Кем кемнең дусты?

“Эт – кешенең дусты” диләр. Бу әйтем барлыкка килгәндә, ягъни этләрнең күбесе авылда, үз ояларында яшәгәндә, бәлки, чыннан да, шулай булгандыр. Тик бүген бу әйтем искерде кебек. Ни өчен дигәндә, былтыр гына да республикабызда 12 меңнән артык кеше эт тешләгәннән соң табибларга мөрәҗәгать иткән. Зыян күрүчеләрнең һәр дүртенчесе – балалар.

Икенчедән, кайсыгызның шәһәр фатирларында эт асраучыларның дүрт аяклы дусларына урамда “һава сулатканда” үзләре белән соскы һәм целлофан капчык алып чыкканнарын күргәнегез бар?! Этләр без йөргән урыннарга, ишегалларындагы балалар мәйданчыкларына рәхәтләнеп кәкәй итәләр. Язын комлыкка уйнарга чыккан сабыйлар, үзләре дә сизмәстән, иң элек әнә шул кәкәйләрне кулларына ала.

Әлбәттә, сукбай этләр проблемасы түрәләрне һәм депутатларны да борчый. 2014 елның мартында ТР Югары Советы тарафыннан кабул ителгән “Об отдельных вопросах содержания домашних животных в республике Татарстан” дигән Законны тикшергәндә дә бәхәсләр күп булган, кайбер сорауларга җаваплар әле дә табылмаган. Дөресрәге, кабул ителгән карарларны тормышка ашырганда җирле хакимиятләр әлеге дә баягы акча мәсьәләсенә килеп төртеләләр дә, чарасызлыктан кулларын җәяләр. Әйтик, узган ел сукбай этләрне тотып, приютларга урнаштыру, аларга тиешле медицина ярдәме күрсәтү өчен республика бюджетыннан 19 млн. сум акча бүлеп бирелгән. Бер караганда шактый зур сумма кебек, әмма әлеге санны сукбай этләр санына бүлеп карасак, тиеннәр генә килеп чыга. Мәсәлән, башкалабыз Казанда гына узган ел 8.200 сукбай этне тотканнар. Аларны приютта яшәтү, дәвалау, стерильләштерү, котырганнарын ачыклап юк итү хакында уйлансак, эт проблемасының, чыннан да, мөһим мәсьәләгә әйләнгәнен күрербез.

Шәһәр сукбай этләре проблемасын бүген үк кичекмәстән хәл итәргә кирәк. Бу хакта сүз куертып, авыз эчендә эт балалатканчы, шәһәр йортларында эт тоту тыела дигән закон гына кабул итәсе, югыйсә...

Рәсемдә: мондый күренешкә берегезнең дә тап булганы юктыр. Шул исәптән, кулларына соскы, себерке һәм пакет тоткан эт хуҗаларына да.