Ул чакта 8-9 яшьлек Рөстәм Русиядә иң бай кешеләрнең берсе булачак дисәләр, авып китәр идек

Роза Нәҗиповна, группаның кураторы буларак, язгы кыр эшләре беткәнче безнең янда йөрде. Безгә карата бик хәерхаклы укытучы иде ул. Төнге чәчүдән соң басу кырыендагы чирәмгә чыгып ятсак, аналарча: "Балалар, торыгыз-тор, язгы җир суыгы бәрмәсен", — дия-дия, ягымлы гына дәшәр иде. Югыйсә, ярты группабыз армиядә булып кайткан олы егетләр иде инде.

 

Роза Нәҗиповна техникумга еш кына кечкенә Рөстәмне дә җитәкләп килгәләде. Ул 8-9 яшьлек малайны киләчәктә Русиянең булачак миллиардеры дисәләр, артка авып китәр идек, мөгаен. Кем уйлаган, СССРтаркалыр да, шушы малайлар буыны Русия байлыгына хуҗа булыр дип.

 

Рөстәм Тарико белән очраша-нитә калсак, мин аның техникумга килеп йөргән чагын исенә төшерер идем. Алай гына да түгел, Русия халкына миһербанлырак булуын да сорар идем, югыйсә, аның банкының эш ысулларына дәгъвалар байтак ишетелә. Кайчак кечкенә Минзәлә шәһәрендә үскән тыйнак кына малайның кинәт кенә олигархка әйләнүенә ышанасы да килми. Нишләптер аракы бизнесын да ярата ул. Әнә, дөрес булса, Буа спирт заводын да 2010 елда 632 млн сумга сатып алган. Аңарчы кибетләргә аның "Русский стандарт" аракысын да китереп тутырганнар иде.

 

Теге вакыттагы кечкенә Рөстәм хәзер олы кеше инде, тән сакчылары озатуында гына йөри, янына якын килә алмыйсың. Әйтер сүзеңне әнисе аркылы җиткерер идең, Роза Нәҗиповна да хәзер Минзәләдә түгел, ә даими рәвештә Италиядә яши икән. Әнисе канаты астында гына үсте шул ул Рөстәм, әнисен биктә ярата, хөрмәт итә диләр. Шуңа да тудырып үстергән анасының гомерен ничек булса да озайтырга теләп, яхшы климатлы илдә, оҗмахка тиң шартлар тудырып, Роза Нәҗиповнаны ял иттереп яшәтә. Безгә исә хәзер: "Мин ул малайны белә идем", — дип әйтергә генә калды.