19.03.2015 Җәмгыять

Янгыннан соң базарларга йөрү куркыныч түгелме? (ФОТО)

Казан үзәгендә урнашкан сәүдә йортларының берсендә сату итүчеләр янгын башланган очракта “кеше кая чаба, шунда чабарга” киңәш итә. Сатып алучылар исә базарларның буталчык булуыннан зарлана...

“Адмирал”дагы фаҗига халык арасында зур шау-шу уятты. Өстәвенә, бу – Казан базарларында килеп чыккан беренче генә янгын түгел инде. Шуңа күрә кешеләр арасында сәүдә йортларына йөрергә куркучылар саны да артып китте. Бу аңлашыла да, әлеге урыннарда янгын куркынычсызлыгы кагыйдәләренең ни рәвешле үтәлүен, гадәттән тыш хәл килеп чыккан очракта кая барасын һәм ни эшлисен алар каян белсен...

Шуңа күрә без берничә Казан сәүдә йортларына барып, әлеге урыннарда куркынычсызлык кагыйдәләренең ни рәвешле үтәлүен тикшереп кайтырга булдык та инде. Моның өчен халык арасында аеруча популяр булган ике зур базарны сайладык.

Халык кая чаба, шунда чап...

Без барган беренче сәүдә йорты Казан үзәгендә урнашкан һәм үзен зәвыклы сәүдә йорты буларак тәкъдим итә. Бирегә йөрүче халык сәүдә рәтләренең буталчык булуыннан зарлана, биредәге сакчыларның ярдәм итәргә ашыкмавын ассызыклый.

- Бу комплекс шактый катлаулы итеп төзелгән. Адашсаң, тиз генә чыгу юлын табам димә... Бигрәк тә өченче катка менү зур авырлык тудыра. Өстәвенә, сатучылар һәм сакчылар да ярдәм итәргә ашыкмый. Берсе - бер якка, икенчесе икенче якка җибәрә. Чыгу юлының кайда икәнлеген үзләре дә белми диярсең, - дип зарланып алды сатып алучыларның берсе.

Ә менә кулына рация тоткан сакчы исә әлеге сәүдә үзәгендә янгын беркайчан да чыкмаячак, дип ышандырды.

- Безнең сәүдә йорты элиталы урын булып санала. Монда барысы да югары дәрәҗәдә оештырылган, - дип белдерде ул. Шулай да, “Муравейник” сәүдә йортының әлеге сакчысы безгә запас чыгу юлларын, янгын сүндерү өчен махсус җиһазлар саклана торган урыннарны ни өчендер күрсәтергә теләмәде. “Баш катырып йөрмәгез әле”, - дип кенә белдерде.

Сатучылар да минем соравымны шаяруга борды. “Янгын башланса, халык кая чаба, шунда чабасың инде” дигән бик кирәкле (!) киңәш бирделәр.

Халык базарда адаша

Аннары без Себер трактында урнашкан икенче базарга юл тоттык. Әлеге базар бик “буталчык” дип зарланучы сатып алучылар шулай ук күп. Социаль челтәрләр әлеге төр шикаятьләр белән тулган дисәм дә, ялгыш булмас.

- Әлеге базар буйлап 1,5 сәгатькә якын йөргәнбездер, мөгаен. Аннары чыгу урынын таба алмыйча буталып беттек. Чынлап әйтәм, адаштык. Сәүдә йортыннан чыгу урынын күрсәткән бер генә билге дә юк. Янгын башланса, без кая барырга тиеш икән? - дип зарлана Ольга исемле интернет-кулланучы.

Хәер, “Бик Зур”да без әлеге төр җитешсезлекләрне ачыкламадык. Киресенчә, тиешле билгеләрнең барысы да урынында, эвакуация ишекләре дә һәр залда берничә, янгын сүндерү җиһазлары да адым саен диярлек урнаштырылган.

- Соңгы ел ярым вакыт эчендә Гадәттән тыш хәлләр министрлыгы безне өч тапкыр тикшерде. Соңгы тикшерү октябрь аенда узды. Күзәтчелек органнары тарафыннан ачыкланган җитешсезлекләрнең барысы да 100 процент юкка чыгарылды, - дип сөйләде әлеге сәүдә йорты директорының куркынычсызлык буенча урынбасары Евгений Зайцев.

“Адмирал” сатучыларда җаваплылык хисен көчәйтте

Шунысын да билгеләп үтү кирәк, янгын куркынычсызлыгы турында сөйләгәндә, кеше факторы турында да онытырга ярамый. Кагыйдә буларак, янгын куркынычсызлыгы сиреналары кычкыра башлаган очракта күпләр урыннарыннан кузгалырга ашыкмый. Алар, бу - гади тикшерү генә дип уйлап , тынычланалар. Ярый ла, ул, чыннан да, янгын куркынычсызлыгы җиһазларын тикшерү генә булып чыкса... Ә чынлап янгын башланган очракта бу кешеләрне нинди язмыш көтә?

- Әлбәттә, төрле кешеләр бар. Шулай да, күпләр барысын да тулысынча аңлап эш итә. “Адмирал”дагы вакыйгалардан соң сатучылар үзләре дә сагаеп калды. Әлеге тикшерүләрне тиешле гамәл буларак кабул итәләр. Гомумән, базарлар яну белән бәйле соңгы вакыйгалар аларда җаваплылык хисен көчәйтте. Иң беренче чиратта товарны түгел, ә үз гомереңне саклау турында уйларга кирәклекне дә аңладылар кебек, - дип дәвам итте сүзен җитәкче.

Евгений Зайцев “Адмирал” базарындагы аяныч хәлләрдә сәүдә йорты җитәкчесен генә гаепләү белән килешмәве турында да ассызыклады.

- Әлбәттә, директорны берничек тә аклап булмый. Шулай да, аны кешеләр үлемендә гаепләү дөрес түгел дип саныйм. Сез үзегез “дөрләп яна торган бинага ашкынучы сатучыларны полиция хезмәткәләре дә көчкә генә тоткарлап тора алды”, дип язасыз. Әгәр дә кеше үз-үзен белештермичә, әлеге моментта товарын коткару турында гына уйлаган икән, директор аларны ничек саклап калсын, - дип саный ул.

“Адмирал”дагы вакыйгалардан соң “СОГАЗ” компаниясе өр-яңа тәкъдим белән чыкты. Алар кеше күп йөри торган объект хуҗаларының җаваплылыгын иминиятләштерү кирәк, дип белдерә. Бу – биредә төрле гадәттән тыш хәлләр нәтиҗәсендә зыян күргән затларга ярдәмне шул иминият акчаларыннан түләргә мөмкинлек бирәчәк. Әлеге чара бюджет акчаларын саклауны һәм ярдәмгә мохтаҗларга вакытында акча күчерүне дә тәэмин итәчәк, ди компания җитәкчесенең беренче урынбасары Николай Галушин.

Солтан ИСХАКОВ фотолары.

Рәмзия ЗАКИРОВА
Интертат.ру
№ | 19.03.2015