау артына кереп качты, һәм күк йөзендә тагын якты кояш балкый башлады.

Менә берничә сәгать дәвам иткән милли көрәш бәйгесе дә тәмамланды. Сумо көрәше буенча Россия Федерациясе чемпионы Артур Мингалимов беренче урынны яулады, авылдашы Тәскирә Еремеева аңа чиккән сөлге һәм сарык бүләк итте. 

Радмир Хәлимов - икенче, Рамис Ибраев - өченче, Раил Гайнетдинов дүртенче урынга чыктылар. Күрше авыллардан килгән көрәшчеләр арасында беренчелекне яулаган Иске Усман авылы егете Илдус Нуретдинов та абсолют батыр исеменә лаек булды. Аңа да сарык һәм машина юа торган махсус җиһаз тапшырылды. Башка көрәшчеләр дә бүләксез калмадылар.

Яңа Усман авылы Сабан туеның көрәш буенча абсолют батыры Илдус НУРЕТДИНОВ.

Бәйрәм сәхнәсендә җырчылар Гүзәл УРАЗОВА белән Илдар ХӘКИМОВ.

Яңа Усман авылы, Камышлы районы.