ТАГЫН БЕР ТАТАР КИНОСЫ: “ЯЗМЫШ ШУКЛЫГЫ”

“Барс-Медиа” компаниясендә тагын бер татар фильмы дөнья күрде – “Язмыш шуклыгы”. Сценарий авторы – Фәнис Җиһанша, режиссер – Әхтәм Зарипов. Төп рольләрдә – Раяз Фасыйхов, Венера Шәмиева, Илшат Вәлиев, Диләрә Илалетдинова.

“Әхтәм абый һәр нәрсәгә бик җаваплы карый, чын профессионал. Үзенең киңәшләре белән безгә бик ярдәм итте ул. Фильмда төшү – бик җитди, кызыклы нәрсә. Тагын кинода төшәргә тәкъдим итсәләр, ике дә уйламыйча ризалашачакмын”, – ди Венера.

Бу фильмда дөнья хәлләре кайнар хисләр, гади кешеләргә хас булган гап-гади тормыш мәшәкатьләре һәм куанычлары белән үрелеп бара.

Гөлсәрия (Венера Шәмиева) исемле кыз тулай торакта яши. Бервакыт ул үлеп җырчы Илгизәргә (Раяз Фасыйхов) гашыйк була. Концертларына йөри, һәр җырын үзенә карата әйтелгән сүз итеп кабул итә, аңа чәчәк бәйләмнәре бүләк итә. Гөлсәрия үз дигәненә ирешә. Илгизәр белән алар бергә яши башлыйлар, балалары туа. Җырчы егет популяр, аны баласы да хатыны да кызыксындырмый, ул гел каядыр йөри, күңел ача. Гөлсәрия түзми, баласын алып авылга яшәргә китә. Анда аны - шәфкать туташын зур табиб сыман кабул итәләр. Авыл халкы да, ул да бер-берсенә ярдәмләшеп яши, башы эштән чыкмаган хатынның баласы күбрәк күрше-күлән әби-бабай тәрбиясендә үсә. Күп еллар Гөлсәрия чын күңелдән яратып йөргән егет Кәрим (Илшат Вәлиев) көннәрдән беркөнне авылга кайтып, үзенә карата, улына ата була. Инде табыштык кына дигәндә, аларны Илгизәр эзләп таба...

Киноның ни белән тәмамланганын DVD дисктан карый аласыз, ул инде сатуда.

P.S. “Язмыш шуклыгы” фильмының авторлары һәм геройлары белән кызыклы әнгәмәне сез 25 апрель көнне 22.00 cәгатьтә “Яңа гасыр” радиосы һәм 28 апрель көнне 21.00 сәгатьтә “Татар радиосы” туры эфирларында тыңлый аласыз.