“Нәүрүз” фестиваленә билетлар сатыла башлады

1-5 июньдә Казанда үтәчәк “Нәүрүз” XII Халыкара театр фестиваленә билетлар сатыла башлады. Фестиваль спектакльләрен Камал, Качалов, Яшь тамашачылар һәм “Әкият” курчак театры сәхнәләрендә күрергә мөмкин. Билетлар театрлар кассасында һәм интернет челтәрендә.

Фестивальне оештыручылар быелгы фестиваль программасының башка еллардан шактый аерылып торуын ассызыклый. Беренчедән, фестиваль беренче тапкыр төрки халыклар яшәгән бер төбәкнең мәдәниятенә – Казахстан театры сәнгатенә багышлана. Икенчедән, беренче мәртәбә фестиваль кысаларында бөтен дөнья театр җәмәгатьчелеге өчен мөһим вакыйга – “Театр үсешенең юнәлеше: Европа-Азия” дип аталган Халыкара фәнни-практик конференция  үтәчәк. Өченчедән, фестиваль бюджеты кыскартылу сәбәпле, XII “Нәүрүз” программасы шактый кыскартылды. Әмма моның яхшы ягы да бар: спектакльләр җентекләп сайланылды.

Шулай итеп, XII “Нәүрүз” афишасына Әзербәйҗан, Алтай, Дагестан, Казахстан, Крым, Төркия, Татарстан, Тыва, Хакасия һәм Якутиядан 17 спектакль кертелде. Биредә Шекспирның “Тит Андроник” һәм «Тискәрегә авызлык» спектакле дә, “Коркут хакында легенда”, “Айраз батыр”  этник риваятьләре дә милли классика һәм заман драматургиясе дә бар. Фестивальдә катнашучы  режиссерлар арасында танылган исемнәр: Барзу Абдразаков, Йонас Вайткус, Фәрит Бикчәнтәев,  Айрат Абушахманов һәм башкалар. Фестивальнең тулы афишасы белән Г.Камал исемендәге Татар дәүләт Академия театры сайтында танышырга мөмкин – АФИША

“Нәүрүз” фестивале спектакльләренә билетлар бүген, 5 майда, сатыла башлый. Билетларны фестиваль спектакльләре үтәчәк театрларның (Камал театры, “Әкият” курчак театры, Качалов театры, Яшь тамашачылар театры) кассаларында һәм интернет челтәрендә алырга мөмкин. Билет бәяләре 1000 сумнан да югары түгел.

Искәртеп үтәбез, Төрки халыкларының “Нәүрүз” XII Халыкара театр фестивале 1-5 июньдә Казанда үтә.