Ир-атның юмартлыгы 8 мартта беленә (+чәчәк бәяләренә күзәтү)

Кәҗә бистәсе метро станциясе тирәсендә урнашкан чәчәк кибетендә эшләүче флорист Надежда, Яңа елдан соң чәчәккә бәя ике тапкыр артты дип, гаҗәпкә калдырды! Әле ел башында Татарстан туфрагында, Татарстан кояшына карап үскән розалар узган елдагыча 60 сум торса, евро курсы белән бергә Голландиядән кайтарылган розаларның бәясе дә күккә ашкан, безнекеләр дә.

 

- Кризис аркасында сатып алучылар да, керем дә кимеде. Әмма кайбер даими клиентларыбыз хатын-кызларын чәчәк белән сөендерүдән туктамады. Әйтик, бер бабай безгә көнаралаш килеп, тормыш иптәшенә хризантемалар бүләк итә. Ә 35 яшьләр тирәсендәге бер ир көн саен диярлек хәтта ике меңлек, конфетлар белән бизәлгән чәчәк бәйләмнәренә кадәр сатып ала. Кибеткә товарны өч көнгә бер китертәбез, – диде Надежда.

 

Монда чәчәкнең нинди генә төстәгесе юк, тик шулай да, флорист сүзләренчә, кызыл һәм ак төстәгеләрен аеруча күп алалар. Гашыйклар, Хатын-кызлар, Әниләр көне килеп җитәрәк, биш көнгә бәяләрне күтәреп куялар, ничә сумга, дип сорагач, коммериция сере, дип җавап бирде Надежда.

 

Татарстанның умартачылык идарәсе җитәкчесе Рәшит Сафиуллин 8 мартта хатын-кыз туганнарын чәчәксез калдырмый, ә әнисенә гөлләр бүләк итә. Быел бәянең ике тапкырга артуы аны чәчәк кибетенә барудан туктатмаячак.

 

- Елга бер килә торган бәйрәмгә акча санап торып булмый инде, – диде ул.