23.04.2015 Спорт

Сафаҗай татарларны Сергачта җыйды

Түбән Новгород өлкәсе Пильна районы Сафаҗай авылының Мәскәүдә яшәүче бер төркем яшь егетләре 4 апрельдә Сергачның “Лидер” физкультура сәламәтләндерү комплексының бозына хоккей сөюче милләттәшләребезне җыйды. Татар командалары арасындагы турнир Бөек Җиңүнең 70 еллыгына багышланды.

Аның тантаналы ачу өлешендә Пильна район администрациясе башлыгы Сергай Бочканов, Сафаҗай һәм Петрякс авыллары башлыклары Фәрит Каюмов һәм Ансар Садретдинов, Сафаҗай мәктәбенең физкультура укытучысы Рөстәм Хәйретдинов чыгыш ясадылар, хоккейчыларга уңышлар теләделәр. Ә Мәскәүдән шушы турнирга махсус кайткан “Сафаҗай бүреләре” командасының уенчысы Әхмәт Аляутдинов (фотода) сугыш кырында баш салганнарның рухына матур иттереп Коръән укыды, хәтем багышлады, дога кылды.

Бу көнне бозда “бүреләр” өстенлек итте. Аларның капитаннары Илдар Салахетдинов әйтүенчә, сафаҗайлылар Мәскәүдә “Урам командалары”ннан торган турнирда чыгыш ясыйлар икән. Шуңа ки аларның уеннары да башкалардан күпкә аерылып торды.

- Бу турнирның төп оештыручылары дип саналсак та, чиксез рәхмәтләребезне җирле авыл һәм мәктәп администрацияләренә җиткерәсебез килә. Алар һаман безнең инициативаны күтәреп алалар, ярдәм итәргә тырышалар. Форсаттан файдаланып, Али Искандеров йөзендә барча командадаш иптәшләремә, безнең чакыруны кабул итеп бирегә килгән хоккейчыларга, аеруча аларның өлкәннәренә рәхмәтләр әйтәсем килә, - диде “Сафаҗай бүреләре” командасы капитаны.

Әйтергә кирәк, уеннар кызу, мавыктыргыч булуга карамастан, хоккей кырында бер генә бәхәс тә купмады.

Нәтиҗәләргә килгәндә, абайлаганыгызча, беренчене мәскәүле сафаҗайлылар алды, икенчедә аларның авылдашлары, ә менә өченчене петрякслылар яулады. Пожарлылар бу юлы бары тик хөрмәтле дүртенче урында булдылар.

Бүләкләнүчеләргә кубоклар һәм акчалата премияләр тапшырылды. Иң яхшы капкачы дип мәскәүле Вахит Маликов табылды. Ә Петрякс капкачысы, 14 яшьлек Фарух Закиров абзыйсы, Петрякс авылы депутаты һәм спорт инструкторы Әхмәр Закиров тарафыннан махсус бүләккә ия булды. Шул ук командадан әйбәт уенчы дип Тимур Хәйретдинов бүләкләнде, ә К.-Пожардан – Илдар Әхмәтбаев, Сафа-җайдан – Фәрит Идрисов һәм Мәскәүдән – Илдар Зарипов. Тагын бер капкачыны – Сафаҗайның күптәнге һәм иң ышанычлы соңгы сагы булган Ринат Калимуллинны махсус премия белән Фәрит Каюмов бүләкләде.

Күренеп тора, хоккей мәйданчыклары булган авылларда бу спорт төренә яшьләр күбрәк тартыла. Әлеге турнир моны тагын бер тапкыр исбатлады.